مصر موتورز مجتمع السيارات - اغيثونا يا ولاد البندر فى جوان وش السلندر

اكتر من خمس شهور لحد دلوقتى مرو على الموضوع من بداية حصول المشكلة وتجارب الميكانيكى الله لا يسامحة وانهارده داخل احكيلكو الحلقة الاخيرة من مسلسل العذاب والضنا اللى عشته مع العربيه فى 5 شهور دول ويارب تكون الاخيرة لحد ما ابيعها واخلص من لعنتها

الحكاية باختصار واللى عايز يعرف التفاصيل يقرا الموضوع من اولة ..
رابط الموضوع الاصلى
اغيثونا يا ولاد البندر فى جوان وش السلندر - مصر موتورز مجتمع وسوق السيارات العربى

الحكاية ان العربيه فجاءة سخنت منى ولقيت المية اتبخرت ومن بعدها وهى بتسخن وطبعا طحنت وده يؤكد تلف جوان وش السلندر روحت عملته ومن بعدها والعربيه اتهببت اكتر ماهى والسخونة بقت عرض مستمر سواء فيه مية او مفيش ولما تسخن وتسيبها تبرد متكملش محطة مترو مشى وترجع تسخن تانى يعنى لو رايح مشوار من مصر الجديدة للعباسية هتسخن منك بعدد محطات المترو بالظبط :(
ولان الصنايعى اللى اشتغل فيها مكانش امين فقررت اوديها لحد تانى ويفصل بينى وبينة

فى خلال الشهور اللى فاتت جتلى قرفه من العربية والعربيات كلها وفضلت اكتر من 3 شهور راكن العربيه تحت البيت من غير غطا حتى لحد ما بقت لونها والارض واحد حتى لما اتفقت مع ورشة اروح اوديهالها وجيت ادورها لقيت البطارية باظت من الركنة قولت والله مانت متحركة خليكى مكانك
وفعلا فضلت مرمية لحد ما جبت لها ونش وشالها هيلا بيلا وعلى الورشة فى المعادى
وهنا عايز استاذ اسلام مدير ورشة اوتو بينت على وقفته معايا الفترة اللى فاتت لان ورشة المكانيكى كانت جمبة وتقريبا من ساعة ما العربيه اتشالت على الونش لحد ما استلمتها انهارده هو اللى كان بيتابعها وشال عنى هم كبير ربنا يجازية كل خير يارب

الحمد لله استلمتها انهارده واتكلفت اجمالى 2000 جنية شامله كل حاجة من اول الونش لحد غسيلها وتفويلها بعد ما كنت صرفت 1500 مع الورشة الاولانية يعنى اجمالى 3500
الشغل اللى اتعمل المرة التانية كان جوان طبعا للمرة التانية وطبعا مصنعيات ميكانيكى وخراط بالاضافة لاكتشاف ان فيه شرخ فى بلوك المكنة

وهنا فيه سؤال بيطرح نفسه من الدور العاشر لما المكنة فيها شرخ ازاى الميكانيكى الاولانى مشافهوش ؟
ولما هو العيب كان شرخ فى البلوك ليه خلانى اغير طلمبة مية وشجرة ودخلنى فى حوارات ومصاريف وضياع وقت !!

واحد هيطلع يقولى وانت يعنى يا ابونورا مش عارف ان العربيات ديه عايزة التوكيل ومكانش يصح تجرب مع ميكانيكة وورش اقوله ببساطة لان التوكيل مبيعلجش الحاجات اللى زى ديه وعلشان يمد ايدة فى العربيه بس كنت هدفع اللى دفعتة ده كله برضو ويمكن اكتر

قدر الله وماشاء فعل والحمد لله على كل حال دعواتكم وارائكم