مصر موتورز مجتمع السيارات - اية الفرق بي قيادة المانول والاتوماتيك ؟

بص يا باشا انا هقولك الملخص المفيد فى الموضوع ده بكل تفاصيله .. بس متنساش تدعيلى بالله عليك .. اتفقنا :balloons71:

دلوقتى انت راجل بتسوق مانيوال طول عمرك ودى حاجه كويسه جدا والاتوماتيك بالنسبالك هتبقى لعبه اطفال ....

هو الفتيس الاتوماتيك زى ما ليه مميزات بتكون ليه عيوب .. والمميزات والعيوب بتختلف من شخص لآخر .. يعنى ممكن مميزات بالنسبالك تبقى عيوب بالنسب لشخص تانى .. تمام ......

نيجى للناحيه العمليه .. انا هتكلم عن الفتيس الاتوماتيك اللى موجود فى اغلب العربيات الاتوماتيك العاديه .. مش العاليه اوى .. ودى بتكون غالبا 4 غيارات ...

الفتيس الاتوماتيك ليه اربع نقلات اساسيه ...

P وده هو وضع التعشيق .. زى بالظبط لما تبقى العربية اخده غيار وهى مبطله .. لو جيت تزقها تتزق سنه بسيطه جدا وتكلبش .. وده بتشتخدمه دايما لما تيجى تركن العربية .. يعنى لو هتنزل منها .. فى بعض العربيات للأمان المفتاح مش بيطلع الا على وضع P وده للامان ...

R وده المارشدير يعنى ترجع ورا ..معروف طبعا ..

N اللى هو natural يعنى كانك ممور الفتيس بالظبط فى المانيوال ..

D ده اهم وضع هو ده اللى بتمشى عليه طول الوقت .. وده بيخلى العربية تاخد كل غياراتها الاربعة .. والعربيه بتحدد الغيار المناسب بقياس سرعتها .. ومقدار ضغطك للبنزين .. وعدد لفات الموتور ... وده من خلال حساسات على الفتيس وحساسات البوابه (بالنسبه للانجيكشن) ...

بيكون غالبا فى غيارين او تلاته اضافيين فى اى فتيس اتوماتيك ..

L او 1 .. وده بيخلى العربيه تمشى على الغيار الاول فقط وبتديلك احساس المانيوال فى عزمها بس طبعا الغيار الاول فى الاتوماتيك روحه اعلى من المانيوال لانه بيمشى العربية شويه مش مجرد بيطلعها بس زى المانيوال ... طبعا استخدامه لو طالع منحدر عالى زى مدخل جراج مثلا او رصيف او كوبرى عالى ...

2 وده بيخلى العربية تمشى على الغيار الاول وتنقل للتانى بس من غير لا تالت ولا رابع .. وفى بعض الفتايس بيخلى العربية تمشى على التانى فقط من غير الاول .. بس الاغلب الحاله الاولى .... الوضع ده استخدامه متعدد ممكن مثلا تستعمله فى نزول منحدر حاد او بحيث العربية تبقى اخده التانى ومكلبشه شويه فمتبقاش محتاج الفرامل اوى .. او اى ظرف تبقى محتاج فيه الغيار التانى بس ...

3 (فى بعض الفتايس) وده نفس النظام بيخلى العربية تنقل لغايه التالت فقط ... وده استخدامه على السرعات العاليه لو عاوز تاخد غرزه او تطلع من مقطوره او غيره .. لكن طبعا ممكن تزود بنزين والعربية من نفسها هتسقط غيار ..

فنقدر نقول ان اوضاع L و 2 و 3 استخدامهم غير اساسى ..

لكن الاساسى هو P و R و N و D ......

طبعا مفيش بدال للدبرياج فى الفتيس الاتوماتيك وبالتالى رجلك الشمال مش بتعمل بيها حاجه ..

اول ما تعشق اى غيار حركه D او R او L او 2 او 3 .. هتلاقى العربية بتمشى سلانسيه معاك .. كأنها اخده الاول وماشيه لواحدها وانت مش دايس حاجة خالص ... وعلشان توقفها تدوس فرامل عادى وطبعا مش هتطفى زى المانيوال وهى دى الميزه فى الاتوماتيك .. ان مستحيل العربية تطفى الا بالمفتاح (الا طبعا لو فيها عطل) .. ولما تشيل رجلك من على الفرامل تمشى تانى لوحدها سلانسيه ..

الفتيس الاتوماتيك لما بتشيل رجلك من على البنزين الـ RPM بينزل كأنك دوست دبرياج فى المانيوال .. ودى حاجه بتخلى استخدامك للفرامل اكتر فى الاتوماتيك عن المانيوال وبالتالى تيل الفرامل فى الاتوماتيك عمره اقل شويه من المانيوال ....

كده يبقى انا كلمتك عن كيفيه سواقه الاتوماتيك ...

ناقص اقولك على الفروق ما بينه ومابين المانيوال فى الاداء ..

طول عمر الفتيس المانيوال هو فتيس الاداء والسرعه والجرى وكده .. والاتوماتيك هو فتيس الراحه والهدوء والسهوله والزحمه كمان ...

فالفتيس الاتوماتيك بيتنقل العزم فيه بضغط الزيت (هيدروليكيا) مش ميكانيكيا زى المانيوال (الديسك والاسطوانه) فلازم يكون عزمه اقل وفى جزء صغير من عزم المحرك مهدور فى العمليه دى ...

فدايما تلاقى العربية المانيوال اسرع من الاتوماتيك (لو نفس النوع والموتور) ..

المانيوال فى المناوره امتع واحلى .. يعنى فى الغرز والشد وكده الاتوماتيك مش هيديك اللى انت عاوزه .....

بالنسبه بقى للفتيس الستب ترونيك فده ما هو الا فتيس اتوماتيك عادى بس مزود بخاصيه تمكنك انك تنقل النقلات بمزاجك .. شبه المانيوال من خلال ان تزود نقله او تنقص نقله + و - .. بس ده انا شايفه مش عملى وهتستخدمه فى اوقات معينه بس زيه زى اوضاع L و 2 و 3 .. وعلى فكره الفتيس اللى فيه ستب ترونيك + و - مش بيكون فيه غير P و R و N و D ......