رينو كليو 2008

[Guitar Man]

الأول انا سعيد جدا انى انضميت للمنتدى الرائع دا

رينو كليو موديل 2008 مانويل ولونها اسود وحالتها جيدة

العربية دى قدامى وعجبانى جدا صراحة وشكلها جميل بس عايز أعرف هى تساوى كام تقريبا بالوصف اللى انا وصفته دا . وعلى فكرة انا معرفش ايه عيوبها او مميزاتها لان معلوماتى على قدى اوى فى العربيات عاما

وكمان عايز أعرف بالنسبة لقطع الغيار أسعارها ايه وهل قطع الغيار هتكون غالية اوى زى ما بسمع ؟

دى أول عربية ليا لانى حابب اشترى حاجة مستعملة بس تكون حاجة شكلها شيك ودى قدامى فقلت مفيش غير انى اسأل الأول علما بإنى فكرت فى الانسر موديل 2000 مثلا برده عربية شيك وحلوة بس لحد دلوقت مش عارف هل العربية دى هتكون احلى من انى اجيب لانسر موديل 2000 او 99 خاصة ان شكل الرينو شيك وظريف

بعتذر عن الأسئلة الكتيرة

وشكرااااااااا

[POP EL GAMED]

العربيه دى هتكون احسن بكتير من انك تجيب لانسر بقالها عشر سنين شغاله
تكنولوجيا اقل واقدم وقطع غيار ارخص
الرينو كليو اقوى موتور احدث امكانيات اعلى انجيكشن هتوفر معاك فى البنزين عن اللانسر لان اللانسر كاربيراتير
الكليو كعربيه بصراحه مشفتش حد بيشكى منها وحضرتك ممكن تتصفح القسم وهتلاقى بعض اسعار قطع الغيار كنت كاتبها لاخ لينا واحنا كلنا موجودين لو حضرتك احتجت تستفسر عن اى حاجه

[Guitar Man]

الف شكر يا بوب بجد كلامك فعلا صح

بس انا حبيت أسال عن قطع الغيار وعرفت انها أضعاف كتيرة بالنسبة للانسر خاصة الرينو لو كانت موديل 2008 مش اى موديل قديم يعنى

فهل كدة بالنسبة لانى اول مرة اشترى عربية فى حياتى هتكون مكلفة يعنى اكيد ممكن تتخبط ممكن تحتاج منى اى تكاليف فى النص كدة تطلع فجأة فكدة الموضوع هيكون مصاريف جامدة وكل شوية بعكس الانسر مقارنة بالفرنساوى مش هصرف خالص يعتبر

دى النقطة اللى اغلب الناس قالتهالى

وياريت تقولى الرينج بتاع سعرها يبقى كام بالمواصفات اللى كاتبها فى اول مشاركة وهى تقريبا حالتها كويسة مش وحشة اوى يعنى

والف شكر ليك بجد

[tronky]

العربية دى ماشية قد أيه و مطلوب فيها كام ؟؟

قطع غيار الكليو موجودة فى مصر الجديدة عند كذا واحد بس اللى فاكره منهم أسمه ميشيل حليم......و أعتقد أن الكليو ال 2008 مش فارقة فى أسعار قطع غيارها عن ال 2004 .......ممكن تكون فارقة بس فى فوانيس.....مرايات

و الله أعلم