مشكلة في فرامل تيوتا كرولا.

[dr_eslam_66]

أنا معايا كرولا 2002 أوتوماتيك.
من كام يوم بدأت أسمع صوت زي سلسلة حديد كدة رفيعة بتجر في الأسفلت وأنا ماشي وماعرفتش دي كانت إيه.
وبعدين بدأ الموضوع يزيد ويبقى أوضح لما بدوس فرامل حاجة زي صوت حكة ودا في الفردة الي أمامية الي نحيتي أنا.
وتأكدت إنها وساخة مابين التيل والطنبورة لما الصوت بيبقى مستمر طول ما أنا ماشي وبيزيد قوي لما بدوس فرامل.
أنا عارف إني كدة غلط أمشي عليها كتير لأنها بتخشن سطح الطنبورة وبتبقى محتاجة تروح المخرطة تتنعم وأنا مش عايز أخش في مشاكل.
بس المشكلة بردو إني مش عارف أنضفه إزاي.
أكتر من مرة أفضل أصب مية على العجلة من جوة ياعني أكسر الدركسيون كامل لبرة وأصب مية كتير على المجموعة دي من جوة وأحاول على قد ما أقدر أنضفها بس فعلا الموضوع مش نافع ومش عارف أعمل إيه بعد ما بصب عليها مية بالكتير الصوت يهدى نص ساعة ولا ساعة ويرجع يظهر تاني.
ممكن حد يفيدني إزاي أنضف التيل؟
وأرجو لو سمحتوا يكون حاجة أقدر أعملها بسرعة كدة بنفسي لأني بس مش عارف أفضى أروح للمكانيكي.
ولكم جزيل الشكر مقدما.

[samehlila]

بسم الله الرحمن الرحيم
غالبا التيل محتاج تغيير و ده مش صوت تراب لان التراب من اول مسكة فرامل بيطير مع الاحتكاك انما ده صوت الحديد اللي باقي في التيل بيحتك بالطنبورة و انتا لما بتحط مية بتعمل زي تزييت مؤقت للمعدن و بعدين لما المية بتتبخر نتيجة حرارة الاحتكاك بيرجع الصوت تاني
غير التيل بسرعة قبل ما يفوت الوقت و تغير طقم طنابير

[dr_eslam_66]

المشاركة الأصلية كتبت بواسطة samehlila بسم الله الرحمن الرحيم غالبا التيل محتاج تغيير و ده مش صوت تراب لان التراب من اول مسكة فرامل بيطير مع الاحتكاك انما ده صوت الحديد اللي باقي في التيل بيحتك بالطنبورة و انتا لما بتحط مية بتعمل زي تزييت مؤقت للمعدن و بعدين لما المية بتتبخر نتيجة حرارة الاحتكاك بيرجع الصوت تاني غير التيل بسرعة قبل ما يفوت الوقت و تغير طقم طنابير

طيب ليه بيصفر سواء ماسك فرامل أو لأ لو التيل خلصان بيصفر لما أمسك بس.
أنا معاك إني الموضوع لازم يتم بسرعة علشان الطنابير بس كمان الفكرة إني مش عايز أغير حاجة مش عايزة تتغير.

[samehlila]

بسم الله الرحمن الرحيم
التيل لما بيخلص ساعات بيبقي فيه ترييح للتيل علي الطنبورة لأن المكبس بتاع الفرامل اللي بيحرك التيل بيبقي مش متعود علي المشوار الطويل ده فبيركن لان التيل هوه اللي بيجعه و مفيش سوستة بتشده مكانه و مش بالضرورة ان التيل انتهي تماما ممكن يكون البرشام بتاعه هوه اللي بيحك في الطنبورة
عموما كل دي احتمالات انا ماشوفتش العربية ولا حضرتك كمان فكيتها و مش هتغرم اكتر من نص ساعه لو حبيت تطمن انك تفك العجله كأنك بتغيرها و تبص علي الطنبورة لو فيها اي اثر احتكاك يبقي تغير التيل فورا
و اي خدمة
م - سامح ليله

[dr_eslam_66]

المشاركة الأصلية كتبت بواسطة samehlila بسم الله الرحمن الرحيم التيل لما بيخلص ساعات بيبقي فيه ترييح للتيل علي الطنبورة لأن المكبس بتاع الفرامل اللي بيحرك التيل بيبقي مش متعود علي المشوار الطويل ده فبيركن لان التيل هوه اللي بيجعه و مفيش سوستة بتشده مكانه و مش بالضرورة ان التيل انتهي تماما ممكن يكون البرشام بتاعه هوه اللي بيحك في الطنبورة عموما كل دي احتمالات انا ماشوفتش العربية ولا حضرتك كمان فكيتها و مش هتغرم اكتر من نص ساعه لو حبيت تطمن انك تفك العجله كأنك بتغيرها و تبص علي الطنبورة لو فيها اي اثر احتكاك يبقي تغير التيل فورا و اي خدمة م - سامح ليله

تمام يا بشمهندس.
متشكر قوي لحضرتك وكل الإخوة الي إهتموا وردوا.
الموضوع كان كالآتي التيل خلص بس ماكانشي بيصفر فاماعرفتش إنه خلص وماغيرتوش والطنبورة كان فيها أثر خرابيش وتموجات دائرية طبعا خلتني لما شوفتها بعتها للمخرطة تتنعم ودا الي ماكنتش عايز أقع فيه إطلاقا.
المهم زي ماتقول صنفرت الطنبورتين الأماميتين وغيرت التيل والصوت إختفى تمامااااا الحمد لله.
والتيل الخلفي لسة ماكانشي محتاج يتغير فاسبته.
السؤال بس لو سمحت:
إمتى أبص على التيل تاني الي إتغير دلوقتي دا علشان يتغير تاني؟