مصر موتورز مجتمع السيارات - تشطيب الشقة و الديكور

اياكم ومكاتب تشطيب الشقة بالكامل

ايام ما كنت بعمل الشقه في اكتوبر ناس اقترحت عليا اني اتعاقد مع شركة تستلم الشقة وتشطبها بالكامل وتتابع العمال وهكذا وفوجئت بأسعار خياليه

يعني لقيته بيكلمني علي شغل النقاشه مصنعيه بس 7000 جنيه

الكرانيش بتبتدي المتر من 25 جنيه لحد 75 جنيه

السباكه 8000 جنيه

الكهربا 4000 جنيه

السيراميك المتر ب 19 جنيه

ده غير عمولتهم

والدي من النوع اللي بيحب يشتري دماغه ولقيته بيقولوه اوكيه الحاج جابلي الضغط ساعتها بس ماشي مفيش مشكله ماهو ابويا بردك

المهم اتفقت معاه علي تشطيب الشقة ديه بمعرفتي وهوفرله ال 3/4 من المبلغ ده

هو طبعا مصدق وقالي بس اي غلطه انتا اللي هتشيل الليله يا معلم قولتله ماشي

المهم في الاخر عملتله متر الكرانيش 3 سنون و نصف دائره وبيت نور المتر ب 9 جنيه

مصنعية النقاشه للشقه بالكامل 2100 جنيه 3 وشوش معجون ووشين دهان

سباكة الماني بالكامل مصنعية 3000 جنيه السباكة الحاجه الوحيده اللي مقدرش افاصل فيها علشان يدي الشغل حقه وديه نصيحة لاي حد انا مبهدلنيش في موضوع السباكه ده قد السباك نفسه لاني كل يوم لازم اغديه يا كفته مشوية يا فراخ مشوية وكنت مدلعه علي الاخر ومصدقت انه خلص شغل السباكه وكنت هطفحه اللي كله هههههههههههههههه

بالنسبة للكهربا كلفتني مصنعيه 1500 جنيه

و بالنسبة للسيراميك جبته من المهاجرين المتر ب 25 جنيه فرز اول كيلوباترا

والدهانات كانت كابسي بس مش فاكر التكلفه دلوقتي واكيد طبعا اتغيرت التكلفة للاعلي

وطبعا اتفحت في الشقه ديه 5 شهور بالكامل في عز الحر وربنا يرحم ال 128 اللي كنت بحملها اسمنت وجبس علي السقف والشنطة والكابوت العربية كان بيبقي بينها وبين الارض مفيش 5 سم