مصر موتورز مجتمع السيارات - صيانة اكسيل مانيوال 1500 cc

بعد ما قرأت موضوع حضرتك عندي بعض ملاحظات:
حضرتك في الأول في وسط الكلام قلت إنك راحت مشوار بالعربية ورجعت قست الزيت. مش عارف حضرتك تقصد إيه، يعني حضرتك بطلت العربية وقست الزيت، طبعا لو حضرتك عملت كدة الزيت هيطلع معاك ناقص لأن الزيت بيبقى لسة ما رقدش وبالتالي هيديك مقاس غلط، المفروض إنك تصبر على المكنة لحد لما تبرد والزيت يرقد تحت عشان تاخد مقاس صح، وبالتالي فحضرتك ممكن تكون قست الزيت والمكنة سخنة اداك مقاس ناقص رحت مزود زيت، طبعا بعد كدة لما المكنة بردة اداك مقاس زايد.
الحاجة الثانية إنك لو حليت الموتور ولقيته محتاج عمرة وقررت تجيب استيراد مش هيبقى في أي مشكلة من ناحية الموتور المفكوك؛ لأنه ببساطة هيتحول لقطع غيار للموتور الجديد، يعني ببساطة هتخلي الميكانيكي يجهزه ليك للتخزين لحد لما تحتاج أي حاجة منه.
الحاجة الثالثة بالنسبة لو جبت موتور استيراد فالموتور القديم عندك مش كله هيتباع كويس، إلا هيتباع كويس كماليات الموتور، زي الكاربيراتير والاسبيراتير والدينامو والمارش والفتيس، أما باقي الموتور وخاصة البلوك والبساتم وعمود الكرنك ففي الغالب يإما حضرتك هتسيبهم عندك يمكن تحتاج منهم حاجة في المستقبل ياإما هتبيعهم لبتوع الخردة.
أما بالنسبة للموتور الاستيراد فهو طبعا أحسن من العمرة الكاملة لأسباب كثير:
1- إنه بيركب بسهولة ويسر في ليلة واحدة بدون غلبة ومن غير وقت يضيع في التليين وعند الخراط والميكانيكي.
2- إنه ماتور استاندرد يعني كل حاجة فيه أصلية، أما قطع الغيار بتاعة اليومين دول فكثير منها مضروب، وحتى لو أصلي مش بيبقى في نفس جودة الحاجة الاستاندرد.
3- كماليات الماتور الاستيراد بس بتبقى بثمن الموتور كله، يعني أنا جبت لعربيتي المازدا 23 موتور استيراد من حوالي اسبوعين ب1500 جنيه، الموتور ده بالفتيس الفتيس لوحده ب500 جنيه، وفيه اسبيراتير الكتروني بيعمل حوالي 500 جنيه، والكاربيراتير بيعمل 300 جنيه والمارش والدينامو بيعملوا 300، يعني الكماليات بس عدت ثمن الموتور، وده طبعا بيخليك ممكن مع شوية صبر تبيع الحاجات دي وتجمع ثمن الموتور تاني، أو تسيبهم معاك احتياطي وبالتالي هتقعد سنين مش هتحتاج حاجة لعربيتك، وده أفضل.
ناهيك عن إن معظم الميكانيكية اليومين دول معدومي الضمير، والعمرة بيطلع فيها أخطاء ومشاكل.
لكن عموما ريح دماغك قدامك حلين:
معاك فلوسك الحمد لله وجاهز، يبقى تفك الموتور وتشوف الدنيا فيها إيه، لو العملية شنبر بس يبقى الحمد لله ظبط مكنتك واعرف هي خارطة قبل كدة ولا لأ، وبلاها موتور استيراد.
ولو طلع إن المكنة عايزة خرط وعمرة كاملة سيب الموتور ده قطع غيار وهات واحد استيراد.
والحل الثاني لو الفلوس مش جاهزة يبقى ريح دماغك وامشي بعربيتك واهتم بمقاس الزيت بتاعك كل يوم الصبح، وحاول دائما تخلي الموتور نظيف تماما ، يعني ما يبقاش في تنشيع زيت من أي مكان.
أما بالنسبة لصوت الفتيس عند حضرتك فأنا مش شايف إنه مشكلة كبيرة يعني، امشي بيه على حالته دي لحد لما ربنا يحلها وتفك الموتور ابق ظبط الفتيس مع الموتور، وإن كانت مشكلة الفتيس دي مع الدبرياج بتخليني أرجح لحضرتك موتور استيراد بفتيسه وريح دماغك من وجع واشتغالات الصنايعية،
ربنا يوفقك