رد: متابعه يوم بيوم ل فك ماتور و عمل طقم شنبر
 

يا جماعه لي استفسارات عده
اولا بخصوص الكاربراتير
ملخص حاله الكاربراتير
كان الاكس والباب الثاني ملغيين فتم تشغيلهم وعمل 2 اكس و 2 باب جداد و صيانه كربراتير وبكات
النتيجه
عايرت العربية جوه البلد عامله 4 كيلو فى اللتر و بره البلد على سفر عامله 5 كيلو فى اللتر ومن الواضح ان النتيجه دي مش مقبوله
فكده هرجع تاني لخراط الكربراتير
وهل لازم اضبط الكربراتير قبل ما افتح واعمل شغل الماتور (طقم شنبر )

ثانيا الماتور

هل يمكن عمل طقم الشنبر فى اي وقت؟؟ صيفا او شتاء ( اعرف انه يفضل ان يكون الوقت شتاءً )

واذا اضطرتني الظروف لعمل طقم شنبر حاليا هل يكفي ان شاء الله لما الماتور يتركب اشغله بالليل بس مش الصبح

الرجاء المعونه

رد: متابعه يوم بيوم ل فك ماتور و عمل طقم شنبر
 

كده الكربراتير فيه حاجة غلط وميتسكتش عليه
اما عن طقم الشنبر فملوش علاقة بصيف او شتاء لكن الناس بتفضل الشتاء علشان اساس ان برودة الجو بتساعد ان الماتور حرارته متعلاش
وبعدين لو هتعمل دلوقتي الجو معقول ولما تخلص العربية خليها تخلص صفيحة وهيا واقفة عند المياكنيكي وكمل صفيحة وانت ماشي على سرعات اقل من 50 وبعدين اعمل مشوار طويل شوية على 80

رد: متابعه يوم بيوم ل فك ماتور و عمل طقم شنبر
 

الحمد لله تم المراد
اخيرا وبعد طول معاناه تم اليوم البدء في الاعمال الفعليه
نسبنا بقي من الفصحي
النهارده رحت على الميكانيكي و حل الماتور البدايه كنت معشم فى طقم شنبر وبس ولكن بعد كده لما فتح لقي فيه تعتيب ف بقت عمره شامله
و يادوبك لسه داخل دلوقت من الشارع وسايب العربية عنده و الماتور كل جزء فى مخرطه ( وش السلندر / البلوك )
وان شاء الله هاخدهم بكره و مش اظن هنلحق نركبه علشان يوم الاثنين اجازة
فيه صور معايا بس مش نافع انقلها دلوقت على الجهاز ان شاء الله الصبح انزلها
دلوقت يا جماعه عاوز اعرف حاجه
الميكانيكي ان شاء الله يعمل اللازم مع الماتور و اكيد هيبقي فيه له غسله من بره
فلو الغسله نتيجتها انه مش رجع ل اللون بتاعه ( اظن ان لون الماكينه فضي لون الالومنيوم ) فهل ينفع ارش الماتور بلون
ولو ينفع ومش هيكون له تأثير على حاجه استعمل انهي نوع الوان علشان يستحمل الحرارة و الشحوم والزيوت و يفضل على الماتور
نسيت اقول لكم اني اشتريت حاجه العمره للعربية و قطعت كلها على بعضها 950 جنيه
ان شاء الله هيكون فيه تفصيل اول ما الوقت يسمح
مستني منكم تعليقاتكم

رد: متابعه يوم بيوم ل فك ماتور و عمل طقم شنبر
 

مستنيين التفاصيل يا باشا علشان نقدر نتناقش بكلام مفيد ...

اهم شئ دلوقتى تقول تفاصيل حالة الموتور من جوه ...

يعنى فى تجريح كتير فى الشمايز ؟؟ وايه حالة البساتم ؟؟ وايه اخبار وش السلندر .. هل فيه اى تقفيع ؟؟؟

رد: متابعه يوم بيوم ل فك ماتور و عمل طقم شنبر
 

امبارح حلينا الماتور
http://img689.imageshack.us/i/photo0000.jpg/

http://img13.imageshack.us/i/photo0001f.jpg/




واول ما فك وش السلندر الميكانيكي قال لي ان فيه تعتيب فى غرف البساتم
مش كنت فاهم يعني ايه تعتيب قال لي حط صباعك وحسس على جدار الغرفة ف لقيت ان في فرق بين قمه جدار الغرفة و باقي الجدار قمه الجدار فيها خشانه اما باقي الجدار املس وفهمت ان ده التعتيب
ادي صورة صورتها ممكن تساعد
http://img849.imageshack.us/i/photo0003h.jpg/

وبعد كده كمل حل باقي الماتور و علقه زي الدبيحه

http://img263.imageshack.us/i/photo0002ev.jpg/

وبقي الماتور حتيتين حته اللى فيها الكامات و الصبابات وحته فيها البساتم و الشميز وباقي البلوك

http://img405.imageshack.us/i/23042011078.jpg/

ورحنا مكلمين واحد شغال على عربيته جه خدنا و طلعنا على خراط ساب عنده وش السلندر و قال له انه يشوف الصبابات حالتها ايه قال انها محتاجه طقم صباب خدنا منه اتنين صباب واحد كبير وواحد صغير ورحنا نجيب زيهم

طلعنا على الراجل بتاع قطع الغيار الميكانيكي جاب اللى عاوزه منه
ودى فاتورة خدتها مش عارف اكتب اللى فيها لان الخط مش مقري كويس ومش عارف افسره

وانا دفعت 950 جنيه و خدنا زجاجه جملكه و انبوبه سيلكون حراري هديه علشان الميكانيكي اتاقل على صاحب المحل كمنه صاحبه

جبنا الحاجه ووزعاها على اكتر من شنطه على حسب اللى القطع اللى هتخدم على شغل الصنايعيه
رحنا طالعين على خراط تاني سبنا عنده البساتم والبلوك
وادي صورة للفاتورة اللى احنا جبنا بيها الحاجه ومعلش مش عرفت اكتبها هنا لان في حاجات مش عارف اقراها

واحنا راجعين من عند خراط البلوك عاوزين نلحق نوصل لخراط وش السلندر لان الساعه داخله على 10 مساء
العربية اللى راكبنا خدت مطب جامد قام بيضه الدركسيون طلعت من مكانها
ام ايه اللى يحصل الميكانيكي فك القطمه اللى فيها البيضه وراح مع السواق يعملوها وسابوني جنب العربية فى طريق ساكت ( عند العصلوجي قبل المرور لو حد من الزقازيق حب يعرف ) وسابوني ساعه و الهوا عمال يلفح فيا لحد ما جم و مشينا بالعربية لحقنا الخراط اللى كان مستنينا

http://img121.imageshack.us/i/photo0004rh.jpg/

ده تفاصيل اللى حصل امبارح
بالنسبه لحاله البلوك مش سئلت الحقيقة لانى قفلت امبارح لانى كنت متوقع انها هتبقي طقم شنبر بس فلما الميكانيكي لقي فيه تعتيب فى غرف البساتم وقال ان عمره كامله
فهل الحاجات دي بتبان وقت الحل عند الميكانيكي ولا عند الخراط؟
اعتقد ان الشمايز هيا غرف البساتم فلو حضرتك تقصد ان فيها تجريح يعنى خطوط وكده فاللى شوفته انها ملساء من جوه ما عدا اول الشميز من فوق فيه حته حوالي اقل من عشره سنتي متر قبل ما الشميز يبقي املس
حاله البساتم مش فاهم ايه المقصود بيها ؟؟ هيا بساتم استاندر اصليه لان اول مره الماتور يتفك
وش السلندر
مش سئلت الاسئله دي لجهلي بالموقف لاني مش عملت عمره قبل كده ولا اعرف يتسئل علي ايه


http://img405.imageshack.us/g/23042011078.jpg/

رد: متابعه يوم بيوم ل فك ماتور و عمل طقم شنبر
 

صورة الفاتورة
http://img687.imageshack.us/i/24042011079.jpg/

http://img687.imageshack.us/i/24042011079.jpg/

رد: متابعه يوم بيوم ل فك ماتور و عمل طقم شنبر
 

تقرير اليوم تم احضار وش السلندر ( الحمد لله مش اتعمل له كشط كان سليم ) تكلفة اعمال الخراطه به 60 جنيه
وتم احضار البلوك و تكلفة اعمال الخراطه به 200 + 20 بقشيش للعمال
تم شراء قواعد موتور ب 30 جنيه و كان في ترس عندى منحول جبت واحد ب 30 برضه
التقرير بكره ان شاء الله لاني مهدود حيلي من وقفه الورش