إزاز العربية إتكسر في خناقة

[TELEBK]

الحمد لله العظيم الذي لايحمد علي مكروه سواه ، النهاردة بعد الفطار فجأه لقيت صوت زعيق جامد في الشارع وضرب نار وصويت ، المهم خرجت لقيت الشارع عبارة عن معركة بين طرفين ، وكل طرف عبارة عن 40 شخص وكل واحد ماسك في إيد مطوة والإيد التانية طوبه وكله شغال ضرب في بعض ده غير ضرب النار ، والشارع كله عرضة 8 متر وكل شوية يرموا طوبه تيجي في عربية من العربيات إللي واقفة ، وطبعا محدش من الناس والسكان قادر ينزل في الشارع الكل خايف من الطوب وضرب النار .
المهم بعد ما المعركة ماخلصت نزلت شلت الغطا من علي العربية وبصيت عليها لقيت الإزاز الوراني بتاعها مفشفش خالص ، وهيه إكسبلوجن 2 وإزازها مختلف عن التريوس لإن فيه خرم زيادة من فوق ولازم يتركب في التوكيل وربنا يستر علي سعره ، ده غير إن فيه واحده جارتي معاها كيا سيراتو لسة جايباها الشهر ده إزازها الأمامي إتكسر وواحد تاني إزازه الأمامي برضة إتكسر والله أعلم مين تاني ، ده غير طبعا كام نقره في الصاج علي الكبوت الأمامي عندي نتيجة رمي الطوب .
وبعد كده عرفت إن الخناقة بين ناس عندنا في الشارع وبين جماعة تانية ، وإتصلت بالنجده قالولي تعرف حد تتهمة لما تروح تبلغ قولت ليهم لأ طبعا قالي إللي بيكلمني عوضك علي الله يعني حنروح نلم 40 واحد إزاي ، فمش عارف أعمل إيه هل أروح لطرف الخناقة إللي من عندنا وأتكلم معاهم وعلي فكره هما ناس لبط وبتوع مشاكل وفي الغالب مش حاخد منهم لاحق ولا باطل ، ولا أستعوض ربنا والحمد لله وفدا بناتي ، ولا أعمل إيه ، أنا من ساعتها ضغطي عالي ومش عارف أعمل إيه .

[AbOnOrA]

احتسب عند الله واسأل على تمنة بره التوكيل هتلاقيه ارخص بكتير ومش فارق حاجة

[sayed2077]

انا من راى استعوض ربنا فى الازاز ومفيش خير من انك تستعوض ربنا فى حاجه واطمن كده كده حقك هيرجعلك فى الدنيا او فى الاخره

[TELEBK]

المشاركة الأصلية كتبت بواسطة AbOnOrA احتسب عند الله واسأل على تمنة بره التوكيل هتلاقيه ارخص بكتير ومش فارق حاجة

هوه موجود بره التوكيل بس بتاع التريوس ، لكن فيه إختلاف فيه إن فيه خرم زياده فوق لزوم الإسبويلر بتاع العربية ، وده مش موجود غير في توكيلها ، يعني كده كده حيبقي في التوكيل ، وربنا يستر .

[TELEBK]

المشاركة الأصلية كتبت بواسطة sayed2077 انا من راى استعوض ربنا فى الازاز ومفيش خير من انك تستعوض ربنا فى حاجه واطمن كده كده حقك هيرجعلك فى الدنيا او فى الاخره

الخوف إن العملية ماتخلصش لإني عرفت إن فيه ناس إتعورت والخناقات ديه مابتخلصش في مره واحدة ، وربنا يستر علشان كده أنا مش عارف أعمل إيه .