مصر موتورز مجتمع السيارات - لماذا اشتريتك يا لوجان ؟

الف الف شكر على اهتمامكم و ردودكم الجميلة ..
و نكمل ..
الحمد لله خدنا قرار اللوجان ..صح او غلط خدناه و خلاص ..
و فضل قصة هنجيبها ازاي و منين ..
و كشاب مسلم كان اول اتجاهاتي الاسلامي ..
و اتكسفت و اتنرفزت و طنشت ..
15 % فايدة على 50% ..
و سنتين بس
و ضمانات رهيبة ..و ورقة من هنا و ورقة من هنا كأني ماوريش غيرهم مثلا ..
مع اني كنت بدخل اي معرض و اقول 50 % مقدم و يقولولي بطاقتك و بس يا باشا ..
و ادفع نص تمن العربية ليه ..و موش مهم الفلوس ..اتبهدل في الورق ده صعب جدا على ..
و قالك اذا كنت مضطر فميش مشكلة ..
و انا مضطر ..
زي ما قلت انا العربية لي موش كماليات دي ايدي و رجلي علشان شغلي ..
فاستخرت الله و طلبت مغفرته .. و قسط عادي تبع البنك ..
و خليته قسط سيارة و مرضيتش اخد قرض صرف و اكيش العربية و ارخصها تلات سنين و اخلص .. و ربنا يسامح لو ده غلط ..
و اخترت بنك القاهرة ..
علشان عامل برنامج كويس لل 50 % مقدم ..
فايدة 7.8 % للتلات سنين تقسيط ..
و فقط بصورة البطاقة و وصل النور .. :pod_of_gold:
و الاستعلام مجانا .. و خلص في 48 ساعة ..
اما جبتها منين بقى فده قمة الكوميديا .. و اكبر تطبيق للمثل جت مع الهبل دوبل ..
كنا عملنا موضوع هنا نشتري اللوجان منين ..
و الناس كلها اجمعت على سمير ريان ..
و لذلك اتجهت من فور رجوعي من طابا اليه مباشرة ..
و اتفرجت على العربية و الناس هناك قابلوني باهتمام شديد ( عكس المصرية مثلا )
و قالولي تعمل استعلام بنك القاهرة ..
ببلاش يا اخوانا ؟؟
ببلاش .. طيب اعمل
و الطارق كان جنب الشغل عندي في المهندسين..
تعمل استعلام بنك عودة ؟؟
ببلاش ... طيب اعمل
و انا مروح البيت لقيتها معروضة في معرض جامد فحت عندنا في اكتوبر ..
دخلت و اتفرجت عليها ( للمرة الخمسين :121D6A~142:)
طب تعمل استعلام بنك القاهرة ..
انا عامل استعلام فعلا بس معرفش نتيجته ايه ..
حضرتك جت لك موافقة من زمان ..تحب نحول الموافقة هنا ..ماشي (جنب البيت و البنك و مفيش داعي للمشورة )
نسيت اقولكم انه المعارض كانت بتقول 71.5 و قافلة على كده ( وده اقل سعر وصلت ليه ..ناس كانت بتقول 72 و 73 الف كمان )
و اول ما قلت نحول الموافقة بدأ المزاد :hech:
تليفون من مبيعات سمير ريان ..يا باشا انت تؤمر و العربية عندنا ب 71 الف بس
قام الراجل في المعرض قالي 71 الف ..
و رن التليفون ..سمير ريان متنساش يا باشا الهدايا الميدالية و الدواسات واحنا تحت امرك
مليش دعوة ..انا عايز عبد الحليم يغني في الفرح ..:joy23:
البياع في اكتوبر 70 الف و نص .. و اي خدمة
سمير ريان ..اللي انت عايزه و هنبيعها بخسارة ..
البياع في اكتوبر ..70 الف و نص ..ومتدفعش مليم للمندوب بتاع الترخيص و لا حتى حساب المخالصة ..
و هنجيبلك عبد الحليم يغني في الفرح .. و يرقص كمان :shy:
و تليفون من بنك عودة .. ادفع فايدة اعلى و مفيش حظر بيع ..
و تليفون من الطارق ..و تليفون من معرض عربيات ..
هو السوق واقع الايام دي و لا ايه ..
المهم ..قلت اجيبها من جنب البيت و ربنا يكرم ..
و فعلا بعتوا معايا قرد في المرور و خلص كل حاجة في 1/2 ساعة..
و جبت اللوجان ..
و سقت اللوجان ..
و عامل بيها 500 كيلو دلوقتي ..
و نتكلم المرة الجاية عن انطباعاتي الاولية عنها ..
و طولت عليكم ..
تقبلوا سلامي جميعا ..GIFT4U