|
رد: تحذير ( من زيوت زادو Xado ) لوجه الله
اقتباس:
يعنى انا مش عاوز تعويض ولا عايز اى حاجه ، انا بدل ما احصل على اعتذار لاء بيهاجموا وكمان بيجرحو وبيقولو انى تبع ال شركه تانى وكلام غبى ، حسبي الله ونعم الوكيل وشكرا لك على دعمك |
رد: تحذير ( من زيوت زادو Xado ) لوجه الله
اقتباس:
يعنى مبقاش نصب وغش تجاري وبس لاء وهجوم وكلام سخيف ( فلتر ومش فلتر ) ده اول ما غيرت الزيت علطول علطول بدون مبالغه وحطيت شيل 1000 لتنظيف الماتور لمبة الزيت طفت خالص ومنورتش تانى يبقي كدا العيب فيا وفي العربيه مش في الزيت اللى كان مبعوت ليا بتاريخ 2012 ومبعوت لصديق انتاج 2010 من 3 ايام وصل صديقي انتاج 2010 كل الناس نصحته بعدم وضعه وانا اولهم ، وخسر فلوسة ومعرفش يرجع اى حاجه منها لانه اشتري عن طريق النت شكرا جدا لدعمك وفعلا عندك حق بس انا فهمت متأخر |
رد: تحذير ( من زيوت زادو Xado ) لوجه الله
خلونى طيب احكيلكو الحكاية من الاول لانى من الناس المهروسة فى القصة ديه بقالى سنين دلوقتى
من 6 - 7 سنين كدة كانت الزيوت الموجودة فى مصر كلها الماركات التقليدية المعروفة وبس وكانت اغلبها بيتعبى هنا فى مصر وبرضو كان مغشوش كتير وكانت الحجة ان علشان بتتعبى فى مصر وماركات منتشرة فسهل تتضرب وفعلا العلب مرمية فى كل حتة والزيوت القديمة والمغشوشة بتتباع بالطن وبتراب الفلوس واللى خلى لبن الاطفال بيضرب هتلاقى ناس كتير معندهاش ضمير تجيب العلب وتعيد تعبئتها وتبيعها بعدها كمان اسعار الزيوت الماركات ديه بقى يزيد وبداء يظهر حل للمشكلة ديه فى صورة زيوت مستوردة وبدانا فى مصر موتورز نعتبرها حل لجشع التجار وحل لمشكلة الزيوت المعبئه فى مصر وبدانا نشجعها كان اكتر نوعين شجعناهم وتابعناهم فى الفترة اللى فاتت ديه ليكومولى وزادو وفيسكو والشركتين الاولانين تحديدا كنا على تواصل مباشر معاهم من اول يوم ومن اول تجارب وصفحات المنتدى تشهد بدة وكتير من الاعضاء بداو يعملو تقييمات للزيوت ديه كان اغلبها مشجع ونسبة مشاكل اقل بكتير من العادى المرحلة التالتة والاخيرة من الحكاية بقالها حوالى سنتين وتحديدا من بعد الثورة كانت فكرة الزيوت المستوردة بتنتشر اكتر لدرجة ان فى اخر سنتين رصدنا حوالى 12 نوع مختلف بعضها معرفناش نوصل لمصدرة حتى وبداء الموضوع يبقى فيه فوضى واضحة وبدات الشكاوى تكتر اللى عايز اقولة من الحكاية ديه كلها اننا عايزين نبقى ايجابيين فى انتقادنا او دعمنا لاى منتج زى ما تعودنا دائما فى مصر موتورز لو فيه مشكلة مثلا فى زيت محتاجين نعرف طريقة الشراء او المكان .. نوعية العربية حالتها نوعية الزيت المستخدم (الفئه ) وصف وطبيعة المشكلة اللى ظهرت بعد استخدامة احنا بالمعلومات المفصلة ديه نقدر ننصح ونحذر صح ونتلافى اى اتهامات بدعاية مضادة وناكد مصداقية التجربة ونواجه الوكيل او البياع بشكل قاطع انا بإذن الله هتابع مع حضرتك بنفسى وهتباعكم كمان بتجاربى مع الزيوت كلها ونشوف هنوصل لايه وان شاء الله خير ولو الموضوع عليه اجماع يبقى مش هنكتفى بشكوى فى بوست وبس وهيكون لينا موقف ايجابى اكتر ان شاء الله وشكرا لكل الاراء والمشاركات وفى انتظار المزيد من التجارب الموثقة |
رد: تحذير ( من زيوت زادو Xado ) لوجه الله
اقتباس:
السياره اسبيرانزا 516 حالة السيارة 80 الف كيلو ، ومهتم بيها جدا الزيت المستخدم زادو xado 10w-40 والوكيل اللى رشحه ليا مش انا مكنش فيه اي مشكلة قبل تغيير الزيت ، واول ما غيرت الزيت لمبة الزيت قعدت تنور والعربيه بقت تسخن وتطلع حراره بشكل غير طبيعي وصوتها بقا اعلى طبعا انا مكنتش مرتاح وكشفت عند مهندسين ميكانيكا وميكانيكية وبتوع زيوت وتوكيل زيوت وكلهم اجمعوا على ان الزيت مضروب بدون حتى ما اوريهم شكل العلبه او اسمه ( عشان الحكم يكون صحيح ) بمجرد ما غيرت الزيت علطول اللمبه طفت والعربيه ارتاحت ورجعت لحالتها الطبيعيه الزيت وصلني 4 لتر انتاج 2012 و1 لتر انتاج 2010 ، وكلمت الوكيل قالى عادى حطهم ومش تقلق مع ان كل الاعضاء والجروبات نصحوني بعدم وضعه الا ان فيه ناس نصحتنى بوضعه عادى والوكيل اكد عليا وقالى حطه ومتخفش من حاجه . غيرت الزيت بزيت شيل 1000 لتنظيف الماتور والحمدلله اللمبة بطلت والحال اتحسن اتكلفت فى العمليه دي كلها 550 زيوت وفلاتر من غير تمن الكشوفات والفحوصات مش محتاج فلوس ولا عوض لان العوض علي ربنا .. لكن حذرت الناس من الزيت لعدم الوقوع في نفس مشكلتي وعرضت وتم كتابت نسخه من الموضوع فى نايل موتورز ايضاً وتفاعل الاعضاء معي بشكل ايجابي وهناك ايضا من يؤكد صحة كلامي بتجربته ( اوبل كورسا - نوبيرا وان - سبرانزا 516 - سبرانزا اي 113 - نوبيرا 2 - وجيلي ام جراند ) والتأثير السلبي على الماتور الخاص به ، وايضا بجروب النوبيرا على الفيس بوك وبجروب الاسبرانزا على الفيس بوك الكثير منهم يؤكد علي سلبيه هذا الزيت وتأثيره الضار بالمحركات . بعدها تم مهاجمتي من المتربحين والموزعين بأعتبار انى بضرب السوق بتاعهم ! ، والتجريح فيا شخصياً بكلمات لا يصح ان تخرج من فم احدهم من اجل ربح ( 20 - 30 ج ) وتمت مهاجمتي بكلمات مثل ( قابض - تعمل فى شركة اخري - والخ ) ونظرية المؤامرة وطبعا انا لن ارد على امثال هؤلاء لان الحمدلله الناس كلها عرفاني وعارفين كويس جدا انى مبيعش ضميري او مبادئي من اجل مليون جنيه مش 10 ج ..! وطبعا يا ابو نورا الزيت كان لونه وريحته غريبه جدا ولزوجته غريبه .. لم احصل على اعتذار من اي احد وهو اضعف الايمان عندما ذكرت مشكلتي فى المنتديات والجروبات التي تخص لمبة الزيت لم اذكر اسم الزيت مع ان الكثير سألني ما نوع الزيت الذى تم تغييره كنت بقول اهو زيت وخلاص عشان مظلموش او حتى اخلي حد يشك فيه او يمتنع عن شراءه لكن بعد التأكد والتبين وما حدث معي شخصياً تم التحذير من الزيت على اوسع مستوي ..وتم كتابه البوست فى اكثر من جروب واكثر من موقع وطبعا لم انسي مصر موتورز الذى كان من اول المواقع التي خطرت على بالي لما فيه من اعضاء متخصصين فى السيارات . وبالنهايه لا استطيع الا القول ان القاعده تقول ان الزبون دائما على حق ولا اجد لي اى مصلحه فى ما اكتبه الان او ما اضيعه من وقت فى كتابه كل هذا ، وحتى لا اعرف حتى الان اسم الوكيل الذى طلبت منه الزيت بل اعرف رقمه فقط اخره تقريبا 23 23 وتم توصيل الشحنه عن طريق شركة ايجيبت اكسبريس ومعايا بردو رقم المندوب ، الزيت كان متغلف تغليفه الشحن بس ومكنش الجركن متكيس . ولهذا السبب انوه واحذر من استخدام اى منتج من منتجات زادو والابتعاد نهائياً عن شراء اي شىء من هذا القبيل عن طريق الانترنت ، هذه ليست اول مره لي للشراء عن طريق الانترنت انا حتى اشتري ( تيشيرتات من على سوق ) لكن زيت سياره قد يدمر محرك بمبلغ وقدره بلاش تهاون في الحاجات دى ... وعلى رأي حضرتك فعلا كل حاجه فى الاول بتبدء اصليه وبعد كدا تتضرب بكل سهوله وتذكرت الان كلمة احد موزعي الزيوت قال لي ( اتعرض عليا زيت زادو ورفضت نهائي التعامل مع مثل هذه الانواع من الزيوت التي يتم تعبئتها تحت بير السلم ، وانا مستعد الان اضربلك زيت ونخليه صنع فى اليابان وخد وزعه وبيعه واكسب من وراه ) ! اسهل حاجه دلوقتى بقت الغش لانه سريع الربح وحسبي الله ونعم الوكيل |
رد: تحذير ( من زيوت زادو Xado ) لوجه الله
انا حطيت زيت زادوا فى سنة 2014 واعتقد قبل ماأعمل الحادث باالعربية مش فاكر كان إمتى بلضبط ولكن الحدثة كانت فى شهر 9 /2014 والحمدلله الموتور لم يتأثر من الحادث بالرغم من ان الحادث كان قوى ولكن بفضل الله تعالى لم يحدث للموتور شىء واستلمت العربية من عشرة ايام مع إنها كانت خلصت من شهر 12 2014 ولكن للظروف المالية لم اقدر على إستلامها على الفور فتأخرت فى إستلامها خمسة اشهر المهم العربية كانت بتتصلح فى المنصورة وانا من بورسعيد العربية سافرت بيها للمحلة فور استلامها وفضلت فى المحلة ثلاثة ايام ذهبت اثنائها الى طنطا وغيرت البربريز الأمامى ثم عدت الى بورسعيد والعربية الحمدلله زى الفل ولم ارى أى إختلاف بعد تغيير الزيت علماً بأن هذا الزيت هو تانى غيار بعد التوكيل والعربية عاملة حتى الأن 23 الف كيلو وانا جايبها سنة 2010 ويعنى إستعمالى ليها بسيط ولكن كل إستعمالى لها 90% سفر يعنى فى البلد بحاول اقلل من إستعملها ,,,المهم انا باالنسبة ليا الزيت كويس جداً وكنت غيرت معاه فلتر بنزبن وهو فلتر ماتسوبيشى والراجل الغيرت عنده الزيت والفلتر فى مدينة نصر بعد سوق السيارات وامام شركة السعودية للمفروشات البيحى إعلنها فى التليفزيون يمكن يكون حد عارف محل الزيوت ده على هذا الوصف ,,,وده للأمانه
|
| الساعة الآن 03:05 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017