رد: رابطة ملاك ومحبى السفينه فيات 132
 

والله موضوع الكاوتش ده بيكون راحه نفسيه
انا كنت مركب نوع اسمه مولينيوم مش له مله ولا ماركه بس كان جميل وخطير قعد معايا ف العربية اكتر من 5 سنين و مش اشتكا ولما بدء يظهر عليه التشققات واحط له شنابر رحت جايب الطقم الجديد ده وعلشان رجعت مقاس الكاوتش زي المصنع 185 / 70/ 13 فاشتريت 5 فرد لان المقاس اللي كان راكب 175/70/13

رد: رابطة ملاك ومحبى السفينه فيات 132
 

ربنا يسهل واعرف اخلص العربية الايام دي قبل المطر امبارح اول ما مطرت رحت رايح شاري ريش كاوتش مساحات وركبتها لانها كانت متقطعه عندي ومش ناقصه ان الزجاج يتخربش
وكمان مش عارف اخد اجازات ولا عارف اطلع اعملها عندي ضغطه شغل غير ان مفيش اجازات ف رصيدي
واحتمال ان شغل الميكانيكا والكهربا اخليه يوم الوقفة ان مش عملته خلال الاسبوع ده بس اكيد اليوم ده هيكون زحمه قوي عند الصنايعية والمصنعيه فيه هتكون معاها العيديه
علشان كده مش بحب اصلح واصين في ايام الخميس او وقفات الاعياد بيكون كميه شغل كتير و الواحد مش بياخد راحته والشغل بيتعمل باستعجال ولازم وانت بتدفع المصنعيه انك تعيد على الصنايعية والصبيان علشان تفضل عندهم vip

رد: رابطة ملاك ومحبى السفينه فيات 132
 

عندك حق والله ...
الواحد احيانا بيجيب حاجات ماركات مش شرط كاوتش وبتبقى زى الزفت واحيانا بنجيب حاجات مش منتشرة اوى وبتقعد سنين

رد: رابطة ملاك ومحبى السفينه فيات 132
 

ربنا يعينك على عربيتك وتظبطها على مزاجك
وتبقى فيرارى كده
وياريت نتشرف بمعرفتك قريب

تحياتى

رد: رابطة ملاك ومحبى السفينه فيات 132
 

السلام عليكم إزيك يا أيمن إزيك يا محمد إزيك يا مصطفى إزيك يا أحمد.؟
مجدى باشا عربيتك فيها اه بالظبط عاوز يتعمل فى الميكانيكا ؟؟
كل سنة ونتوا طيبين جميعا

رد: رابطة ملاك ومحبى السفينه فيات 132
 

العربية من ناحيه الحاله مش محتاجه حاجه دلوقت كل محتاجاه اظبط تاكيهات و استهلاك البنزين في داخل البلد 6 كيلو في اللتر تقريبا وفي الخارج طريق السفر 12 كيلو في اللتر
وعاوز اغير صلايب الكردان
ده اللي شايف انها محتاجاه ف الميكانيكا
الباقي بقى المستعجل قوي هو لحام كراسي الصالون و لحد دلوقت دماغي بتوزني مدام هفك الصالون علشان الحم كراسي الصالون ما اكمل فك واشد العربية بالمره واعملها صح الصح بدل ما الدوكو بتاع المره اللي فاتت قافل نفسي منها واللي حايشني عن اني اعمل ده هو اني مشغول او بمعنى اصح مطحون في الشغل و كمان المنطقة حواليا كلها مباني وعربيات رمل وزلط وطوب وطرطشه اسمنت فخايف اظبط العربية تيجي زلطه او طوبة و تبوظ حاجه

العربية كعربية مش محتاجه الا بس ظبط تاكيهات علشان الشتا وانا عاوز اغير صلايب الكردان علشان بسمع صوت لما باجي اطلع بالعربية ومش بيتكرر كتير لكن ساعات بيحصل فلما سئلت قالوا لي الصلايب مع اني مشحمها من قريب
والكارونه ومغيرها فاكيد المشكله ف الصلايب علشان مش عغيرتها من زمان


ربنا يعدي الايام دي على خير

وخصوصا اني النهارده الصبح يومي بدء بخناقة
تحت البيت عندي في مطعم فامبارح بليل ركنت قدامه عشان فيه برج بيصبوا ادوار فيه ( صبه اسمنت ) بيجهزوا ليها بقى رمل وزلط فقولت بدل ما اركن عند مكان الصبه والشارع اصلا ضاق من الرمل والزلط اركن عند المحل والصبح انا بنزل بدري اروح الشغل
نزلت الساعه 8 الاقي عربيتي مزقوقة ومحطوطه ف نص الشارع
كان هاين عليا امسك اولع ف المحل ولما قولت له ايه اللي عملته ده قال لي علشان افرش عده الشغل وطاسه القليه

فلك ان تتخيل تنزل تصطبح بحاجه زي كده
وخصوصا ان العربية بوضعها ده قافله الشارع وفي ع البر التاني اكوام زلط و رمل والشارع اتجاهين و بيعدي فيه تريلات
فطبعا مش ههزق نفسي مع عامل و كلمت صاحب المطعم وطلعت غلطه العامل انه اتصرف من نفسة وهو اللي كان بيقول لي ان صاحب المطعم هو اللي زقها

حاجه تقرف والله

الصورة دي للعربية مزقوقه وشوف طالعه عن الشارع قد ايه وكمان شوف كميه التراب اللي عليها دي عربيه كنت منضفها يوم الجمعه دي
http://imageshack.us/a/img809/4252/22102012906.jpg

رد: رابطة ملاك ومحبى السفينه فيات 132
 

طب ما انا عاوز الحم الحاجه اللي ممكن اقدر اجيبها واكون محتاجها قبل ما افك العربية لاني مش من القاهره انا من الزقازيق و علشان اشوف موضوع العزل والكام حاجه اللي عاوزهم دول معظم المشواير ف القاهره وطبعا لما اجيب هتكون شيله وهكون محتاج العربية معايا