سلبيات الشارع المصري تسبب الضغط و الشلل

[YahiaAshraf]

كل عام و حضراتكم بخير ....

طبعا عنوان الموضوع واضح ... و هو تصرفات بعض قائدي السيارات و المارة بالشارع المصري التي تسبب لمن يلتزم حالة ذهول و قد تصيبه بأرتفاع الضغط أو نوبة قلبية أو أزمة سكر أو شلل

فعلا هذا ماكاد أن يحدث لي بالامس و اليوم خلال قيادتي فقط داخل مدينة الرحاب من خلال عدة مواقف تعرضت لها و للأسف الناس أصبح لديها تبلد و برووووووود شديدين

(1).. الموقف الاول :
اثناء مروري بأحد ميادين الرحاب المزدحمة و تحديدا الميدان الواقع أمام منطقة البنوك و أذا بسيارة ميني باص متوقفة صف ثاني داخل الصينية علي اليمين مما سبب زحام شديد جدا و أرتباك لكافة الاتجاهات و عندما مررت من يساره سالت قائد السيارة الجالس داخلها يشاهد كل هذا الارتباك و كأنه يشاهد التليفزيون و لا علاقة له بما يحدث
- أنا : هو ده مكان ينفع تقف فيه ؟
- الأفندي : لأ ده مكان للنوم !!!

طبعا غلطان و بجح كمان


(2).. الموقف الثاني :
ايضا حدث بأحد الميادين و أثناء دوراني بالميدان للعودة الي الاتجاه الأخر من الطريق فوجئت بسيارة تقودها سيدة تدخل الصينية من الاتجاه العكسي لمجرد أختصار المسافة و كي لا تدور مع الصينية
طبعا توقفت امامها و أشرت اليها أن هذا تصرف خاطئ فأبتسمت و أشارت أنها تعرف و انها تعتذر

طيب استفدت أنا أيه من ابتسامتها و أعتذارها ؟؟


(3).. الموقف الثالث :
سائق تاكسي ابيض (وواضح أن هذه ليست فقط صفة اللون للتاكسي و لكنها صفة لطبيعة الدم الذي يسري بداخل هذا السائق) اثناء خروج السيارات من السوق الذي هو أتجاه واحد اذا بهذا السائق يدخل خطأ من الاتجاه العكسي و عندما اشرت له بالكلاكسات و الانوار و أخيرا بيدي أن هذا أتجاه عكسي تجاهلني و كأنه لايراني
بصراحة فكرت أعترضه و اتوقف امامه كي يستدير و يدخل من المدخل الصحيح كما أفعل عادة لكن الطريق كان مزدحم و الجو حار جدا و الدنيا صيام و أحتمالات حدوث أزمة وارد جدا

بس هاقول أيه .... حسبي الله و نعم الوكيل


(4).. الموقف الرابع :
سيارتين متوقفتين في اخر الشارع الرئيسي واحدة يمين وواحدة شمال و علي مدخل ميدان أخر

كان نفسي انزل و أجيب مسمار كبير و أخد العربيتين خط و أكتب لهم علي كل عربية بالمسمار :
" هذا نتيجة الركنة الخاطئة"


بصراحة ساعتها تمنيت لو أن سيارتي مثل تلك السيارة :


ياتري أنتوا أيه رأيكوا في اللي بيحصل ده ؟
و كيف يتم التعامل مع تلك الشخصيات الفوضوية ؟


منقووووووووووووول

[sherifabden]

ربنا يعدل الاحوال باذن الله .... واحسن حاجة انا بعملها علشان المواقف دي اني اطنش خاالص واخلى اعصابي باردة ودمي ابرد واقفل الازاز واشغل التكييف والكاسيت ... بس بصراحة الالنترا اللي في الصورة دي حلوة جدا نفسي في واحدة زييها علشان اي واحد يقرب ... البقاء لله ...

[SAMER_ENGINES]

نفسنا بجد السلبيات دى تتغير و مش بس فى السواقة و العربيات لكن فى كل حياتنا انا خالتى عايشة فى استراليا من حوالى 20 سنة و لما بتنزل مصر و تقعد جنبى او جنب اى حد من الاقارب فى العربية بتغمى عنيها طول الطريق فبجد حاجة تكسف لانى مصر اصبحت مناسبة جدا لاصحاب الضغظ المنخفض لانه بمجرد نزولهم للشارع هيرتفع ويصبح ربما اعلى من الطبيعى و لا عزاء لاصحاب الضغط المرتفع

[abdohtaby]

: 06A7D5~132::playing_music :

[الهولندى الطائر]

والله عندكم حق

3 نظريات بيحكموا الناس فى الشارع

وللاسف كلنا شركاء فى الجريمة

نظريات مسيطرة على المرور وعلى حياتنا بصفة عامة

بنطبقها ومش عارفين

نظرية ( طظ )

نظرية ( اعمل عبيط )

نظرية ( هو كده )

والسبب

الجهل المتفشى فى الناس

الانحطاط الاعلامى والميديا التليفزيونية الهابطة اليومية علينا فى الاعلانات والبرامج والمسلسلات

والرشوه المنتشرة فى قطاع المرور المصرى انتشار النار فى الهشيم

وتدنى مستوى الوعاظ الدينى

تروح الجامع تلاقى خطبة الجمعه عن الوضوء

ياناس حرام عليكم

اعملوا خطبه عن المرور وادابه

اعمل خطبه عن البلطجة المرورية

فى المدارس دورات المياه زى المقابر

ولا تعليم ولا دياوله

كانهم عايشين فى عالم واحنا فى عالم

يبقى فين القدوة

ومين اللى هنلاقيه صح علشان نمشى وراه ونبطل الغلط

كلنا بقينا غلط

طظ - اعمل عبيط - هو كده

قول علينا السلام