المشاركة الأصلية كتبت بواسطة yabulaila (المشاركة 790536)

يا جماعه انتو خليتوني اقرأ ال 14 صفحه و أعيش معكم هذه الموقعه الجميله و فى الآخر سوف أقول رأي و الذي بنيته بعد مايقرب من 4 شهور من البحوث سواء على النت أو فى الشارع
أولا انا كان كل ما اتمناه هو عربيه اوتو علشان السواقه فى مصر بقت شئ لا يطاق و انا عجزت خلاص و بقتش استحمل لعبة حرب الشوارع اللى بلعبها كل يوم الصبح و طبعا الميزانيه التى كانت مطروحه كانت فى حدود ال85000 و بالتالى فان الاختيارات محدوده ففى الأول كان المطروح هو الفيرنا و سعرها كان فى حدود ال83000 و بدأت رحلة البحث والتحرى ووجدت ان الكل يتحدث عن ان فراملها سيئه ثم حدثت الصدمه الكبرى و هى اننى شاهدت العربيه وجها لوجه و جلست داخلها و هنا كانت الصدمه فالسياره لا تساوى ابدا هذا المبلغ فهى فى الآخر 128 معاد صياغتها و ضيقه من الداخل و كابينتها فقيره الى اقصي درجه
بعد ذلك توجهت الى اللوجان و الأوتو بتاعها فى حدود ال 80000 و لكنى لم استمر معها سوى بضعة أيام لأنى شاهدت حادثه لها فى شارع المنصه حدثت امام عيني عندما دخل موتوسيكل فى شنطة اللوجان بسرعه لا تقل عن 80 ك / س ووجدت ان الشنطه اصبحت على شكل حرف V ووصلت الخبطه الى الكنبه الخلفيه و اتكسر الزجاج الخلفى
بعد ذلك توجهت الى ال BYD F3 و ثمن الأوتو 84000 لكن بجميع الكماليات حتى فتحة السقف و فعلا العربيه جميله و بدأت اسال سائقى التاكسي عنها فوجدت بعضهم يقول عنها انها رائعه و بعضهم يسب و يلعن فيها و هنا جاء دور النت و بدأت الرحله بالتعرف الى موقع مصرموتورز و من يومها أصبح هو صديقى الوحيد و أصبح هو المصدر الوحيد لى لمعرفة أخبار سوق السيارات فى مصر و عرفت منه انه توجد مشاكل عديده فى التقفيل المصرى لل F3 و كذلك توجد مشكله فى السخونه الزائفه و عندما كنت فى احد المرات اسأل احد باعة قطع الغيار عن اسعار قطع غيارها قال لى الآتى اذا كنت تبحث عن سياره اقتصاديه فخد ال F3 اما اذا كنت تبحث عن الفخامه فعليك بال بريليانس سواء ال FRV او ال FSV و هنا وجهت الدفه مره اخري و ذهبت الى التوكيل فى الملتقى العربي وشاهدت السياره ال FSV التي كانت معروضه هناك و ده كان خلال شهر رمضان الماضى ووجدت فعلا سياره و لا فى الأحلام فقد كانت فعلا جميله من جميع النواحى فخامه فى التقفيل الداخلى تفوق الوصف و الأوتو ستيبترونيك و التكييف تتش و المقصوره الداخليه رحبه و حوض الموتور واسع و الواحد يقدر يشتغل فيه و هو سعيد و السعر كان ساعتها 88000 لكن و خلى بالك من لكن العربيه دى للعرض فقط و العربيه اللى للبيع تختلف شويه فى المواصفات يعنى بدون فتحة السقف و بدون الفرش الجلد و حتتوفر فى نص شهر 10 و ادفع 5000 جنيه حجز و تستلم فى نص 10 و كنت فعلا حادفع و حدثت ظروف مرض والدى و طبعا اتشغلت و مرحتش و بعدين رحتلهم فى نص شهر 10 ووجدت السيارات وصلت فعلا و السعر أصبح 89000 و السياره المعروضه هى اللى بتتباع فى السوق و هنا كانت الصدمه مره أخرى فشتان مابين التى شاهدتها فى الأول و بين هذه فالتشطيب اختلف تماما حتى فتح الباب اختلف صوته و طبعا بدون فتحة السقف و بدون الفرش الجلد و بدون جهاز الأنذار و البور ستيرنج اصبح هيدروليك بعد ان كان كهربائى و الموتور 1500 بعد ان كان 1600
بصراحه نفسي قفلت منها لأنى شاهدت العربيه الفخمه فى الأول يمكن لوكنت شفت الموجوده دلوقت فى الأول مكانش حصلى كده
بعد كده ابتدأت اعرف منكم عن الأميجراند و بدأت رحلة البحث عن اخبارها على النت وو جدت منتديات فى الكويت و السعوديه تتكلم عنها و بحكم عيشتي الطويله فى الكويت فان السوق هناك لا يصمد فيها غير المنتج القوى لأن طبيعة الجو و كثرة المعروض لا يستطيع ان ينافس فيها غير القوى و للشهاده فقد و جدت تقييمات جيده عن هذه السياره هناك و من متخصصين يقوم الوكيل هناك بتسليمهم سياره و يقوموا باستعمالها لمده من الزمن ثم يقوموا بنشر رأيهم فيها
ويوم الأربعاء الماضي قبل العيد وجدت نفسي فى المهندسين و ذهبت المعرض و شاهدتها على الطبيعه و بدون اي مجامله السياره من الخارج تبدو جميله جدا و من الداخل ايضا الفرش فخم و التابلوه متسق و كافة الكماليات متوفره و لكن طبعا الحلو ما يكملش اللتفنيش مش اوي و المعجون مابين الفواصل الداخليه كان واحد ملحوسه بصباعه و لكن فى الآخر هيه دي امكانيات العامل المصرى و على فكره اي واحد ركب مرسيدس او BM مجمعه فى مصر حيحس بالفرق على طول
ففى المجمل العربيه ماشى حالها و حلوه بالنسبه لسعرها و لا عزاء للمستهلك المصرى الذى لا يجد من يحميه من جشع التجار و سرقة الحكومه له فى صورة الجمارك و للحديث بقيه

المشاركة الأصلية كتبت بواسطة takakan2005 (المشاركة 790809)

من جوبلز أستاذ غبور للجيلى الأيمجراند يا قلبى لا تحزن جوبلز وزير الدعاية لهتلر قال إكذب ثم إكذب ثم إكذب حتى يصدقك الناس
ويبدو أن غبور من تلاميذ جوبلز
السيارة إيمجراند تبنى دعايتها على أنها واخده 4 نجوم فى إختبرات الأمان والتصادم الأوروبية مستفيدة من خبرات شركة فولفو اللى إشترتها جيلى .......إالخ

ولكن طبعآ السيارة اللى واخدة الدرجة دى بالقطع مش اللى متقفلة فى مصر
فمثلآ ......مثلآ يعنى اللحامات اللى كانت فى السيارة الصينية كانت ببنط اللحام العادية المصرية ولا كانت بالروبوت والليزر

ومثلآ ....مثلا الأيرباجز كانت هى نفسها الموجودة فى التقفيل المصرى كما وكيفآ ولا أقل ولآ أكتر

ومثلآ مثلآ الشاسيه والزجاج .......إلخ اللى موجودين فى المصرى
- حسب قواعد وزارة الصناعة المصرى اللى لازم يكونوا بنسبة 40% على الأقل من مكونات السيارة - هما نفس اللى كانوا فى العربية اللى راحت الأختبار ولا دى كانت عربية متقفلة فى الصين وملهاش علاقة بالأسطى بلية بتاع اللحام إياه

دى السيارة اللى أخدت الدرجة دى فى الأختبارات لو كانت هى المصرى ده إحنا نبقى كده طولنا القمر بإيدينا ونبقى عدينا خلاص
:w6w200504112257276b....ي اعينى على النخع اللى عينى عينك

وقد قال المتنبى : وكم ذا بمصر من المضحكات ولكنه ضحك كالبكاء
وعجبى

المشاركة الأصلية كتبت بواسطة yabulaila (المشاركة 790980)

يا جماعه و الله احنا المصريين بنتعرض لأكبر عمليات نصب من كل التجار و فى كل السلع تقريبا مش العربيات بس و على فكره كل وكلاء العربيات زى الزفت محدش فيهم محترم و يلتزم بالمواصفات و لا يفرق معاه عوامل السلامه و الأمان المهم عندهم عوامل سلامة و امان جيوبهم لأ و الشئ الجديد اللى لاحظته فى السوق اليومين دول حكاية التسليم الفورى علشان تستلم فوري لازم تدفع المعلوم و ده يتراوح من 3000 الى 18000 على حسب قيمة العربيه يعنى مش كفايه سرقه فى ثمن العربيه و العموله اللى بيهبشها و الأبشون اللى لغيها من العربيه
على فكره ده موجود فى كل التوكيلات و بالذات فى التوكيلات اللى عربيتها عليها طلب
بالنسبه لموضوع الأميجراند انا ليه ملاحظه على الصاج بتاعها برضه لأنى عملت عليه فحص عن طريق الخبط عليه و طبعا احنا كلنا عارفين ان سمك الصاج بيبان من رنته و جدت ان صاجها مش قد كده يعنى هوه مش فى ردائة صاج الفيرنا و لا اللوجان لكن اكيد ده مش نفس نوعية الصاج اللى اجتازت بيه اختبارات الأمان الأوروبيه لأنى يومها سبت معرض الأميجراند و رحت على طول على معرض البريليانس و بصراحه كان فى فرق واضح فى سمك الصاج بتاع البريليانس محمل و شديد و لكن كما ذكرت قبل كده مشكلة و كيل البريليانس انه ملوش كلمه و ياخد منك 10000 جنيه مقدم حجز و يلففك حوالين نفسك كذا شهر من غير ما تعرف اي معلومه مفيده غير انهم فى كل دفعه بينقصوا فى جودة العربيه يعنى تبقي شايفها بحاله قبل ما تحجز و تروح تستلم بعد كام شهر بحاله تانيه خالص
انا مش عارف احنا لغاية امتى حنفضل فى الأرف ده و مفيش فايده فى النفوس مش عايزه تنضف يعنى مش كفايه سرقتنا من الحكومه اللى على فكره متغيرتش بسبب الثوره و لا حاجه بل على العكس انا شايف ان الحكومه سرقتها لينا زادت و لسه لما نشوف حكاية البنزين دى حترسا على ايه
فى الآخر انا خلاص حتجنن مش عارف اعمل ايه و لا اشتري ايه كله زي الزفت