كيفية استعمال مثبت السرعة في الجين 2

[mr_mody]

شباب انا لسة شاري عربية جين 2 ومش عارف اشغل مثبت السرعة ازاي
انا بضغط على زرار ON بينور في العداد علامة المثبت بس السرعة مش بتثبت وجربت احرك الدراع في كل اتجاة وبردو فشل زريع فهل لازم اكون انا مثبت رجلي على السرعة تثبيت اوي عشان تشتغل ولا كدة تبقى بايظة ولا اعمل اية يارب حد يفهمني
وشكرا ليكوا جداااااا

[momadine]

الجديدة مافيهاش مثبت سرعة أظن أخر موديل كان فيه موديل 2009

الا لو انت شاريها مستعملة

[mr_mody]

اه انا شاريها 2007 وفيها دراع مثبت في الطارة واللمبة بتنور معايا بس السرعة مش يتثبت نهائي

[momadine]

ده كلام من برة المنتدى مش أنا اللى كاتبه جرب يمكن يشتغل معاك:


========================= ================

1-زرار (ON/OFF) ...اول ما تدوس عليه هو مش بيعمل حاجه غير انه ينور لمبه صفرا عند العدادات و معناه تنبيهى فقط للخطوه القادمه
2-تحريك الذراع لفوق (SET) ... وده كده معناه ان انت شغلت مثبت السرعه على السرعه الحاليه للسيارة وهتلاقى اللمبه الصفرا بقى لونها أخضر
3-تحريك الذراع لفوق مره اخرى (ACC) ... كل مره بعد كده تحرك الذراع لفوق تزود السرعه بتاعه العربيه تقريبا وحوالى 2 كيلو ...يعنى لو كنت مظبط سرعتك على 80 وضغطت مره واحده هتبقى 82 ~مرة كمان تبقى 84 ~ وهكذا
4-تحريك الذراع لتحت (COAST) ... كل مره تحرك الذراع لتحت تقلل السرعه بتاعه العربيه تقريبا 2 كيلو ...يعنى لو كنت مظبط سرعتك على 80 وضغطت مره واحده هتبقى 78 ~مرة كمان تبقى 76 ~ وهكذا
5-الفرامل ...لما تدوس الفرامل هتفصل مثبت السرعه وسرعه العربيه هتقل وكمان هتلاقى اللمبه الخضرا اتحولت لللون الاصفر
6-تحريك الذراع (RES)... بعد لما دوست فرامل ومثبت السرعه فصل لما تحرك الذراع ناحيه (RES) هيرجع يشتغل تانى على نفس السرعه اللى كنت عليها قبل ضغط الفرامل
7-طيب افرض انك بعد لما دوست فرامل ومثبت السرعه فصل لما حركت الذراع وديته ناحيه (SET/ACC) كده هيرجع يشتغل تانى بس على السرعه الجديده اللى انت حاليا ماشى عليها
8- كان حد قالى ان غالبا مثبت السرعه ما بيشتغلش اقل من 40 كم ساعه وبالتالى لو انت سرعتك كانت اقل من كده وجيت تشغل مثبت السرعه هينور اللمبه الصفرا بس مش هيجيب معاك الخضرا , بصراحه مجربتش اشغله اقل من 80

===============

انتهى كلام الراجل اللى فوق ده

[mr_mody]

الف شكرا لحضرتك هجرب وربنا يسهل