مسرحية سخيفة وشغالة من يوم 28 يناير اسمها الخروج المشرف لمؤسسة الرئاسة
وبصراحة انا مش فاهم يعنى ايه خروج مشرف وهو اللى مرمط بكرامة المصريين التراب
الا لو كان سيادته بيدور على كتب التاريخ والكلام اللى هيتقال فيها وانه مش عايزهم يقولو عليه خرج هارب زى زين العابدين بن على
ونظرا لان شعبنا شعب محترم ومؤدب وصبور فهو صابر على هذه المسرحية السخيفة
ولو كان شعب عصبى زى اخواننا العراقيـين كان زمانه جاب عاليها واطيها وكانو قبضو عليه ومثلو بجثته فى الشارع ......
او قطعوه وعملوه ساندوتشات تـتـوزع فى ميدان التحرير والرغيف ببلاش
ايه السخف ده
بسلامته خارج علينا من ربع ساعة يـتـشـتـحـتـف زى المرة اللى فاتت لانه لقى الشحتــفة بتجـيـب نـتـيجة مع الغلابة دول وبـيـتعاطفو معاه
ونازل تهديد فينا بأنه حقنا لدماء المصريين هيفوض النائب فى اختصاصاته
وبيهددنا من تحت لتحت بكلام مامعناه ان فى ناس مستـنيانا ناكل بعض زى السمك علشان يهجمو على البلد
أيه السخف ده
طيب مهو اصغر عيل فى مصر عارف كده
واحنا كمصريين ومعانا الشباب المحترم اللى فى ميدان التحرير عارفين كده
ومش هيحصل اى قـتـا ل او دماء ان شاء الله الا لو حد من اذناب الحزب الوطنى عمل حاجة من ماركة الجمل والحصان (موقعة التحرير الشهيرة )
و...دى حركة بقت قديمة خلاص ومهروشة
وبالتالى محدش هيفكر ان شاء الله يعملها
ثم يخرج علينا تابعه عمر سليمان بالفصل الثانى للمسرحية
ويعلن تمسكه بالحوار والصلاحيات ويكمل الضحك علينا بأيه قرآنية مهو عارف ان الشعب متدين
وخلاص ياجماعة ارجعو بقى
يالا ....بـيـتك بـيـتـك
تحس انهم بيكلمو اطفال فى تانية ابتدائى
مش بيكلمو شعب عانى الأمرين من حكامه من طائفة العسكر منذ عام 1952
ومع احترامنا للجيش لكن الحكم شىء والعسكرية شىء تانى
فى الجيش بتكلم رتب اقل منك وممكن تفرض عليها رأيك
لكن كحاكم مينفعش تفرض رأيك لان فى شعب ومفروض مجلس شعب بيتابع ويحاسب
لكن هذه المسرحية تعبر عن حاكم لايتـقى الله لا فى بلده كما يدعى ولا فى شعبه
يا ابن .....مبارك .... افهم
ياعم حسنى ......افهم
احنا كشعب مصر او بمعنى أدق اغلبية شعب مصر مش عايزيـنك
والله العظيم مش عايزينك
انتخابات الرئاسة المزعومة حضرها 10 مليون
وهنمشى معاك لحد الأخر
ونصدق ان اللى انتخبوك 8.5 مليون
طيب مهو اللى مش عايزينك دلوقت واللى كان اعلامك بيقول عليهم مش دول اللى بيمثلو مصر
ومش دول كل الشعب المصرى
الى أخر هذا الكلام الفارغ
طيب اهم وصلو 10 مليون
لسه برضه مش بيمثلو الشعب المصرى ؟؟؟؟؟؟
لن يسكت هذا الشعب حتى تلبى مطالبه ولاعودة الى الوراء
خلاص انتهى الدرس يا.....مبارك
يارب تفهم