رد: عملت كام حادثة مع الستات في حياتك؟
 

كنت حعمل حادثة فى شارع 45 فى الاسكندرية
فى اخرة يعني , الملف الى بعد الطريق الدولي
الى بتاخدة على شان تطلع على البحر
انا كنت مطول مكنتش ناوي اخد الملف
انا ماشي والملف قدامي بـ 4 متر او 3 متر
والشارع مليان عربيات ولقيت عربية على اليمين ومش مدية اشارة ولا حاجة قلت فلة انا صح والى ماشي صح
وفجأة .؟.!!
ومرة واحدة ودون سابق انذار لاقيتها حدفت علية حدفة منيلة بنيلة MADDRIVE
وانا كمان دون سابق انذار معرفش ازاي ايدي نزلت على الهاند بريك وعملت حتة خمسة فى الشارع كنت حلبس فى الرصيف
الحاجة الى فرستني جدا
ان بعد ما عدت من قدامي بصيتلي بصة وكأني راكب عربية كارو
وبيني وبينكم انا كنت نازل على شان اهزق الى سايق العربية بس طبعا لقيتها ست مينفعش ومفيش حتي اعتزار ولا كأنها عملت اى حاجة .
بقيت واقف فى الشارع بضرب كف على كف ومن يومها وانا بخاف امشي جنب ستات وسابقا كنت بخاف امشي جنب التريلات
بقت ستات وتريلات .. "الاتنين فى نظرى واحد "
خليهم فى حالهم وانا فى حالة

رد: عملت كام حادثة مع الستات في حياتك؟
 

يااااه انا جيت متاخر اوووى

طبعا واضح التجنى الرهيب على البنات فى السواقه

انا متدعيش انى سواقه ماهره لانى لسه سنه اولى سواقه لكن على الاقل ملتزمه جدا جدا بقوانين السواقه الحمد الله

بس تقول ايه بقى لما اكون ماشيه فى وسط البلد والاقى واحد ابن حلال منه لله بياخد غرز ضيقه جدااااا ويخبطلى الاكصدام واديله كلاكس وهو يكمل علشان البيه يعدى والاقى انا الاكصدام على الارض ؟؟؟؟؟؟ ودى اتعملت فيا مرتين منهم واحده كنا فى اشاره والحمد الله الظابط جابلى حقى وتانى مره كنا عدينا الاشاره ومشافش حاجه والبيه المحترم جرى

ادى مثال لسواقه الولاد المتهوره ومنه لله كل ما افتكر الموقف دمى يتحرق

وعلشان اكون حقانيه قابلت بنات فعلا بطييييييييييييخ

واحده مره لقيتها بتكسر عليا بغبااااااااااء متناهى فانا هديت بسرعه والحمد الله مكانش حد ورايا ولقيت الهانم بعد ما عدتلى بتشاورلى باديها بتزعقلى

فقرصت على العربيه وجبتها وفتحت ازاى وقلتلها انتى بتكسرى عليا وبتزعقى كمان الله يخربيت اللى علمك السواقه يا شيخه حرقتلى دمىىى

ومره تانيه ودى الطامه الكبرى

كنت خارجه من المنصوره عند ملف كده الشارع كان فاااااااضى وهو اصلا الشارع واسع فانا واخده سرعتى على 60 تقريبا وقلت ههدى قبل الملف بشويه
وفجأه الاقى عربيه شاهين طالعه صاروخ من شارع جانبى على يوترن قدامها على طول من ستر ربنا انى كان بينى وبينها مسافه ومفيش حد لا جمبى ولا ورايا فعرفت اتصرف

دول اغبى حالتين شفتهم بصراحه

يععنى زى ما فيه بنات مش بتعرف تسوق فى ولاد كتير سواقه متهوره جدااا وميهموش ايه اللى يحصل هو يخبط ويجرى

رد: عملت كام حادثة مع الستات في حياتك؟
 

رد: عملت كام حادثة مع الستات في حياتك؟
 

كنت رايح مشوار ومعايا العائلة وعلى اول كبري قصر النيل وحدة روشة ومعاها اصحابها وطلعة وكانها لوحدها في الشارع وجبتلي الباب اليمين ورا المهم انا ركنت ونزلت اشوف فيه ايه وهي لقيتها عدلت نفسها وبتخلع ، مشفتش ادامي ورحت فاتح وراها جبتها عند مدخل الاوبرا وحدفت عليها جامد ركنت نزلت بصراحه انفجرة فيها وبكل برود اصحابها يقولو احنا اول مرة نشوف واحد بيزعق لبنت ، بس كان معايا خالي خدني ومشينا ولا كنت هحط عليهم كلهم ، بصراحه معظمهم ملهمش فيها ونزلين يرازو في خلق الله .

رد: عملت كام حادثة مع الستات في حياتك؟
 

بصراحة البلد ما عادش فيها حد بيعرف يسوق كله ماشى بالبركة , سواء كانوا ستات او سواقين نقل او تاكسجية او سواقين ملاكى او سواقين ميكروباص , عشان كدة الواحد بقى مطريها و مش فارقة معايا مين اللى غلطان و مين اللى على حق :)

رد: عملت كام حادثة مع الستات في حياتك؟
 

اعتبرها عربية اسعاف وخليها تعدى هيا الاول حرصا على عربيتك :crazyW14:

رد: عملت كام حادثة مع الستات في حياتك؟
 

كل حوادثي كانت مع واحدة ست مفيش حادثة عملتها مع اي حد غير الستات MADMADMAD
بس الستات هما اللي بيخبطوني مش انا اللي بيخبط
وكانوا حوالي 3 مليار مليار مليار حادثة