|
رد: أدب الرحلات
اقتباس:
انا مرة كنت راجع من بورسعيد ومالقيتش اتوبيس فرحت ركبت بيجو المهم قعدتى جت وراء السواق وواحد قاعد جنبى وست تخينة قاعدة جامبة لقيتها اول لما البيجو اتحرك قالت للسواق انا عايزة سندوتشات السواق طلع محترم رغم اننا واقفين ساعة ماعبال ما جمعنا الركاب والمطعم على بعد 10متر المهم نزلت جابت سندوتشات اموت واعرف نوعها اية الريحة بتعتها قلبت ريحة العربية و قلبت معدتى وكنت خلاص على اخرى اكلت قالت للسواق عايزة مياة السواق اداها مياة المهم ريحت راسى على الباب وقولت يمكن انام لقيتها بتقول للى جمبى انزاح شوية قلها مفيش مكان قلتلة زق اللى جنبك اللى هو انا طبعا انا سكت وهو طبعا مزقش المهم شوية لقيتها بتزق فية فضلت على كدة لغاية اسكندرية وانا نفسى اولع فى السمكرىاللى حوجنى للمواصلات المهم الاسبوع اللى بعدية بردة راجع من بورسعيد والاقيلك البيجو واقف مستنى نفرين السواق قالى اسكندرية قولتلة ماشى وبعد ماحطيت الشنطة جى اركب الاقيها فى نفس المكان المهم نزلت من العربية وقولت للسواق مش مسافر معاك انا مستنى اللى بعديك يا اما تنزل الست اللى فى العربية دى والساعة كانت 2 بعد منتصف الليل يعن تنسى انى امشى من بورسعيد قبل الصبح المهم نزلت شنطتى وقولت اروح اشرب قهوة المهم لقيت السواق والركاب جيين وبيقولى فية اية المهم حكتلهم اللى حصل المرة اللى فاتت المهم السواق قالى لا تعالى ولو اتكلمت انا حتصرف معاها لسة بنتحرك لقيتها بتقول للسواق انا عايزة سندوتشات المهم السواق قالها لا شوية بتقول للى جمبى انزاح السواق راح قالها مش عاجبك انزلى كل لما تفتح بقها السواق يشتمها بصراحة شفى غليلى منها والحممد لله استلمت العربية بعديها |
اقتباس:
والله ده لو ابويا كنت زقيته والقطر جايب اعلي سرعه عنده وبعدين ايه كورزير ده انتا بتكلم حشاش ما تقول احمد وخلاص ههههههههههههههههههههههههه هههههههههههههه والله يا عم خالد انا مش عارف ايه اللي خلاك تستحمل واحد زي ده تنح ربنا يصبرك كمان وكمان اقتباس:
هتلاقيها مدسوسه عليك ديه يا ابو حميد شوف انتي عملت مقلب في مين في الفترة ديه هتلاقيه هو اللي بعتهالك |
رد: أدب الرحلات
من اجمل الشخصيات اللى اتعرفت بيها خلال سفرياتى
الحاج / محمد القط رحمة الله عليه و ده كان رئيس منطقة بالسكة الحديد ودى مش عارف معناها بصراحة وغالبا خط القاهرة/اسكندرية ( منطقة) والقاهرة /اسيوط (منطقة) والقاهرة/ بورسعيد منطقة وهكذا طيب انا اتعرفت بيه ازاى فى يوم كنت مسافر قنا وهو كان رئيس القطار وكان القطار فاضى المهم انا نمت وصحيت من النوم على ريحة دخان سيجارة وطبعا نظرا لانه ممنوع داخل القطار ونظرا لانى فاهم قوانين السكة الحديد فمكلمتش الراكب وروحت لرئيس القطار اللى هو الحاج / محمد والراجل طلع فى منتهى الحكمة لان مفيش حد فى العربية غيرى انا والشخص ده فكلمه بمنتهى الأدب وقال له/ بعد اذنك كده غلط خلص السيجارة ومتولعش غيرها داخل العربيات المكيفة وللحقيقة الراكب اعتذر وقال انا اسف بس انا مشفتش غيرى فى العربية فدخنت لكن الاستاذ كان نايم ومشفتوش فانا اتغظت لكن فوجئت بيه بيقوللى / تعالى واخدنى عنده فى الدرجة الأولى وكنت انا حاجز تانية وعزمنى على الشاى وقال اصل القطار فاضى هنعمل مشكلة ليه اهو يخلص سيجارته ومش هيولعها تانى وانت نازل فين فقلت قنا قال /انا هنزل اسيوط وهوصى عليك الريس اللى بعدى ميحاسبكش على فرق واتكلمنا فى حاجات كتير وبقينا اصدقاء وادانى رقم تليفون البيت لان الموبايل مكانش انتشر اوى وبقينا اصدقاء رغم فارق السن اللى بيننا اللى تقريبا كان فى حدود20 سنة او اكتر حاجة بسيطة وللحقيقة كان دايما بيوحشنى وانزل محطة مصر ادور عليه واسيب له السلام وكتير م كنتش الاقى حجز واروح له فكان يروح معايا لرئيس القطار اللى انا مسافر فيه ويقول له الراجل ده قريبى شوف له كرسى ومتحاسبوش وكنا دايما نود بعض وكان يقول لى انا عندى كذا(يعنى القطار رقم كذا) وكنا نتفق ونتقابل ومرة ادانى جدوله لمدة شهر لانهم بيطلعو بجداول يعنى مش كل يوم بيركب نفس القطار يعنى النهاردة فى اسكندرية /بكرة اسيوط بعد بورسعيد وهكذا والراجل ده كان محبوب جدا وكنت كل م اجيب سيرته ادام اى حد من زملائه كان يشكر فيه جدا وف يوم الحاج محمد مختفى سالت عليه كذا مرة فقالو هو تعبان شوية وكان عندى كام سفرية واتاخرت اسبوع واتصلت بيه على الموبايل (كان اشترى موبايل واتصل بيا على الموبايل وادانى نمرته) ردت واحدة شابه عليا فعرفت انها بنته فبقول لها ادين الحاج محمد اكلمه واسلم عليه وكانت الصاعقة قالت بابا مات النهاردة الصبح ولسه جايين من الدفن دلوقت عزيتها لكن احساسى انى قصرت فى حقه ومزرتوش كان تاعبنى جدا لكن هكذا الدنيا كلنا فيها راكبين قطار واللى بتيجى محطته بينزل لكن تبقى الذكريات الجميلة مع الشخصيات المحترمة الله يرحمك ياحاج محمد اللهم آمين |
رد: أدب الرحلات
الله يرحمه ويرحم امه المسلمين
|
رد: أدب الرحلات
تانى الشخصيات المحترمة اللى قابلتها فى سفرياتى
عم / منصور الله يرحمه كان صراف تذاكر للقطارات المكيفة فى محطة طنطا وطان يخدم جميع الركاب بلا اسثناء يحسسك انهم كلهم قرايبه او معارفه وخصوصا اللى بيركبو كل يوم زى حالاتى واذكر كان ميلاقيش تذاكر فيقول سيبلى الاشتراك واسيبه واروح اشوف ششغلى وارجع الاقيه قاطع لى تذكرة ومش انا لوحدى لا ابص الاقى جنبه كوم اشتراكات حاجز لهم تذاكر وبلا اى مقابل واذكر مرة كنا داخلين على عيد وخالى عايز تذكرة وطبعا فى الاعياد التذاكر بتتحجز بالنسبة للصعيد لمدة تزيد احيانا على ال25 يوم و ده طبعا غلط فى المنظومة لان المفروض ان الحجز لو زاد عن اسبوع بيطلع خطوط جديد ة ( لكن تقول ايه عهد منصور شيفروليه الاسود) وروحت محطة القاهرة وطبعا هناك عارفيننى من كتر السفر وقالولى بالحرف دلوقت فى ضرب نار على الشبابيك ومش هنعرف نتصرف اقطع التذاكر اللى انت عايزها من اى محطة فقلت انا رايح طنطا فقالو ينفع وفعلا نزلت طنطا وروحت لعم منصور والراجل مشكور خلص شغله وفتح جميع الخطوط وقال قطار الساعة كذا فيه كرسيين اولى وقطار الساعة كذا فى كرسى تانيه وقطار الساعة كذا فى كرسى اولى وكلمت خالى بالموبايل وفوجئنا احنا ال2 بخالى مش عاجبه القطار ده ولاعاجباه اولى فى القطار ده ويرجع يستشير خالى التانى كل ده واحنا على الموبايل وانا اتحرجت جدا من عم منصور لانى متخيلتش ان فى الزحمة دى وضرب النار اللى شغال على شبايبك قبلى فى القاهرة وخالى بينقى وبعتذر لعم منصور فرد بابتسامة لذيذة وقال ياعم ولايهمك هما الصعايدة بيحبو ينقو ياعم ميهمكش ادينا معاك لحد م تحجز له ولم يشعرنى انه متضايق او زعلان بالعكس كان واقف مستنى المداولات لما تخلص واخيرا خالى اختار والحمد لله جبت له تذكرة وبدى عم منصور ثمن التذاكر بالزيادة رفض وقال عيب ياراجل ميصحش انت اخويا الصغير وفى يوم بسال عليه فزمايله ردو عليا بكل تاثر / عمك منصور اتوفى من اسبوع وقالو سبحان الله جنازته كانت شبه مظاهرة شعبية ناس كتير جاية تعزى فيه وشفنا فى العزا بتاعه ركاب كانت بتركب كل يوم سبحان الله الانسان بيموت وتفضل السيرة الحسنة وصدق الله العظيم حين قال (فأما الزبد فيذهب جفاء واما ماينفع الناس فيمكث فى الأرض ) الله يرحمك ياعم منصور |
رد: أدب الرحلات
من الشخصيات الجميلة
شخص لذيذ اسمه السيد بس كنا بنناديله سيد سيد ده راجل ماسح احذية امام محطة طنطا تخرج من باب المحطة الامامى تلقاه جنب بتاع الجرايد (موجود لحد دلوقت) وكان احسن واحد يلمع لى الجزمة واتعرفنا ببعض وبقينا أصحاب وعرفت انه من بلد تبعد عن طنطا 15 كيلو اسمها محلة روح بييجى منها بالقطار يوميا ومن المفارقات الغريبة انى مهما غبت عن طنطا مكنتش المعها الا عنده وتجيله وحشة وشكلها سىء يقول ايه ده يابيه انت جاى بيها من الصحرا وارد عليه واقول لا بس هيا متلمعتش من اخر مرة انت لمعتها وكنا نضحك جدا ونهرج لحد ميخلص تلميع لحد م ربنا اكرمنى بالنيسان وركنتها ادام المحطة ودخلت له وهو شافنى نازل منها ولقيته اتغير اول م روحت له وقف على حيله وازيك ياباشا والمعامله متغيره مبقاش فيه التهريج بتاع زمان ايه يابو السيد مالك يقول مفيش ياباشا انا / لا و الله فى ايه ياعم العيال فيهم حاجة يقول لا ياباشا ربنا يخليك لينا يخرب عقلك ياسيد يابنى ايه المعاملة الناشفة دى انت زعلان منى ف حاجة يقول استغفر الله ياباشا وانا اندهشت (استغفر الله!!!!!!) غريبة لكن بعد الجملة دى فهمت ان العربية خلته اتغير وحس ان فى حيطة بينى وبينه تانى مرة نفس المعاملة فسالته يابنى فى حاجة فقال العفو ياباشا هيا العين تعلى على الحاجب عين ايه وحاجب ايه نزلت من على الدكة وقعدت جنبه على الرصيف ولسه هكلمه ولقيته قا م واتنفض وقال / العفو ياباشا والله لانت قايم قاعد فوق يخرب عقلك يافقرى كل ده علشان العربية ؟؟؟ ومشيت من ادامه لكن كانت اول مرة ازعل من العربية اوى لانها عملت حيطة بينى وبين شخص مكافح بياكل بشرف رغم انى كنت زعلان منه علشان بيدخن وحواليه شوية عيال حرافيش مصاحبهم واخلاقهم مش كويسة وكان يقول فارشين جنبى مش معقول هقاطعهم وبالمثل شاب لذيذ اسمه اعتقد احمد او محمود و ده ماسك بارك فى ميدان الساعة فى طنطا كنت لما احب اريح من الشغل اركن العربية بعيد واروح اقعد معاه على الرصيف نشرب شاى ونهزر لحد فى يوم مكنتش لاقى ركنة واضطريت اروح له فى الاول مجاتش معاه فقال ايه ده انت اشتغلت سواق ؟؟ فقلت لا دى بتاعتى ولقيت وشه جاب جميع الالوان وقال انا اسف ياباشا فانا اتغظت وركنتها وقلت له فين الشاى فقال عينى ياباشا وجاب الشاى ليا لوحدى فقلت وانت ؟ فقال عيب ياباشا شخطت فيه / عيب ايه روح ياعم هات الشاى وهيجيب كرسى قلت له / لا حط الصينيه ع الرصيف زى زمان فقال ميصحش ياباشا فقلت / متسيبك من حكاية باشا اللى قلتهالى 95 مرة من ساعة مشفتنى فقال / ايه ده ياباشا انت عديتهم ؟؟؟ تااااااانى باشا لكن شربت الشاى ومنطقش ولاكلمة الله يخرب بيتك يامبارك ياللى رجعت الطبقية تانى وحسست ناس انهم اقل من غيرهم رغم ان النبى قال لافضل لعربى على اعجمى الا بالتقوى و ربنا قال ان اكرمكم عند الله اتقاكم صدق الله العظيم مش اغناكم |
رد: أدب الرحلات
دى حكاية لذيذة اختم بيها النهارد احسن حاسس انى نكدت عليكو
مرة مسافر اسكندرية فى قطار رقم 27 وده قطار عادى بيسموه اكسبريس الغلابة لانه سريع جدا ساعتين ونص سيدى جابر المهم يومها ده مكانش فيه جرار فى عهد منصورشيفروليه السعيد علينا جميعا وجابو له جرار كحيان وكنا بنتريق عليه وانا شخصيا قلت اكيد الجرار ده ماشى بحجرين قلم من الصينى ياريت حتى ماشى بماركة عدلة وطبعا كان الجو حر نااااااار وكالعادة واخد معايا زجاجات المية المجمدة فى الفريزر من قبلها بيوم ويومها كنت مزود شوية وجايب زجاجة فيها ميه مش مجمدة علشان نزود بيها وكل متخلص نملاها ونزود وهكذا والحقيقة يومها كان ربنا مبارك فيها والقطار كله تقريبا شرب وارتوى المهم القطار ده معاده الرسمى فى طنطا الساعة 4:35 لكن وصل الساعة حوالى 7 المهم بعد م خلص موال المية الساقعة ولميت الزجاجات الفاضيه حطيتها ف شنطتى فوجئت باللى كان قاعد جنبى بيقول / اخوك الدكتور فلان بكالوريوس علوم وماجستير ودكتوراة من كلية العلوم جامعة اسيوط فقلت له / اهلا بيك وانا اخوك خالد خريج حقوق و تاجر عطور وبدل م يتكلم فى اى حاجة ملقاش حاجة غير محافظة اسيوط واخواننا فى بحرى بيعتقدو ان الصعيد ده كيان منعزل عنهم فلما تركب القطار او الميكروباس على اى بلد فى بحرى بيتكلمو على الصعايدة وهما مش متخيلين ابدااااااااااااااااا ولو بنسبة 1% انه ممكن يكون فى صعيدى بيسمعهم وقعد يتكلم على محافظة اسيوط وان اهلها مش عارف ايه اون دى بلد جميلة ساكن فيها ناس وحشين وان........ وان .......... وان................. واسترسل واسهب (يعنى بالغ وزود) فى الشرح عن صفات محافظة اسيوط السيئة فقلت له باسلوب عادى وطبيعى جدا / وانت تعرف اسيوط واهلها منين فقال بلهجة واثقة / لاااااااااااااااا اسألنى انا عنهم انت متعرفوهمش دول ناس غجر انا عشت وسطيهم سنتين فقلت وكنت ساكن فين هناك فمأخدش باله من السؤال لان معناها انى عارفها فقال انا ياعم كنت بركب القطار من دمنهور اوصل القاهرة واخد القطار التانى اوصل الصبح اشوف محاضراتى واخلع وكنت بعمل الحكاية دى مرة كل اسبوعين فانا قلت بمنتهى الهدوء /يعنى انت كنت بتقعد فيها ساعتين او 3 او 4 كل اسبوعين وجبت عنهم كل المعلومات دى فقال لا طبعا الكدب خيبة كلها حكايات كنت بسمعها منهم هناك ( و دى عادة سيئة مشهور عندنا فى اسيوط يعنى هما اللى بيطلعو على نفسهم انهم بخلاء وجلدة وحاجات كده حتى من الامثال القميئة (السيئة) اللى كنت بسمعها يقولو قرد واسيوطى خربو مدينة ولما اسمع هذا المثل الا من ابناء المحافظة نفسهم) المهم فوجئت بيه بيقول لى / على فكرة يااستاذ خالد حضرتك راجل محترم جدا وموقف المية ده بصراحة اول مرة اشوفه ده كل اللى معاه زجاجة ميه مخبيها هو حضرتك منين فأنا ضحكت وسكتت قال لاو الله لتقول فقلت له / من اسيوط وفوجئت بيه وشه اسود واحمر واخضر وقال انا اسف مكنتش اعرف فانا قلت له حتى لو متعرفش فانت بتقول الحق اللى انت شايفه المهم الراجل بعد م كان فتح معايا فى الكلام جاتله سكتة كلامية وخرج وشه بره الشباك واول م جات محطة دمنهور نزل جرى من غير سلام عليكم المضحك بقى انه نزل من هنا ولقيت اكتر من 25 واحد كلهم من اسيوط وكلهم اجمعو على انهم كانو هيفترسوه ويرموه من القطار لولا انهم سكتو احتراما ليا علشان موقف المية الساقعة اللى عملته معاهم ومع غيرهم من الركاب وانا قلت ف عقل بالى يانهار اسود يعنى كانو هيرتكبو جريمة وربنا ستر والقطار متأخر خلقة يعنى مكناش هنوصل النهارة او كنا هنوصل من المحطة على الحبس عدل (بكسر العين والدال ) |
| الساعة الآن 12:41 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017