إختبار قاسى للفيرنا

[lost2008]

الاسبوع الى فات حصل معايه موقف صعب , كنت رايح باليل حولى الساعه 12 لمزرعه على طريق الاسماعيليه , طبعا الطريق من اول مدخل الجمعيه عباره عن مدقات شديدة الوعوره و احيانا طرق رمليه صعب تمشى فيهه بعربيه سيدان عاديه, طبعا كان صعبان عليا اوى عربيتى الفيرنا " لسه يدوب عامله 3000 كيلو", المهم وصلت المزرعه و قعدت مع والدى شويه و قلت ارجع البيت تانى لانى كان ورايه مقابله مهمه تانى يوم, و انا راجع تهت قعدت اخش من طريق لطريق لحد مبقتش عارف انا فين بالزبط!!!!, و دخلت فى طرق يا جماعه مينفعش تمشى فيهه اكتر من الاول لو حاولت اجيب تانى تلاقى العربيه بتتهبد و طبعا الفيرنا واطيه جدا فكانت عينى فى وسط راسى, المهم لمحت طريق الاسماعيليه الصحراوى من بعيد و حاولت اوصله و مشيت فى طريق اكتره رملى مش مدق لما لقيت الرمل كثافته بتزيد و العربيه بتعانى قلت اقف و ارجع بدهرى احسن, و هنا حصلت المشكله العربيه غرزت غرزه جامده حاولت اطلعهه من الغرز و حفرت تحت العجل و حطيت طوب لكن مفيش فايده و خفت على اسطوانة الدبرياج لطشيت و تبوظ, طبعا كانت الساعه حوالى 2 باليل و والدى اتصل يشوف انا وصلت ولا لسه, قلتله طبعا انى غرزت و معرفش انا فين, طبعا قبل كده حاولت ادور على حد اساله لكن ملقيتش , الطريق مهجور و اقرب مزرعه قعدت اخبط على بابهه كتير لكن مفيش حد عبرنى, و بصراحهه لو كان فيهه حد و مردش لازم اعزره برضه الحته يا جماعه مقطوعه و تقلق, المهم قررت ابات فى العربيه لغاية الصبح عشان ادور على حد معاه جرار او لودر يطلعنى من الغرز ده لان حتى العربيه النص نقل ممكن اوى يغرز, قديت ليله حلوه مع الناموس الصحراوى, لما طلع النهار حوالى الساعة 6 تقريبا اخيرا لقيت حد اساله انا فين, و ضحكت لما عرفت انى بعيد جدا عن المكان الى كنت فيه, الراجل استغرب اوى و قالى ايه الى دخلك فى الطريق ده, و قالى فيه جرار بيعدى كل يوم تقريبا من على اول الطريق حوالى نص كيلو من مكان عربيتى قلت كويس استناه, و اثناء انتظارى قلت اشوف وضع العربيه ايه بالزبط لان باليل طبعا مكنتش شايف كويس,, العربيه يا جماعه كان الاكصدام لحد نصه مغروز فى الرمل, ولما فتحت الكبوت لقيت الرمل لحد نص الموتور, طبعا اتنكدت جدا و قلت عوضى على الله, و ببطن العربيه كان جوه الرمله تخيلو!!!, ساعتهه عرفت قيمة ال 4x4 ptmnlo123per1127, المهم عدت الساعه و انا ملطوع على اول الطريق مستنى اى جرار معدى و مفيش اى حاجه!!, بعديهه بشويه لقيت ولدين من الى بيشتغلو فى المزارع معديين سالتهم على اى جرار او حتى لودر , واحد منهم دلنى على لودر بيجى عند مكان بعيد عنى بحوالى كيلو تقريبا رحت مع الولد و فعلا لقيت لودر واقف, رحت للسواق و حكيتله على الموقف قالى بسيطه ممكن اطلعك, دخلنا بقه فى مفاوضات الفلوس قالى يا بيه انا مبتلعش غير بالساعه و الساعه بتاعتى ب 80 جنيه, حاولت معاه لكن مفيش فايضه مش عاوز ينزل, وانا بصراحه كنت تعبان و قرفان و غرقان تراب و رمل من الحفر, وافقت على السعر بس قلتله بشرط تطلعهه بنضافه و براحه اوى, اتشعبت على سلم اللودر و وصلنا لحد العربيه و هوه كان معاه طبعا كابل صلب عشان يربطه فى العربيه, قلتله يجرهه من ورا احسن, لان لما حفرت تحت الاصدام الى قدام لقيت الحلقتين الى حيربط فيهم شكلهم ضعيف و كمان لان العربيه مايله لقدام نتيجة الغرز فممكن و هوه بيشد يبوظ الاكصدام, لقيت الحلقه الى ورا قويه و ملحومه فى الشاسيه شكلهه يطمن, توكلت على الله و ربطنا الوير الصلب فى حلقة الجر و بدا براحه اوى يشد العربيه لورا, الوير الصلب اتقطع مرتين, واضح ان الغرز كان جامد!!!, المهم طلعت العربيه من الغرز و الراجل خد حسابه, العربيه طبعا يا جماعه كانت غرقانه تراب و الرمل مع الندى الى كان باليل لازق فى الرفارف من جوه و بطن العربيه, دورت العربيه و فتحت الكبوت ابص بصه, طبعا الحمدلله انهم عاملين مصفح تحت الرادياتير و سربنتينة التكيف و ده عمل حمايه كويسه, المهم طلعت على طريق اسماعليه الصحراوى مروح على البيت اخيرا, العربيه ماشيه عادى معاده صوت كتل الرمل و هيه بتقع منهه, شغلت التكيف اشتغل تمام التمام و حرارة الموتور مظبوطه و كله زى الفل و كنت ماشى 140 كمان, تانى يوم خدتهه لمحطة البنزين عشان ارفع العربيه و اغسلهه من تحت و فوق و كله, نضفت الموتور بالهوا المضغوط و خصوصا الرادياتير و سربنتينه الالتكيف طبعا الراجل الى بينضف اتبهدل من كمية التراب و الرمل الى خرجت, و غسلت العربيه كويس من تحت و نضفت الصالون و كله رجع تمام التمام,, بصراحه بعد ستر ربنا طبعا, العربيه ديه بتستحمل بجد انا توقعت ان حيكون فيه اضرار خصوصا فى الموتور و العفشه ده لانى مشيت فى طريق شديد الوعوره لمسافة 50 كيلو تقريبا, لكن الحمدلله لما خدت العربيه كذا مشوار بعد كده محستش باى حاجه فى العفشه او الموتور,,

[Ahmed Anwer]

حمد الله علي سلامتك يا ريس ،،

بس ده انتا بهدلت نفسك جامد اووي

تبات ليله في العربية دي حاجة صعبة اوي ،،

عموما انا حصلي نفس الموقف ده مرتين بالفيرنا

مرة في جسر السويس دخلت في كوم رملة بتاع بنا

و قعدت ساعة افرك بالعربية

و العمال ،، انقذوني الحمد لله ،، رفعنا العربية و انطلقت بعد ساعة محاربة

و مرة تانية في التجمع الخامس

سعة فرك برده و العمال بقه منفعونشي بقه ساعتها

بس جابوا لوح خشب كبير و حطيناه في و سط العربية من ادام و رفعناها و انطلقت

و برده في المرتين الرمل كان واصل لنص العربية

و الحمد لله في المرتين محصلشي حاجة

بس انا كنت حاسس زي صوت الموتور قعد فيه تكته سنه بعدها كام يوم

و بعدين راحت ،،

و مرة طلعت فوق الرصيف و نزلت من الناحية التانية

اللي اثر بقه نزلت في حفرة بسرعة عوجت جنط ،،و اضطريت استبدله بالجنط الاستبن

الحمد لله حكاية الفرك بالعربية دي علي الفاضي خطر جدا خصوصا للفتيس الاوتوماتيك

[lost2008]

الله يسلمك يا باشا, و انا بايت فى العربيه اليوم ده قعدت افتكر ايام العذاب فى كلية ظباط الاحتياط و قلت فى نفسى الى انا فيه اهون كتير من الى شفته هناك ptmnlo123per1106, واضح من الى انت كاتبه ان ليك خبره مع الغرز و محاولات تطليع العربيه منه, بالنسبه للصوت الغريب فى الموتور انا برضه حسيت بيه قعد شويه بعدين راح, ممكن يكون من فتحة الهوا الى رايحه على الفلتلر بتاع الهوا, بس كويس انت فكرتنى افك فلتر الهوا و ابص عليه و انضفه,, بصراحه العربيه ديه مطلعتش ورق اوى زى مبيقولو

[DK.Cupo]

ربنا يسترها معاكم يارب
ومع الجميع
والله كويس ان الفيرنا استحملت كل المقاسي دي ptmnlo123per154

[AbOnOrA]

الف سلامة عليك يا لوست وكده بقى الاسم على مسمى ptmnlo123per154