مصر موتورز مجتمع السيارات - رجاء حد يفيدنى عشان عايز اشترى و خايف

بص حضرتك انا هقولك تجربتي مع البونتو 2001 بكل أمانة ويارب كلامي يكون مفيد ... أنا ف الاول كان معايا دايو نوبيرا 2006 وطبعا مش محتاج أتكلم عن النوبيرا وسحبها والبرستيج بتاعها ... بس لظروف خاصة تم بيع النوبيرا وربنا وفقني ف البونتو وكانت فابريقة كلها بره و جوه وحالتها كويسة جداااا ..
العربية بإختصار فوق الممتازة ... ثبات غير عااااااادي على السرعات وفى الملفات والمنحنيات الصعبة ... حضرتك لو تعرف محور "صفط اللبن" هتعرف إنه مميز بالمنحنيات الحادة والصعبة ... كنت بالنوبيرا بخاف وبمشي بالراحة ف المنحنيات دي ... أقسملك بالله بالبونتو كنت مش بفرمل ولا اى حاجة ... العربية ثبات ما شاء الله عمري ما شوفته - السحب بتاعها معقول ومناسب لموتور 1242 سي سي وكانت 8 صباب ... الأوبشنز اللى فيها جامدة اوووي وفعلا تحس إنك راكب عربية تستاهل فلوسها ... ومش هتكلم عن شياكتها وسهولة تظبيط شكلها..
أقصى سرعة وصلت ليها كانت 145 كيلو وملقتش فرصة أزود عن كده بصراحة وكمان حالة الموتور عليها ملاحظات وكنت خايف حاجة تحصل فيه من القرص..
نتكلم بقى عن العيوب لإن اى عربية ف الدنيا ليها عيوب ... تجميع سرعة بطىء بعد الـ 100 كيلو ... يعني ع الصحراوي هتاخد وقت لحد ما تاخد سرعتك من بعد ال100 وتشد لفوق ... إنما الوصول لـ 100 سريع ومناسب جداااا لقوة الموتور..
بالنسبة لقطع الغيار أسعارها متوسطة ... مش غالية زي الأوبل مثلا .. ولا رخيصة زي الـ 128 ... فى قطع غيار أسعارها عادية جداااا ومش هتحس بمشكلة ... وقطع غيار تانية أسعارها مستفزة وبتكون سبب تردد ناس كتيييير فى شراء البونتو - عندك الكنترول يونيت استيراد ممكن بيعمل بين الـ 2500 و 3000 جنيه ... بوابة انجكشن بالحساسات جديدة بـ 1500 جنيه ولو استيراد تعمل بين 300 و 400 جنيه ... إنما باقي القطع كانت اسعارها عادية ومتخوفش..
العربية اى ميكانيكي بيفهم ف العربيات الأنجكشن الحديثة هيعرف يتعامل معاها عادي خالص ومش محتاجة قدرات خاصة يعني ...
ف النهاية أنا بعت عربيتي البونتو وجبت بعدها "ماروتي" :) :) ... بس والله مش استحملت معاها اسبوعين وبعتها تاني وقررت اجيب بونتو بس موديل أقدم 94 او 95 من حبي للبونتو ..
بالنسبة لموديل 2001 حابب أقولك على 3 مشكلات أكشف عليهم كويس جداااا عشان تتأكد ان العربية كويسة ... أول حاجة اتأكد ان الباور والسيتي باور شغالين كويس ومش بيفصلوا ولا فيهم اى أخطاء - تاني حاجة حساسات بوابة الأنجشكن اللى قولتلك عليها أتأكد ان حالتها كويسة عشان هتقرفك لو محتاجة تتغير .. تالت حاجة بقى اتأكد ان مفتاح الكونتاكت بيفتح وبيقفل مظبوط ومش بيعلق ولا بيقفش ف الكونتاكت عشان المشكلة دي كانت عندي وبعتها على العيب ده ... ومش عاوز اقولك ان المشكلة دي سمعت عنها ارقام وهمية لتصليحها ... عشان كده لو كشفت ع الحاجات دي كويس بجانب الكشف التقليدي ع حالة العربية يبقى إن شاء الله تأكد إنك هتشتري ألمــــــاظة وتتبسط بركوبها طول عمرك ومش هتندم عليها ... بالتوفيق :Wkiss5: