معروض عليا فيليشيا 98 ارجو المساعدة ضروري

[ALi Attia]

السلام عليكم ورحمة الله
انا كنت بدور علي فيليشيا 97 حالة نضيفة و مش معايا غير 27000 المهم لقيت واحدة 98 وش اوكتافيا بس معروضة علي 33 الف_ كاربرتير وفبريكا جوة وبرا وتكييف وسنتر وانذار وزجاج كهربا وعاملة 120000 ك/م والرخصة سنة بأسم المالك, فقولت اشوفها واحاول اجمع الباقي لو عجبتني المهم روحت مع واحد صاحبي بيفهم وبيبيع ويشتري,

لقيت انها فعلا فبريكا جوا وبرة والموتور كويس بس التكييف عايز شحن والأنذار مش شغال والزجاج الكهربا متركبلها مش فبريكا والوش و الأكصدام مفكك كدة ومتبهدل وفيها كام خبطة بسيطة ( تحس انها فبريكة برا اهمال من صاحب العربية مش محافظة عليها ) ولسة صاحبها مركبلها فتيس استيراد بضمان 6 شهور , حاولت انزل السعر ل 29000 لكنه اخره كان 30000

ارجو من الزملاء الأفاضل انهم يقولولي اعمل ايه هل اتصرف في الباقي واخلص مع اني هحتاج اصرف عليها من ناحية النضافة بس لأن اساسيتها سليمة ولا اصبر شوية واشوف واحدة 97 حالتها كويسة وصاحبها منضفها

ولو نصحتوني اني اشتريها هل السعر ده كويس وعايز اعرف ثمن كام حاجة هاعوذ اشتريها عشان اظبطها شوية وهما:
.... بكام اكصدام امامي والوش نفسه إللي بين الفانوسين وتحتهم (وش اوكتافيا) ؟
.... بكام شحن التكيف وهل هيؤدي لتسخين العربية لو اشتغل ؟
.... بكام طارة الدركسيون لأنها متبهدلة ولازقها بشكرتون ؟
.... بكام رش الجنبين والمع العربية ؟

اسف جدا للأطالة بس انا معنديش اي خبرة ومتردد جدا لأنها اول عربية اشتريها ,,
ورجاء الرد سريعا
جزاكم الله كل خير

[ali farouk]

الفليشيا ناعمة وحلوة لكن يعيبها أنك لازم تتعرف على ميكانيكى سكودا لأن أى ميكانيكى تانى مش هينفع وهكلفك كتير وكمان قطع غيارها غالية بالنسبة لمن يماثلها زى الأكسنت مو 99 أو الأكسيل وكمان تقيلة فى إعادة البيع

[رمضان شوقى]

بصراحة و متزعلش منى الله ينعل الفليشيا على اللى صنعها بكرة تعرف السبب ربنا كتبلى عمر جديد لما بعتها موديل 97 متور زبالة حرارتها دايما مرتفعة بتضرب وش سلتدر على الأقل مرتين فى السنة تكييف ميت و اذا شغلته سوف ينهى الماتور تماما عفشة خشنة علاوة على نقص مية القربة باستمرار و لكن الميزة الوحيدة فى الفليشيا صاج قوى و يستحمل البهدلة و الله هى دية الحقيقة

[تامر1970]

المشاركة الأصلية كتبت بواسطة رمضان شوقى بصراحة و متزعلش منى الله ينعل الفليشيا على اللى صنعها بكرة تعرف السبب ربنا كتبلى عمر جديد لما بعتها موديل 97 متور زبالة حرارتها دايما مرتفعة بتضرب وش سلتدر على الأقل مرتين فى السنة تكييف ميت و اذا شغلته سوف ينهى الماتور تماما عفشة خشنة علاوة على نقص مية القربة باستمرار و لكن الميزة الوحيدة فى الفليشيا صاج قوى و يستحمل البهدلة و الله هى دية الحقيقة

يا استاذ رمضان لو حظك الوحش وقعك فى عربيه مش كويسه لانك لم تحسن الاختيار عند الشراء او اتدبست فيها ولم تستطيع التعامل الصحيح معها بالاصلاح والمحافظه عليها وصيانتها فده مش مبرر علشان تهاجم كل من يريد شراء فيليشيا 75% من الفيليشيا الموجوده مع الناس اعضاء المنتدى تقريبا زى الفل انصح المشترى يدور على ايه ويخلى باله من ايه علشان مايغلطش غلطتك على فكره اول امس شاريين موتور استيراد كامل بالكربراتير وكله حالته 10/10
من الاسكندريه ب 3000جم اعتقد عربيتك كان ده علاجها او كانت محتاجه ميكانيكى بيفهم علشان يلخص الحل الصحيح
وتقبل تحياتى قبل ماتعقدنى من عربيتى

[Hafdl21]

عندك حق يا استاذ تامر
انا مره ركبت عربيه سوزوكي سويفت بتاعة واحدصاحبي رحت بيها كام مشوار كرهت اليوم اللي اتولدت فيه
تاني يوم ركبت عربيه 128 مكنتش عاوز انزل منها :D