رد: تجربتي مع الماتريكس(حازم خضر)
 

يا جماعة هو اللى يقول كلمة حق فى الزمن دة يبقى وحش ؟؟؟ العربية ثقيلة فعلا على الموتور و صعب تنقذك من اى موقف فى الطريق او تخطى سيارة اخرى الا اذا فحتت الموتور يعنى كارثة و عاملين الموتور 16 صباب من غير اى لزمة و لا لهم اى فائدة فى سحبها و شغل التكيف بعد ما تغير فلتر البنزين و شم احلى ريحة بنزين فى الصالون و استمتع بأحلى دبدبة فى المطباط
و حمل و اطلع مطلع و شم احلى شياط من اسطوانة الدبرياج و العربية لسة جديدة و لو نسيت الحزام و ضربت فرامل ممكن تقع من على الكرسى او تلبس فى البربريز لان الكرسى عالى و بلاستك التبلوه تعبان و مش انيق خالص و بيلم تراب بغباء و مش سهل تنظيفه بسبب خشونته و الشنطة صغيرة لا تسع شنط السفر و المصيبة الاكبر ان كل ما واحد يسند على العربية لازم ارد وراه الصاج بسبب ضعفه الشديد اقول كمان و لا اكتفى بذلك

رد: تجربتي مع الماتريكس(حازم خضر)
 

قشطه يا باشا ... تعالالي بقى من خلال الشاشه
تصدق ان انا معايا الاوتوماتيك منها ومعدي بيها ال100 الف كم وملتزم بالصيانه في التوكيل كل 10 الاف
وطبعا كل مره بغير زيت و فلاتر ... وعمري ما شميت ريحه بنزين
وعربيات كتيره بيكون الفلتر تحت الكنبه .. فمش عارف ايه كانت المشكله بالنسبه ليك .. يمكن وانت بتغير الفلتر دلدقت شويه بنزين و لا حاجه

الغريبه بقى اني سافرت بيها شرم الشيخ مرتين وكنا اربعه كبار و طفلين والشنطه شالت كل شنطنا ولو حضرتك عندك اطفال حتبقى عارف انهم بيحتاجو هدوم و غيارات في السفر اكتر من الكبار .. يعني شنطهم اكتر و اكبر من شنط الكبار
اصل اكيد انت عارف ان الكنبه بتطلع لقدام فالشنطه بتكبر و كمان فيه مسند فوق الشنطه بتحط عليه الاكياس و الحاجات الصغيره
وطبعا العربيه كانت محمله على الاخر بني ادمين و شنط بس الحمد لله ان عفشتها اللي بتدبدب في المطبات موطيتش العربيه و خليتها تبرك في الارض والا مكنتش حعرف اعدي اي مطب
وتصدق كنت ماشي بالعربيه 140 كم /س والحمد لله الفتيس لا اشتكى من تحميل و لا الموتور اشتكى من سرعه
وطبعا سفريتين شرم دول غير سفر اسكندريه مرتين في السنه و بيكون معايا الوالد و الوالده و طفلين 7 و 3 سنين ... وتخيل باخد معايا فوق الشنط عربيه اطفال .. بس الصراحه باخد الصغيره اللي بتتطبق مش الجريكو الكبيره

طيب حضرتك بتقول انك لو فرملت جامد حتتزحلق من على الكرسي تخبط في البرابريز ... ليه هو انت ناوي تطلع فوق التابلوه !!!
اصل التابلوه كبير و طويل و البرابريز بعيد اوي عنه !!
فبصراحه مش فاهم انت ازاي وقعت من على الكرسي ... هيا مره حصلت مع بنتي كانت قاعده جنبي و نامت وفرملت جامد شويه فتزحلقت في الدواسه ... بس هيا عندها سبع سنين ومن الحجم السمباتيك
ما علينا
عموما التابلوه خامته زي خامه اي عربيه كوري .. بلاستيكي ناشف .. لكن بقاله 4 سنين لا شقق و لا لونه غير و لا قشر ولا قال هات حته حته حته :)
الصاج ضعيف زي اي عربيه جديده دلوقتي يعني مش حاجه جديده بس انا دايما بسند على العربيه وعمري ما احتجت ارد صاج .. لكن فعلا مره واحد دخل جامد في الباب الوراني و خبط عليه جامد بايدي رديته تاني :)

بس انا عايز اسألك سؤال
انا لاحظت ان عضويتك بقالها سنه كامله من نوفمبر 2009
لكن مشاركاتك 4 بس كلهم في الموضوع ده اللي بقاله اكتر من 7 شهور
ايه يا باشا .. هو انت عملت عضويه في المنتدى و بعدين سافرت في حته مفياش نت و لا ايه !!!
ولا النت عندك ما بتلقطش غير الموضوع ده بالذات !!!!
يا ريت نشوف مشاركاتك و خبراتك في اقسام المنتدى المختلفه و فكك بقى من الموضوع

اقول كمان و لا تكتفي بذلك :)

رد: تجربتي مع الماتريكس(حازم خضر)
 

براحة علية شوية و النبى علشان انا قلبى ضعيف و على فكرة العربية اللى كانت معايا مانيوال مش اتوماتيك و لو معايا اتوماتيك كنت شقيت هدومى منها و فى ناس كتير قابلتهم فى التوكيل بيشتكوا من رائحة البنزين بسبب النظام الغبى بتاع الفلتر فى التانك يعنى انا مش حالة فردية زى ما انت فاكر و على العموم انت لو مغرم بها و بتتغاضى عن مساوئها بهذا الشكل فحلال عليك الماتريكس اما انا فالحمد لله تخلصت من سواقة الميكروباص الماتريكس اخيرا و نصحت الناس لوجه الله ليس اكثر لانى حكمت عليها بعقلى و ليس بعاطفتى و بحكم خبرتى كمهندس ميكانيكا و لكم الشكر و التقدير و كل عام و انتم بخير بمناسبة العيد .

رد: تجربتي مع الماتريكس(حازم خضر)
 

على حد علمي ففلتر البنزين تحت الكنبه مش في التانك
ويمكن انا رحت التوكيل اكتر من 15 مره وساعات كنت بقعد لحد ما العربيه تخلص ... يعني مش اقل من 4 ساعات و طبيعي اكلم الناس و ادردش معاهم .. بس يمكن ما قابلتش الناس اللي حضرتك قابلتهم وبيشتكو من ريحه البنزين
في النهايه والحمد لله طول عمري من الناس اللي بتحكم عقلها مش عواطفها بحكم خبرتي كمهندس معماري هههههه ودي علشان حد يقدر يحكم عليا فيها لازم يكون عارفني كويس اوي
الماتريكس من اول اجيال الام بي في من سنه 2002... فشكلها صندوقي فعلا ..
لكن وقتها كان شكلها احسن كتير من عربيات من نفس الفئه ... لو عايز تتفرج علر كائن فضاني دور على صور الفيات مالتيبلا
هما اتأخرو كتير في تغيير شكل الماتريكس لكن اخيرا حينزل بديل ليها الاي اكس 20
بس انت برضو مرديتش على سؤالي
واحب برضو اعرف منك لما تخلصت منها جبيت ايه كويس علشان الافاده
عموما كل سنه وانت طيب .... عيد سعيد

رد: تجربتي مع الماتريكس(حازم خضر)
 

بصوا انا علاقتي بالماتريكس اني كنت بشوف شكلها عاجبني و دي اذواق غير اني عملت تست دريف لموديل 2007 لفه موش اكتر بس هقول بالعقل كدة لو كانت العربية وحشة ازاي كانت انتشرت الانتشار الكبير ده في مصر ؟ و ازاي سعر اعادة بعها فوق الممتاز انا بتكلم علي اللي بشوفه علي كونتاكت كار غير اني عايش حاليا في الامارات و اكتر عربية عليها علامة هيونداي ماشية في الشوارع هنا هي الماتريكس يبقي ازاي بعد ده كله تبقي عربية سيئة اوي كدة ؟
موش بردو في عقل ؟؟؟؟؟؟

رد: تجربتي مع الماتريكس(حازم خضر)
 

رد: تجربتي مع الماتريكس(حازم خضر)
 

ألف مبروك عليك ياباشا المرسيدس وأكيد كلنا عارفين وضع السوق المصري وعارفين كمان إمكانيات المشتريين. ياعني مش محتاجين تفكرنا بوضعنا لأليم.
بانسبة للعربيات المتخلفة تكنولوجيا أو تصميميا فاحضرتك بتتكلم عن أرخص سيارات من فئتها في السوق وأنا شخصيا أحد المستخدمين الغاويين توفير ياعني لو جه الوكيل وقالي هشيل الطاسات من عربيتك وأوفرلك في تمنها 300 جنيه هوافق.
ولولا إختلاف الأذواق لبارت السلع.
عايزين قريب ان شاء الله تبقى تعملنا تقرير ياباشا عن المرسيدس كدة إن شاء الله.