رد: اختبار قياده و ملاحظات على النيوسيراتو أول 700كم
 

السلام عليكم.
احب اعرفكم بنفسى انا شادى مهندس,وحقيقى استفدت جدا من كلام حضرتك عن العربية.لانى انا فعلا محتارانى انا اشترى العربية ولا لأ بعد اللى قرأته على النت,خاصة ان فى عربية تانيه داخلة دماغى وهى السيات ليون,فحقيقى لسه محتار لكن بدأت اميل للسيراتو بعد كلام حضرتك بس انا قلقت شوية بالنسبة لموضوع الصاج الخفيف.

رد: اختبار قياده و ملاحظات على النيوسيراتو أول 700كم
 

شكرا يادكتور على التقرير الهايل ولو إنى أول مره أشوفه النهارده للأسف وقرأته كله من أول مشاركه، ألف مبروك وربنا يكفيك شرها، أنا والحمد لله كنت حأحجز عربيه زيها بالضبط ولكن للصدفه الشديده وجدت فى منتدى أخر كلام عن تخفيض سعر الكورولا بواقى 2009 بقى سعر العربيه الكامله 131900جم بدلا من 146900 وده كان يوم خميس وماأكدبش عليك يوم السبت الصبح رحت تويوتا التجمع الخامس وده كان الوحيد إللى فاتح وطلبت عمل تست دريف والناس ماكدبتش خبر يمكن لما لقونى جاد فى الشراء وسنى مش بتاع واحد داخل يهزر، المهم نتيجة قراءاتى إللى درست فيها الفتيس MMT وطريقة سواقته قررت أشتريها وإديت لهم ثمن العربيه مع إن السيراتو كان شكلها وألوانها مزغلله عينيا بس مش عارف التويوتا كانت هدف ليا من أول مره قريت عنها فى مجلة تان تان سنة 1974!!!
مش حأطول عليك الكماليات إللى حضرتك بتقول عليها دى أنا حاسس إنك بتتكلم عن عربيتى الكورولا وده يمكن إللى مخلى إسم السيراتو فى أمريكا KC أى كوريان كورولا
أنصح حضرتك تجرب ملئ العجل بالنيتروجين وتكلفة الفرده 5جم أنا مجربه فى عربية زوجتى الأفيو والفرق فى الصوت عند المطبات وعيون القط متلاحظ
ألف مبروك وترجع مصر بألف سلامه إنشاء الله

رد: اختبار قياده و ملاحظات على النيوسيراتو أول 700كم
 

شكرآ لك واختيارك موفق للتويوتا طالما ثمنها لم يؤثر على الميزانيه العامه للمنزل !

بالنسبه للسيراتو رغم انى لم أركبها كثيرآ بس أنا عارف ان فيه أحسن منها كتير و فيها حاجات برده

كتير مش عاجبانى ! بس أنا مش متعود أتردد كثير و لو حبيت حاجه بأحبها و لو حصلت عليها بأحمد ربنا

وأنا قلت العيوب اللى شفتها لغاية دلوقت و لم أكن أمدح فيها بعيون المحب ! بس ممكن مع الآيام نشوف

عيوب أكثر و برده ح نقولها ! بس اللى أنا مندهش له ان معظم الناس اللى ذمت فى السياره لم تكن صادقه !

أخيرآ ممكن تقول لى فين أقرب مكان لمصر الجديده بيملآ هيدروجين ؟؟؟؟

Dr. Bolbolan ptmnlo123per122

رد: اختبار قياده و ملاحظات على النيوسيراتو أول 700كم
 

أهلا وسهلا بك يا باشمهندس ! حكاية صاج خفيف أو تقيل دى أصبحت موضه قديمة !

يعنى تخانة الصاج مش ح تحمى من الحوادث ! بالعكس يقال ان الصاج التخين بيسبب فى وصول قوة الصدمه

بكاملها الى الركاب و كمان ممكن يؤذيهم هوه نفسه ! الرك دلوقت على تكنولوجيا امتصاص الصدمات و طرق

التداخل التلسكوبى لآجزاء السياره فى بعضها أثناء الحادث لامتصاص الصدمات ! و كمان تصميم الكابينه و قدرتها

على حماية الركاب ! عمومآ السيراتو واخده 4 من 5 فى اختبارات التصادم و دى نتيجه مش وحشه !

Dr. Bolbolan ptmnlo123per122

رد: اختبار قياده و ملاحظات على النيوسيراتو أول 700كم
 

بالنسبه لسؤال سيادتك عن مكان بمصر الجديده يملأ نيتروجين:
الموضوع ده منتشر فى شارع هارون الرشيد فى المنطقه بين الميدان إللى فيه تسيباس وميدان الجامع وحتلاقى محلات الكاوتش عندها جهاز يخرج نيتروجين عباره عن إسطوانه حمراء كبيره مكتوب عليها N2 وهو لازم يفضى الهواء الموجود فى العجله تماما وبشفطه بالكامل لغاية ماتلاقى الكاوتش قرب يلزق فى الجنط وبعد كده بيملاها نيتروجين
أنا شخصيا بأتعامل مع واحد إسمه محمود فى شارع دمشق بعد موقف أتوبيسات روكسى أمام معرض مصطفى السلاب للسيراميك وحامد عبد الخالق بتاع البدل والموضوع ده مشكلته الوحيده إن أى تظبيط للعجل لازم يكون نيتروجين يعنى الهواء العادى ماينفعش وممكن ما تعملش الإستبن وتخليه هواء عادى .