|
رد: مـقـــا لا ت
الأية فى سورة المائدة تقول
اعوذ بالله من الشيطان الرجيم ( من أجل ذلك كتبنا على بنى اسرائيل أنه من قـتل نفسا بغير نفس أو فساد فى الأرض فكأنما قـتـل الناس جميعا ومن أحياها فكأنما أحيا الناس جميعا ولقد جا ئـتـهم رسلنا بالبينات ثم أن كثيرا منهم بعد ذلك فى الأرض لمسرفون ) صدق الله العظيم تصوروا انه ليس لقاتل النفس عمدا توبة ولابد من أعدامه وأما الدية ومقدارها قيمة 100 جمل فهى عن القـتل الخطأ فـقـط وقال رسول الله (صلى الله عليه وسلم ) لزوال الدنيا أهون عند الله من قتل رجل مسلم رواه النسائى وهو صحيح ورجاله ثـقـات اومال اللى اعطى أوامر بـقـتـل 300 ده يبقى أيه ويستاهل أيه ؟؟؟ وزير الداخلية اعترف وقال ان أطلاق الرصاص الحى لايتم أبدا الا بأوامر عليا طيب وهو فيه أوامر عليا فوق وزير الداخلية ياترى مين ؟؟؟؟ طالما بندافع عن مبارك يبقى لازم ندور مين فوق وزير الداخلية وانا شخصيا اكتشفت ان احمد كورسير هو اللى ساكن فوق وزير الداخلية اعدمووووووووووووووووووووو ه |
رد: مـقـــا لا ت
الـقـذافـى الجدع اللى اسمه القذافى راجل مخلول متفهموش .......معتوه متعرفوش ......لكن فى الأخر هو راجل كوميدى الى أقصى درجة امبارح طلع علينا مزنوق فى ركن فى الحيطة وماسك شمسية وراكب توك توك (غالبا توك توك ) والمذيع واقف بعيد ومتشحطط ومادد ايده بالمايك وانا مش فاهم مشحطط المذيع ليه معاه لما هو شاكك فيه ....... جايبه ماسك له المايك ليه؟؟؟ وقال كلمة ونص سمعتهم 35 مرة ومفهمتهومش وعاملين له جو مطرة تحس انه فى ليـبـيا فعلا والحركة القرعة باينة اوى ....... من تضيـيـق كادر الصورة والتوك توك علشان متقعدش تحلل التسجيل ده فين ؟؟؟؟؟ المهم سيادته ركب التوك توك وجه على لـيـبـيا ....وبشرونا ان سيادته هيلقى خطاب مهم لكن انا عارف ان القذافى راجل كوميدى وتلميذ عبد الناصر ومش هيقول كلام غير الثورة وهرش المخ القديم ده وقد كان طلع علينا سيادته وقال لافض فوه ومات حاسدوه ان دول قلة مندسة (برضه ) ومتأمرين وقابضين (برضه )ويظهر ان مفيش كنتاكى فى ليـبـيا فمعرفش يقولها وقال ان هؤلاء القلة لايزيدو عن واحد فى المليون .........ياصلاة النبى .........ليه هو الشعب اللـيـبـى عدده زاد من ورانا والا ايه ......والا بسلامته مش عارف تعداد الشهداء او تعداد شعبه ثم قال محرضا انصاره / اخرجوا عليهم بنسائكم وأطفالكم جنان رسمى عايز يوقع الشعب فى بعضه وتبقى حرب أهلية ثم ألقى مفاجأة عظيمة لاتخرج الا من القذافى حين قال/ انا تركت الرئاسة منذ عام 1977 والله لو خالتى بمبة جنبه كنت لمت كل اللى فى التلاجة واللى على البوتاجاز وحدفته بيه اومال مين ياعم اللى عمال يقول يمين وشمال .......هيا اللجان الثورية دى مش تحت أمر سيادتك ؟؟؟ ثم تفاخر بقـتـاله للسادات والنميرى والحبيب بورقيبة وياله من فخر .....بسلامته يتفاخر انه قاتل عرب ومسلمين امثاله ورغم انه كلام لايستحق الفخر وانه راجل نصاب لان فرقة واحدة مدرعة خرجت من مصر بقت تطارد افراد الجيش اللـيـبى حتى بنغازى بالقرب من تونس وكان فى مقدور السادات أنه يحتل ليـبـيا وقتها لكنه عارف انه سياسيا هيخرج من ليـبـيـا وسبب الخلاف ان القذافى بعت لنا 9 طيارات يحاربوا معانا فى 73 على سبـيـل الهدية وحسب مساهمات الدول العربية فى الحرب لدول المواجهة كما أقرتها جامعة الدول العربية لكن الباشا لما اختلف مع السادات بعت له فاتورة بتمن الطيارات ومصاريفهم وعايزهم فورا وحصل اللى حصل وواضح ان هذا الرجل مخلول فعلا فهل من المعقول فى حالة الغليان هذه تطلع علينا بخطاب طويل وماسك لنا كتاب قانون العقوبات وعمال تقرا منه وأما النكتة العجـيبة بسلامته قال انه لم يصدر قرار بأطلاق طـلقـة واحدة على الشعب ياصلاة النبى اومال الجيش ده بيضرب بناء على أوامر من مين ؟؟؟ غير التقطيم فى الشعب كنتو فين واحنا بنحارب فى بلاد الواق الواق وكنتو فين واحنا بنحارب شعب المطرية وكنتو فين واحنا بنحارب شعب الشرابية وكنتو فين واحنا بنحارب ضد امبابة أيه ياعم ده حد عمره سمع ان ليـبـيا حاربت بعد عمر المختار ؟؟؟؟ وليـبـيا كلها 4 او 5 انفار هيحاربو مين دول واما اكثر الجمل الكوميدية حين اتهم الثوار بأنهم شوية مـقـملـين وموصـخيـن (معـفـنـيـن) ثم يتحدث بطريقة اكثر طرافة حين يقول خلاص هنديكو فلوس البترول فى ايديكم وهنعمل لجان ثورية جديدة والله كنت منتظره بعد طريقة الـقاؤه للجملتين دول انه يقول يالا بقى بـيـتـك بـيـتـك ثم اتهم الثوار انهم متعاطين لحبوب الهلوسة (سابقا وليس فى خطبة اليوم ) وانهم بمجرد زوال أثار الحبوب هيرجعو بيوتهم فعلا انه اعجب رئيس رأيته ....وأكثرهم جنونا وتحس انه طفل يتحدث الى مجموعة أطفال والله سمعت خطابه من كام ساعة وضحكت عليه كثيرا فهو فعلا رجل كوميدى ومازلت مصرا على رأيى انه ثالث المنضمين الى نـقابة المخلوعين لانه بقتاله للشعب وصل الى نقطة اللاعودة وان كنت اعتقد انه بعد المجازر والتى وصل الشهداء فيه اكثر من الف شهيد انه لن يخلع حيا ولن ينضم كثيرا الى النقابة بل سيقطع تذكرة الى الدار الأخرة لان الليـبـين فيهم قسوة الصحراء ومش طـيـبين زى المصريـين اى كلمتين شحتـفة يعيطو ويرجعو والله زمان كنت اقارن القذافى بجدى هريدى رحمة الله عليه الا أن جدى هريدى كان عاقل وكان شيخ بلد بجد وم يقـتـلش الا لو ...له ثأر لكن اتضح ان جدى هريدى اعقل وأجدع من 50 واحد زى القذافى رحمة الله على جدى هريدى ولعنة الله على القذافى |
رد: مـقـــا لا ت
نـفس عميق الجدع اللى اسمه وائل مجدى ضحك علينا وعمل لنا منتدى للسيارات وقعد يتدهلز ويلمنا فى مقابلات وحركات لحد م خلى الموضوع بقى افيونة عندنا والواحد يقوم من النوم ياخد الشاور بتاعه وممكن قبلها برضه وييجى يبص يشوف الدنيا فيها ايه وممكن يضيع له ساعة والا حاجة قبل م يتنقل من جنب الجهاز شىء يغيظ ايه الأدمان ده تقولش بيدينا الجرعة .....بس ان جيتو للحق احنا غلطانين برضه فضلنا ماشيين وراه لحد فوجئنا انه مكلبشنا هنا والمرة دى بسبب انه حرمنى من الكتابة وخنقنى وبمجرد م حسيت ان المنتدى رجع تانى قررت عمل انقلاب ضده للسيطرة على هذا المنتدى اصل مش هينفع يا اخواننا غير واحد صعيدى يمسك الحكم بيد من حديد هنا والا بلاش بيد من حديد دى اليومين دول ......علشان الموضة دلوقت الديموقراطية .......والتطهير .......ومكافحة الفساد .....الى أخر هذا القاموس اللى بنقراه كل يوم ده طيب سبب الدعوة لانقلاب سلمى على وائل ايه ؟؟؟؟ انه خنق ناس كتير هنا بسبب غياب المنتدى وانا منهم طبعا وبمجرد احساسى بعودة المنتدى قررت شن حرب شعواء عليه (ومحدش يسألنى شعواء يعنى ايه علشان انا قاصدها ) وبصراحة اخدت نفس عميق من الهواء النقى وامسكت قلمى (أسف لوحة المفاتيح ) وجلست اكتب لكن وقبل الكتابة فلابد من الدعوة للانقلاب اولا او انا ممكن اقبل رشوة من وائل عبارة عن واحد شاى تقيل جدا سكر زيادة وامرى لله شد حيلك معانا ياعم وائل والا ................. |
رد: مـقـــا لا ت
ياكلو زفـت اخواننا رجال الشرطة زعلانين من الشعب المصرى علشان اللى حصل فيهم من يوم 25 يناير وحتى اليوم من اهانات وحرق لاقسام الشرطة الى أخر هذه الممارسات المعروفة للجميع وصحيح ان الشعب زودها شوية .........لكن معلش مهو الشعب بياخد على دماغه من سنة 1954 (بداية حكم عبد الناصر ) لحد النهاردة لكن تقول أيه ؟؟؟؟ اخواننا الثوار سمموا عليهم عيد الشرطة وانقلب الى عيد الثورة وكمان مش عارفين يرفعو راسهم ولا يشخطو وينطرو زى زمان وخصوصا بعد حادثة سائق الميكروباس والذى تعاطف معه الشعب وقامو بتكسير عظام الضابط وطحنوه طحنة لم يأخذها الواد فـتـلة الحرامى يوم ان سرق شقة رئيس نيابة مصر الجديدة وامسكوه وهو نازل بالمسروقات من العمارة ولكن تمادوا (زودوها حبتين ) وقامو بحرق سيارة الضابط تماما وهى سيارة دودج رام غالية حبتين برضه وانا متهيألى ان اهله زعلو على العربية اكتر منه لان علاجه هيكون ارخص من تصلحيها ثم حادثة صاحبنا مدير أمن البحيرة والذى عقد اجتماعا عـنـتـريا مع قيادات الضباط عنده ليس طبعا لكيفية الحفاظ على الأمن والنظام داخل المحافظة ولا كيفية القبض على الذين هربو من السجون ولكن لكى يعلمهم كيفية التعامل مع هؤلاء الخونة من ابناء الشعب الذين يريدون معاملة كريمة فـقط من الشرطة ولايريد الشعب أكثر من ذلك منهم وكيف ان رجال الشرطة هم اسياد البلد وان ابناء الشعب دول شوية عبـيد ولايساووش اى حاجة أيه العقلية دى لسه فى ناس كده وطبعا عمل فتنة فى المحافظة ونظرا لان اكبر سر فى بر مصر المحروسة بيتدارى شهر بالعافية فطبعا الناس عرفت كلامه وعملو مظاهرات ومسكتوش لحد م تمت اقالة المحروس طبعا بعد الحادثـتـين دول حتى لو فيه حد من رجال الشرطة ناوى يفكر فى أى أذى لخلق الله لاقدر الله هيفكر الف مرة لكن اعجب مافى الموضوع بقى انى سمعت من بعض معارفى فى الشرطة ان جاى لهم تعليمات بالسلبية وعدم الاحتكاك بالمواطنين وبينى وبينكم مصدقتهومش واعتقدت انهم مكسلين او خايفين من رد فعل الناس وأذكر انى سمعت احد الضباط يقول لزميله / ياكلو زفت مش احنا مش عاجبينهم ؟؟؟؟ خليهم يحمو نفسهم بقى وبدات اشك فى ان هذا الكلام صحيح ......لان مفيش دخان من غير نار وجلست مع احد اصدقائى وانا شخصيا اعرفه فهو طيب القلب جدا ومسالم جدا وتعجبت انهم قبلوه فى الشرطة فماذا يفعل هذا فى الشرطة بكل طيبة القلب هذه ......وهذه الشخصية المسالمة جدا .....والابتسامة التى لاتفارقه ابدا وسألته / انتم صحيح عندكم أوامر بالسلبية فى المعاملة مع الناس أيوه ليه ؟؟؟؟؟ اللى اتقال لنا انك متضمنش رد فعل الجمهور فممنوع الاحتكاك بأى حد طيب وحماية الشارع والجمهور والفصل فى المنازعات وحماية الناس مالناش دعوة ازاى بقى التعليمات كده.......وخصوصا اننا كل يوم بناخد كم اهانات رهيب زى م يكون احنا اللى ضربنا نار على المتظاهرين (هو يعمل فى مترو الانفاق ) ثم أقسم بالله العظيم انه من يومين من كثرة أهانات الناس ومعاملتهم السيئة له (بسبب او بدون سبب فانا اعرفه جيدا) انه تعب نفسيا وكاد يطلبنى فى التليفون لكى احضر ويشكو لى من الناس ويفضفض معايا ..........ثم لم يجروء واغلق على نفسه باب مكتبه بالمفتاح وظل يبكى كالأطفال طيب.......... هذا الشاب انا اعلم مافيه من النخوة وانه لن يسكت على باطل ولكنى لاحظت ان كثيرمن السادة رجال الشرطة لن يهمهم فى كثير او قليل أمن المواطن بل انه يتشفى فى الناس وأذكر انى بعدها سافرت الى الأسكندرية وهناك عند مدخل المحافظة وبعد ان عبرت البوابات فوجئت بكمين اسكندرية والذى كان يهرب منه الكثيرون من المخالفين لايوجد به سوى ضابط واحد وامين شرطة والاثنان يجلسان على كراسى فى الشمس بعيدا ويتبادلان اطراف الحديث والدنيا سايبة ولا كأن لهم علاقة بأى شىء ثم عند عودتى ليلا وجدت الكمين مغلق والنور مطفى وكأنه دكان........ صاحبه اكتفى بما ارسله الله من رزق واغلق الدكان ومشى لا اله الا الله اذن حكاية ياكلو زفت دى شكلها بجد الى ان قرأت اليوم فى جريدة المصرى اليوم تصريحا على لسان مدير أمن القاهرة حين سألوه عن مظاهرات الناس التى تدعو الى عودة رجال الشرطة الى الشارع للمحافظة على الأمن فـقال بسلامته / والله انا مقدرش اقبض على اى حد لانه بلطجى مش هيا دى حقوق الانسان اللى انتو عايزينها وعصر الحريات اللى انتو عايزينه يعنى بسلامته عايزنا يا اما نستحمل سيادته وغطرسته هو ورجالته علينافى ظل قانون الطوارىء يااما نرجع لعصور الغاب والعصور الوسطى وكل واحد يمشى ماسك طبنجة والا سكينة ويحمى نفسه بنفسه يعنى برضه منطق كلو زفت طالما كسرتم مناخيرنا وعايزين تخلونا زينا زيكم يبقى اشربوا بقى من البحر الاحمر او الابيض وأنا شخصيا لا اثق بوزير الداخلية الحالى مع احترامنا الشديد لكل من سيخالفنى فى هذا الرأى لكن وبتحليل بسيط لرحلته فى العمل الشرطى نجد انه منذ اليوم الأول لتخرجه فى كلية الشرطة وهو يعمل فى المباحث حتى اصبح مفتشا لمباحث العاصمة وكان حبيب العادلى وقتها مديرا لامن القاهرة وشكاه لوزير الداخلية وقتها عبد الحليم موسى بأن محمود وجدى يحكم القاهرة وانا أى حبيب العادلى ليس لى سيطرة عليها رغم ان العادلى كان يرأس وجدى وقتها وتم الصلح بينهما فى مكتب عبد الحليم موسى ياسنة سوخة يااولاد اذا كان العادلى اللى شيبنا وطلع عين ابو الى جابونا كان بيشتكى من الراجل ده رغم انه كان يرأسه ومعلوم برضه ان السبب الرئيسى لفساد العلاقة بين المواطنين والشعب جهازين فقط من اجهزة الشرطة الكتيرة مباحث امن الدولة والمباحث العامة (مباحث القسم او ضباط اقسام الشرطة بصفة عامة ) ثم يليهم شرطة المرور وباقى الاجهزة فى الشرطة راحو فى الرجلين ولما تولى العادلى زمام عزبة الداخلية قرر الانتقام من وجدى فنـقـله الى سيناء ثم منها الى الصعيد يعنى شحططة وخلاص لكن وجدى عنيد ولم يستـقـيـل ثم انتهى به المطاف الى مصلحة السجون وهى تعتبر نوع من الاهانة كما جرى العرف بين الضباط بعد تولى منصب مفتش مباحث العاصمة فليس بعده الا مدير امن القاهرة ولكن هيهات فالعادلى يريد الانتقا م من من جعله يلف حول نفسه ولا يحكم القاهرة فعليا بل حاكما وهميا حتى خرج الى المعاش يعنى وكأنها عزبة ابوهم واحنا لامؤاخذة شوية عبيد عندهم على رأى الجدع مدير امن البحيرة طيب بقى بالذمة تفتكرو واحد طول عمره فى المباحث فى عهد مبارك من يوم تخرجه هل من الممكن يبقى كويس اتمنى ذلك انى ارجو من الله ان يزيح هذه الغمة ويخلصنا من هذه العقول الفاسدة حسبى الله ونعم الوكيل اللهم ولى من يصلح عقل وفكر هؤلاء اللهم أمين |
رد: مـقـــا لا ت
القذافى ( 2 ) القذافى ده من اعجب الشخصيات التى رأيتها فى حياتى وحاولت تحليل شخصيته فلم اجد غير شخص موهوم بأحلام الزعامة واذا كان عبد الناصر ( أستاذه واستاذ الفاشلين امثاله ) كان عنده نفس عقدة الزعامة لكن عبد الناصر كان متطلعا الى زعامة العالم العربى وبعض دول افريقيا أما القذافى فكان متطلعا الى حكم العالم كله وايه يعنى ........أقل منها والا ايه ؟؟؟؟؟؟؟ هو يعنى حكم العالم محتاج ايه غير شوية خطب عنترية وشوية فلوس تديهم لزعماء الدول الفقيرة وهما هينتخبوك حاكما انت وباقى العيلة ثم هو يعنى القذافى هيدفع من جيب السيد الوالد مهو كان ظابط جيش زى واحد صاحبنا مهو كله من دم الشعب الليبي والحقيقة بعد البحث والتحرى فى تاريخ هذا الرجل الذى كنت اعتقد انه ابن جنية (مؤنث جنى ) ويلعب بالبيضة والحجر وبيعمل عبيط علشان يقول اللى هو عايزه ويعمل اللى هو عايزه فى اى وقت ولكن بعد البحث والتحرى وجدت انه فعلا معتوه مخبول مجنون ويستاهل شهادة معاملة اطفال زى بتاعة حافظ المصوراتى واللى بسببها باع تلتين اراضى المطرية واصبح مليونير وترك تصوير الافراح والحفلات الى تجارة المخدرات ويبدو ان العالم كله اعطاه فعلا هذه الشهادة ........فأصبح يقول كلاما تحبه الشعوب فينحاز له البلهاء ولكن يقوله بطريقة كوميدية تجعل رؤساء الدول لا يعبأون بكلامه اعتقادا منهم انه مجنون بل ويضحكون عليه فقد اتهم الرئيس الفلسطينى على شاشات التليفزيون بأنه غبى فتحولت الصورة الى الرئيس الفلسطينى محمود عباس لتجده بدلا من ان يغضب .......فطسااااااان ومسخسخ على روحه من الضحك وفى نفس الجملة شتم اسرائيل وقال ان زعمائها اغبياء ........والعجيب انهم لم يردوا عليه ولم اجد تفسيرا لكل هذه الحركات الكوميدية سوى جملة قالها استاذه ومعلمه وقدوته جمال عبد الناصر بأن القذافى هو خليفته فى قيادة حركات التحرر والقضاء على الاستعمار وهو خليفته فى تحقيق حلم الوحدة العربية وشخص بمثل قامة عبد الناصر ( وقتها ) حينما يقول هذا الكلام فهو بمثابة شهادة العالمية لمثل هذا الطفل المجنون...... بل ان جملة كهذه يمكن ان تؤثر على جهازه العصبى فيصاب بلوثة عقلية ويصاب بتأنيب الضمير انه لم يحكم العالم وأقطع دراعى من لغاليغه ان كان نام ليلة م سمع الجملة دى .....وانه طول الليل يحلم بعبد الناصر وهو بيقولها ولاول مرة اصدق السادات حين قال عليه الولد المجنون بتاع ليبيا.....فقد كنت اعتبره يقولها بسبب خلافهما الشخصى والذى كنت اظن انه بسبب مجموعة طائرات اشتراها لنا العقيد فى حرب 73 ثم طالبنا بثمنها وارسل لنا فواتيرها بعد معاهدة السلام مع اليهود .......ثم اتضح لى غير ذلك وللحديث بقية لكى لايكون المقال طويلا |
رد: مـقـــا لا ت
القذافى ( 3 ) ونستكمل حديثنا عن القذافى واتضح لى انى كنت غلطان حين اعتقدت ان خلافه مع السادات كان سببه موضوع ثمن الطيارات ثم عرفت بعد ذلك انه بسلامته صدق حكاية قائد حركات التحرر الوطنى وتحقيق الوحدة العربية فقرر احتلال مصر وجعلها مع ليبيا دولة واحدة ........ والله ده جنان رسمى المبدأ كويس لكن بالاتفاق مش بالحرب بلا سبب وطبعا بعت وحدة عسكرية من عنده يادوب عدت الحدود عند السلوم والسادات راح باعت له فرقة مدرعة من عندنا بقت تجرى وراهم لحد بنغازى قرب تونس والقذافى لقى الحكاية منفعتش مع مصر ......راح طالع على تونس وبعت للحبـيـب بورقـيـبة ( رئيس تونس وقتها ) وهدده واستخف به بو رقيبة والقذافى اعلن عليه الحرب ولكن الجيش التونسى اللى استهان بيه القذافى طرده ولقنه درسا لن ينساه ثم فجأة قامت فى دماغه انه يحكم العالم كله بدل العرب الرعاع دول ثم اكتشف فى نفسه انه صاحب رسالة وقرر تأليف كتاب وسماه الكتاب الأخضر ويظهر سماه كده لانه زهق من اللون الأصفر لون الصحراء عندهم وكان نفسه يزرعها فقرر حكم العالم !!!!!!!!!! والمختصر المفيد فى الكتاب الأخضر انه ليس حاكما لليبيا بل هو حاكم عالمى وراجل ثورى مهمته الثورة وبس ...... الثورة على ايه؟؟؟ وعلى مين؟؟؟؟ مش عارف وبالتالى هو ليس حاكما بل جعل ليبيا يحكمها شوية صياع سماهم اللجان الشعبية ثم تنظر فيمن المسئول عن اللجان الشعبية تلاقيهم عياله نفس اللى بيحصل عندنا ......سياسة تفريغ كل شىء من مضمونه وقيمته ويبقى الشىء اى شىء او اى مشروع او قانون او اى حاجة تخدم الناس ......... مجرد منظر فقط وانطلق ينفذ مشروعه الفكرى فقاتل مصر وتونس وتشاد ثم انضم الى حركات وتشكيلات عصابية وجماعات من كل بلاد الدنيا مش عارف ماله ومالها زى الخمير الحمر (مكتوبة صح ) اعتقد فى اسبانيا والألوية الحمراء فى ايطاليا وجماعة أبو سيفين وابو مطوتين وجماعة أبو جلمبو نايم على جنبه وطبعا كل دول صرف عليهم من دم الشعب الليبى غير اللى كان بيسرقه لنفسه ولولا ان الدخل القومى لليبيا ضخم جدا (حوالى 93 مليار دولار سنويا ) لكانت بانت الفولة من زماااااااااااااان ..... لكن لقى الحكاية مع الجماعات مش نافعة فقرر البحث عن دول واتجه الى امريكا اللاتينية وراح فنزويلا وشيلى والواد شافيز بتاع فنزويلا كان صايع شوية راح مقرطسه واقنعه انه انضم اليه وتحت قيادته علشان يهبش له كام مليار دولار من صاحبنا واتجه صاحبنا الى افريقيا وساعد متمردى دارفور ضد حكومة السودان ومتمردى جنوب السودان ضد حكومة السودان أه والله طيب ...ليه كده اوهام الزعامة......... وجملة عبد الناصر المشئومة لكن الواد بتاع غانا طلع ناصح وراح مديله شومة كبيرة ليها راس ذئب وخلع عليه لقب ملك ملوك افريقيا يعنى هيا الألقاب عليها جمرك ؟؟؟؟؟ وطبعا بسبب الشومة واللقب .............هبشت غانا كام مليار دولار واكيد راحو جيب رئيس غانا مش دولة غانا ولازال للحديث بقية كى لاتملوا |
رد: مـقـــا لا ت
القذافى ( 4 ) ونكمل عن القذافى خالتى بمبة اتصلت بيا وقالت لى خبر غريب ثم تأكدت منه بعد ذلك وعرفت انه صحيح انت ياموكوس نعم ياحاجة انت عارف القذافى ده بلده اسمها ايه ؟؟؟ سرت بغيظ / م انا عارفة ولو كنت ادامى دلوقت كنت دلقت عليك حلة البامية ليه ياحاجة ..... هو من سرت فعلا من قرية أيه ؟؟؟ معرفش بلدهم اسمها جهنم ههههههههههههههههههه .......... بتهزرى طبعا ..........ههههههههههههههه ههه واغلقت الخط فى وجهى بعصبية يانهار ابيض ...... وتحسبا لاى حلل ممكن تيجى بيها على البيت وتدلقها على دماغى خرجت من البيت ثم عدت فى أخر الليل وبحثت عن الموضوع ووجدته حقيقى .....فعلا القذافى من بلد اسمها جهنم وأخواننا الأفارقة لما لقيوه نفسه يبقى زعيم عالمى راحو جايبين له شوية ملابس من دولاب شعبان عبد الرحيم (شعبولا ) وادينى فى الهايف وانا احبك يافـنـنـس وبقى يلبس الملابس العجيبة بتاعتهم دىو عليها خريطة افريقيا وهات ياصرف من جيب الشعب الليبى والقذافى عنده 9 عيال منهم 2 بالتبنى قال يعنى ال 7 قليلين والعجيب ان ال 2 الى تبناهم ماتو ا فى الغارات الأمريكية على ليبيا وتبقى اولاده الفعليين ومنهم واد مجنون زيه اسمه الساعدى والواد ده كان لعيب كورة فاشل وكان بيلعب فى ليبيا وطبعا نظرا لفشله الذريع كلاعب وانه كان بيلعب فى ليبيا بالعافية وبالأكراه لكن فى عالمنا العربى لاتستطيع ان تنتصر او تمارس الديموقراطية الا فى ملاعب الكرة (قبل 25 يناير 2011 ) والجماهير افتكر ت نفسها بتهتف ضد لاعب كرة عادى ونسيت انه ابن ملك ملوك افريقيا وكان الناتج ان جاء حرسه الخاص وطاخ ....طيخ ...طوخ ......المهاريش ضربوا نار على الجماهير وطبعا مات 20 فى الحكاية دى....... وطبعا اعتبروهم موالين للنظام البائد وكانوا فى حالة اعتداء على أمن الدولة اى كلام فى اى حتة ......المهم يداروا العملة السودة بتاعة الساعدى والحرس بتاعه ونكاية فى تونس والمغرب جاب 2 خدامات واحدة من تونس والتانية مغربية قال يعنى كده بيهين كرامة المغاربة والتوانسة ......شوفوا المخ اللى عايز يتحمر عند الواد حسين اللى واقف فى ميدان المطرية و يتعمل ساندوتشات الساندوتش بجنيه لان مخ القذافى لايساوى اكتر من كده وبسلامته دايما مفيش وراه غير الثورة والنظرية الثورية ونبض الجماهير واللجان الشعبية اى كلام بلا معنى ولاتنفيذ حقيقى فى ارض الواقع وعمل قناة سماه الوطن العربى طول النهار بتذيع اغانى وطنية وخطبه هو وعبد الناصر والكفاح دوار لكن ضد مين ؟؟؟؟ مش عارف صراحة أهم حاجة الثورية الاشتراكية الحنجورية المهلبية بعد الرز بالملوخية والقذافى شخصية مستفزةو لكن نظرا لأن لديك خلفية عن طبيعة شخصيته فأنت بمجرد استفزازك لاتملك الا ان تضحك فقد شتم اسرائيل .....وضحكوا وشتم محمود عباس الرئيس الفلسطينى الحالى وضحك وشتم القادة العرب فى احد اجتماعات القمة العربية وقال بالحرف انهم ملهومش لازمة وضحكو ا جميعا ثم فى أحداجتماعات الأمم المتحدة شتمهم جميعا وضحكوا وشتم على مجلس الأمن ..... ولم يغضب أحد وشتم عبد الله ملك الأردن ..... ولم يرد عليه ومن حركاته العجيبة ان العاهل السعودى الملك عبد الله وقف جنبه فى قضية لوكيربى وحصل ضغط سعودى رهيب على امريكا لانها كانت عايزة تقدم القذافى للمحاكمة كمجرم حرب وبعد الضغط السعودى تم تحويل الموضوع الى دفع تعويضات فقط مش يقول للراجل شكرا لأ ............ قام بعمل محاولة لاغتيال عبد الله ........متفهموش ليه ؟؟؟؟؟ انه عجيب حقا وهو يذكرنى بالواد قورة ...... وهو كان زميلنا فى كلية الحقوق وكان غبيا جدا ونسااااااااى ولايحفظ اسم اى منا رغم اننا زملاؤه ومن اعضاء شلتنا وكنا نبيت عنده فى شقته فى عمارة والده بعين شمس وكان يحفظ كتب الكلية ولا يفهم منها شىء بل يرص الأجابة فى الامتحان ان فهم السؤال وان جه سؤال بطريقة ملتوية لايفكر فيه ولايحله زمانه حبس نص زباينه والنص التانى نفد بجلده منه لانى عرفت انه اشتغل بمهنة المحاماة وكان ظريفا ولايتذكرنا ابدا ماعدا واحد فقط هو صبحى والذى تربى معه من ابتدائى لاعدادى لثانوى لكلية الحقوق وكان يسخر منا جميعا ويتريق علينا تريقة قاسية ومع ذلك كنا لانتوقف عن الضحك ابدا وكنا نتعجب فلو قيل هذا الكلام الساخن من شخص أخر لقامت الدنيا ولم تقعد لكن منه هو بالذات..........اى سخرية او شتيمة كنا نضحك منها ضحكا شنيعا وأذكر مرة انه قال لنا جميعا وكان يتحدث بكل جدية / انتم شوية حمير وبقـر ومبتفهموش ......وانخرطنا فى ضحك هيستيرى ........ رغم انها جملة عادية ولو قيلت من غيره لضربناه ورميناه تحت عجلات قطار المرج (قبل المترو ) الله يمسيك بالخير ياقورة ولم يدر بخلدى ابدا انه سيأتى اليوم الذى اقارنه فيه بالقذافى وكله كوم وتغيير اسم ليبيا كوم ليصبح اطول اسم دولة فى العالم الجماهيرية العربية الليبية الشعبية الأشتراكية العظمى ومن غرائب القذافى انه اضاف كلمة العظمى للاسم بعد ضرب أمريكا لليبيا بالطائرات ولا ادرى ماعلاقة الهزيمة العسكرية بكون الدولة تصبح ........ عظمى وللحديث بقية |
| الساعة الآن 08:23 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017