مصر موتورز مجتمع السيارات - حلقات (جريمة كل يوم) ألغاز بوليسيه مسلسلة

الحلقة الثامنة
*************
مسعد الحلاق
----------------
مسعد الرغاى حلاق المنطقة الشهير تمت سرقة مبلغ خمسة آلاف جنيه وموبايل منه هذا الصباح
توجه مسعد الى الشرطة فقام العقيد بتكليف المقدم فضة الذى سأل مسعد الرغاى فقال:
-أنا اتسرقت يا سعادة البيه00شقايا وتعبى
-ايه اللى اتسرق منك؟
-خمس تلاف جنيه ورق بميه وموبايل شاريه من شارع عبد العزيز من يومين بألفين جنيه00يا خراب بيتك يا مسعد يا00000
قاطعة المقدم:
-اتسرقوا ازاى ومنين؟
-سعادتك انا حلاق مشهور فى المنطقة00شهرة جامدة جدا 00انا فى خدمة سعادتك شعر دقن لو سعادتك تحب كوافيرى يجيى لحد سعادتك ولو جربت حلاقة مسعد ح تقول مفيش غير مسعد00بس تأمر تلاقى مسعد بين ايديك00وكمان محبه كده لوجه الله
قال المقدم:
ها00 اتسرقت ازاى
-ما انا جايلك ف الكلام00انا كنت حاطط خمس تلاف جنيه وموبايلى فى درج الايراد وده لما تشرف كوافيرى على طول قدام كرسى الحلاقة انا حطيتهم الصبح بعد ما فتحت وبعدين جالى تلت زباين يحلقوا وبعد ما مشيوا لاقيت الفلوس والموبايل اتعلقوا و00
قاطعه المقدم فى غضب:
-اختصر 00هما كانوا مع بعض ولا لأ00ومين هما؟
-سعادتك جم ورا بعض راس ورا راس الاول كان حسن بلاعة السباك والتانى كان عزوز كبده والتالت كان الطرشجى حرشه
حاكم انا زباينى لا يمكن تغيرنى00ومقص مسعد ده سحر وقصه مسعد فن وجمال وآيافه 00آخر حلاوة ومنجهه
-أفففففففف00 انت كنت بتسيب المحل وهما فيه
-طبعا سعادتك ما اصلى حاطط المنشر على باب المحل وباطلع انشر الفوط وبعدين انا حبايبى كتير وكل واحد يعدى يرمى السلام وكلمتين واستشارة حاكم انا راجل خبير فى حاجات كتير00واهو برضه نسيب راس الزبون تتهوى شويه مش لازم كله يبقى قفش ورا بعضه حاكم دى فلسفة فى الشغل و00
قاطعه المقدم وهو يصرخ:
-كفايه فوت علينا بكره
مع السلامة
وتم استدعاء المشتبه فيهم
وبسؤال حسن بلاعة قال:
-انا متعود احلق عند الرغاى حاكم رغيه بقى غيه عندى00 وف كل مرة يقلب دماغى وما بحرمش
-انت متهم بسرقة عشر تلاف جنيه من الدرج بتاع مسعد
-انا ابن النصاب00هوه ده يحتكم على المبلغ ده 00دا سالف منى ورقتين بميه وبيماطل ف الدفع
وبسؤال عزوز كبده قال:
-انا سعادتك لما دخلت له لاقيت حسن بلاعه خارج من عنده 00أديته سندوتشين كبده كان طالبهم المحل كان فاضى ادانى الحساب قمت قلت احلق بالمرة
-انت متهم بسرقة عشر تلاف جنيه
-انا ازاى الكلام ده00وكمان عشرة ليه هو ورث ولا ايه؟ ومقلش انى خدت مكنة الحلاقة والمقصات والتلفزيون بالمرة حاكم الرغاى ده معزته بيخليها جمل
وبسؤال حرشه المخللاتى:
-انا سعادتك رحت احلق المحل كان فاضى00وحلقت ومشيت على طول
-هوه بيتهمك بسرقة عشر تلاف جنية
-والله محصل اما راجل خسيس صحيح انا حرامى وبعدين كان حاططهم فين كده عشان يتسرقوا بالساهل00تلاقى اتسرق منه ولا ضاع مية جنيه نفخهم عشر تلاف00 مسعد الجربان معاه عشر تلاف اما نكته بصحيح
اعترت الحيرة المقدم ولكن بعد تفكير قليل توصل للجانى

الى اللقاء فى الحلقة القادمة