المشاركة الأصلية كتبت بواسطة eljazeera77 (المشاركة 895057)

كويس كلام جميل
والله انا لا اؤيد الرئيس كشخص انما انا اؤيد القواعد الشرعيه الى ييجى بيها او يمشى بيها الرئيس حفاظا على البلاد مش على مرسى او غيره بس الاخوه الطرف التانى مش عايزين يفهموا وجهه النظر دى لو اتعملت انتخابات قادمه بس تكون دستوريه مش اخلع يا جدع وبعدين قلولى مين البديل يقولولك يبقا نشيله وبعدين ربنا يحلها وقتها لو فالانتخابات الجايه والله والله ما هنتخب مرسى لو اترشح تانى مش هنتخبه لكن يكمل الفتره بتاعته علشان الى بعده يكمل فترته برضو ومحدش يعمل بلبله يا جماعه البلد محتاجه استقرار هو ده بيت اتلقصيد مش اصل انتا اخوان وكلام كده يعنى بيخليك متأكد ان البلد دى رايحه للهاويه من فكر بعض الى فيها
وما دام الناس المعارضين وبتوع تمرد اغلبيه كده وعندهم القدره على جمع الملايين ما الانتخابات جايه وشكلوا حكومه بس افتكروا المشاكل الى البلد فيها هتتحل ولا لا

المشاركة الأصلية كتبت بواسطة tham1010 (المشاركة 895054)

انت قلت بلسانك. البنزين بيتباع فى السوق السوداء والناس لا تجده فى البنزينة. ودى غلطة مين. اقول لك انا دى غلطة رئيس ضعيف لا يستطيع ان يضرب بيد من حديد على كل مخالف ويستخدم القانون ويطبقه على الكل. رئيس لو تركناه فى موقعه هيخربها ويقعد على تلها.

ولا تقول لى ان الشعب هو اللى مش عندة ضمير وبيتاجر بكل حاجة، لانى هرد واقول لك فى علم الاجتماع فى مقوله بتقول ان الضمير يتكون بقوه القانون فى الجيل الاول وبعد تكوين الضمير والاخلاق والقيم فى النفس يتم نقلها للاجيال التالية بالنقل والتشرب. نحن فى مرحلة عدم تكوين ضمير واخلاق إنسانية غير لائقة ولهذا نحتاج لقانون يسجن ويعدم كل مخالف ومتاجر ومتلاعب سواء كان من الاخوان او غيرهم بدون محاباه. وعندما يتعلم الانسان المصرى الصح خوفا من القانون سوف تنصلح الاحوال وهتفكر الست اللى بتبيع البنزين بزيادة عشرة جنية للصفيحة الف مليون مرة قبل ما تتاجر فى البنزين لان العقوبة ستطبق عليها لا محالة وستكون قاسية. هذه هى بلد القانون، لكل مخطأ عقاب حاسم وسريع. هذا سيجعل الحرامى يبقى حاطط ايده على قلبه وهو طالع يسرق مش زى الان يبقى واقف عينى عينك فى الشارع وماسك حته سنجة ولما يلاقيك باصص له يفتح حنجرته عليك ويقول لك " ايه ليك شوق فى حاجة".

لا تتبع شعارات الاخوان التى تقول اننا أتينا لنرسخ الاخلاق وشغل الوعظ اللى بيحصل فى المساجد والكنائيس لان هذا لا ينفع مع بعض البشر الذين عندما وجدوا القط غائب بدأوا يلعبون فى الحرام وبالمخالفة...

اقول لك حاجة، طبعا انت عارف ان الحكومة بتقطع الكهرباء عن كل منطقة ساعة او اكثر كل يوم لتوفير الكهرباء. واحد جنبا عنده سوبر ماركت كبير فكر يعمل ايه. راح جايب كهربائى ووصل توصيلة من الشارع العمومى وبقى عندة توصيلتين للمحل واحدة من شارع جانبى والثانية من شارع تانى. وبهذا لا ينقطع النور عنه نهائيا. هل فى حاجة كدة؟ أصل لو فى قانون ومتابعة كان فى تانى يوم واحد من شرطة الكهرباء لاحظ الواصلة اللى ماشية حالى 4 متر عينى يعنك فى نص الشارع.

واحد تانى بنى 2 طابق مخالف وعمل بروز مخالف ووصل الكهرباء وكله بالرشاوى والمعارف. يا أخى لو بقى الحال هكذا فسوف تقول فى يوم من الايام أن ايام المخلوع كانت افضل مائة مرة من هذا الحكم الضعيف. الحاكم لا يجب ان يكون راجل بتاع ربنا ولكن راجل فهلوى مدير يعرف يشغلها صح علشان تحس ان فى تقدم وتحسن.

أيام مبارك كان كل يوم الشارع يتكنس وكان يجى الملاحظ بالعجلة يشوف الزبال كنس كويس ولا لا وكان رئيس الحى يمر بالعربية والشارع اللى مش نظيف كان الملاحظ يتشد فيها. دلوقتى الشارع بيتكنس كل كام يوم مرة ولو اتكنس الزبال اللى بيشيل فى العربية مش بيجى وتفضل متكومة لحد ما الراجل يجى. الشارع اللى ساكن فيه أصبح كله حفر ونفقر وفحر وتراب لدرجة ان الاسفلت مش بقى موجود ولا باين منه إلا القليل والعربيات كل شوية ترزع فى الشارع وتبقى نايم وتتفزع كل شوية على خبط ورزع العربيات اللى بتاخد المطبات فى الظلمة لان الحكومة بقت تطفى الشارع علشان توفر فى النور. ويا سلام لو العربية محملة حديد ولا تكون قديمة. تسمع صوت ولا نفير يوم القيامة. يعنى حتى النوم الهادئ مرسى حرمنا منه بخبته. الشارع دة يبعد عن مبنى المحافظة 30 متر وهو شارع عمومى عرضة 20 متر وفيه محلات ومبانى حكومية هامة وكان بيتكنس كل يوم والشجر يدهن بالابيض ويترصف مرتين فى السنة ويترش ماية فى الاعياد.

هتقول لى دة مش ذنب مرسى اصل اللى معاه مش بيساعدوة ولسة فى اذيال النظام السابق فى كل المصالح . هقول لك هذا فى حد ذاته سبب لخلع هذا المهزوز. طالما مش عارف يدورها صح يبقى يسبها لغيره حتى ولو غيرة اسؤ منه فى نظرك. المدير الناجح يطوى الكل تحت جناحة ويخلى الكل يشتغل تحت اوامره لانك يا مدير مش هتعرف تجيب ناس على مزاجك علشان تنجح. لازم تنجح بالموجود. مش معقوله نجيب الاخوان فى كل مصلحة زى ما هو حاصل الان علشان ينفذوا تعليمات الرئيس لان ممكن بكرة ينجح رئيس اخر وهو كمان يشيل الاخوان ويجيب الطقم بتاعة ويرشه فى كل مصلحة ووزارة ووحدة محلية. هذا ليس اسلوب عمل. الرئيس الحق هو من يجعل الكل يعمل بكامل طاقته حتى لو كان العامل من اعداءه. كله بالقانون والمتابعة. ولمن مرسى لا عارف يشتغل بالقانون ولا عارف يعمل متابعة وزى المسجون فى قصر وشايل شيله مش شيلته..

ومرة ثانية تمرد لا تطالب بخلع الرئيس زى ما حصل مع مبارك، تمرد تطلب بإجراء إنتخابات رئاسية مبكرة بحيث نجيب رئيس جديد بطريقة ديمقراطية وبالصندوق زى ما انتم يا مؤيدى الرئيس تريدون. الامر ليس بالقوة إذا ولكن بالديمقراطية. وابقوا يا مؤيدى الرئيس انتخبوه مرة ثانية فى هذه الانتخابات طالما هو حلو كدة وبتاع إنجازات