مصر موتورز مجتمع السيارات - تقرير عن البرايد سايبا

اقتباس:

المشاركة الأصلية كتبت بواسطة أم رحمة (المشاركة 175992)

ا جماعة بجد محتاجة الرد على الأسئلة دي ضروري لأني بصدد شراء السيارة

وجزاكم الله خيرا

1- العربية عاملة كام كيلو معاك حتى الآن؟

عربيتى عاملة 60 الف الا شويه ومحصلش انى غيرت مسمار فى الموتور او الات الجر كل ما تم تغييره كاوتش وبطارية وبعض الاكسسوارات زى المقابض الداخليه والولاعه والفيبر عموماً سىء فعلاً لكن ديه مش اولوية خالص فى عربية بالسعر ده وبالاعتماديه والعملية والتوفير فى قطع غيارها وسهولة صيانتها واستهلاكها للبنزين وطبعا سعرها
غير كده فى العفشه غيرت كاوتشه ميزان واحدة والتيل وعلبه الدريكسيون بس بسبب حادثة مش عيب صناعة
وبالتالى تقدر تقول ان بعد 60 الف كم من الاستخدام اللى بجد شاق مفيش حاجة اساسية اتغيرت وكل اللى اتغير مستهلكات طبيعية

2- معنى كلامك عن الموتور ان لو حد حب يصلحه هيكون سهل؟ ولو لا قدر الله اضطر يغير الموتور
هيلاقي؟ واللا صعب

الموتور من اسهل ما يمكن ومحفوظ لاى حد شغال فى اليابانى بتاع التمانينيات والكورى بتاع التسعنيات وهو فى الاساس موتور مازدا اسمه B3 ومصنع بالتعاون مابين مازدا وفورد وبعدين اعادت تصنيعه كيا بنفس المواصفات ثم ايران بعد اضافه نظام ادارة المحرك من سيمنس ونظام حقن من بوش وهى نفس النظم المستخدمة فى سيارات كثيره منتشره ومجربه

يعنى الموتور سهل جداً ويركب بداله ال 1100 او 1300 بتاع الفورد فيستيفا او المازدا 121 المكببه ديه او البرايد الكورى القديم او المصرى او الايرانى كله واحد فى كل حاجة مع اعتبار فروق الانجكشن فقط ولو عايز تقلبها كربراتير مش هتقول لاء

3- بالنسبة لقطع الغيار الخارجية المختلفة عن البرايد زي الفوانيس ... هل دي موجودة فعلا ومتوفرة عند التوكيل وفي السوق واللا لأ؟

موجودة فى السوق وبقت موجودة فى مراكز الخدمة المعتمدة زى تكنو وان والكويت والبلاد العربية

4- في رأيك ما سعر إعادة البيع لها .... يعني لو الواحد جابها وحب يبعيها سواء بعد فترة قصيرة أو طويلة هتتباع؟؟ وفي حدود كام في تصورك؟

سعر اعادة البيع عامة جيد الى جيد جداً مقارنه بسعرها بمعنى ان على اسواء تقدير لما تخسر 15 او حتى عشرين بعد 3 - 4 سنين استخدام هتلاقى ان ركبتها بيهم فى السنه بخمس الاف او اقل وديه اقل تكلفه اقتناء عربية بالكماليات والاداء ده
وده على اسواء تقدير لكن فيه ناس مبتخسرش اكتر من 10 الاف من الزيرو او خمستاشر بالكتير

5- استهلاكها للبنزين قد ايه؟ كام كيلو في الصفيحة؟

240 - 320 حسب الحالة (الزيت والفلاتر والكاوتش ووو) وحسب طريقة القيادة والمسافه والسرعه والتحميل
يعنى لو محمل

6- ايه أخبار اتزانها وثباتها وخصوصا عند السرعات فوق ال 100 وال 120؟
لو هنتكلم على الستوك الكورى او الايرانى حتى 2006 فهو متوسط ويرتفع لجيد لو العربيه محملة او فيها اشخاص ورا وقدام خاصة الكورى العصفورة اثبت شويه لانها اقل قوه واصغر حجماً واعتقد ان المساعدين كمان افضل

بالنسبة للايرانى والمصرى السيدان حتى 2006 فهى عاليه شويه والمساعدين خفيفة شويه فمع الجنوط الصغيره 13 بوصة بتبقى خفيفه وحلها بالنسبالى تغيير الجنوط ب 14 ومقاس اعرض بيديك ثبات معقول لو لوحدك لل 120 او اكتر حسب سواقتك

ملحوظة مهمة انا مجربتش موديلات 2007 وما بعدها على سرعات فمش متاكد من تاثير تركيب الباور عليها او الجنوط الفابريكا الجديدة السبور اللى نازله معاها

طبعاً انا بتكلم عن الثبات فى المنحنيات والمناورة او مع مطبات الهواء لكن لو ماشى بيها طوالى عادى جداً

وانصح للى بيجرى بالعربية ديه يا اما ميجريش فوق ال 120
او يجرى بس وهو محمل مش والعربية فاضيه لان الموتور قوى على وزن العربية
او زى معملت يصرف ويغير طقم جنوط وكاوتش وان شاء الله لما المساعدين يريحو هجيب حاجة انشف شويه

7- في رأيك تعيش كام سنة قبل ما تفتح بؤها؟

العربيه بتفتح بؤها بس لما تهملها وده بيخلى اعطال كتير تظهر مره واحدة او بشكل متتابع لكن طول ما ايدك فيها وبتعملها صيانة وكشف دورى كل 20 الف كم حتى مش هتفتح بقها او هتحتاج تغير حاجة اساسية اول اربع خمس سنين زى اى عربيه محترمة

انا معايا برايد هاتش باك كورى مو 96 (عصفورة ) عامله اكتر من 180 الف كم
وبرايد سيدان ايرانى مو 2006 (ٍSABA) عامة حوالى 60 الف كم
الاتنين الحمد لله فابريكا دواخل وغالبيه الصاج وبمواتيرهم بفتيساتهم بالات الجر الاساسيه
وان شاء الله لما هكمل ال 60 الف للسابا او ال 200 للعصفورة هعمل تقارير كامله عنهم قريب