مقارنة:ايهما افضل الفيرنا فيفا ولا الشيفرولية لانوس 2012؟!

[Besso]

انا محتاج مساعدتكم محتار بعد بحث ملهب على مصر موتورز موقعى المفضلتقريبا من حوالى سنةقررات اشترى عربية بمقدم كويس وقسط الباقى بدات ابحث استشير فبدات بشركة اودى عايزحاجةتكون بحوالى 70الف ففكرت BYD F3 كان رايكم ابعد عنها دى تتقفيل مصرى ودى صينى ومترميش فلوسك قررت اصرف نظر عنها فكرت ال رينو لوجان حقيقى عربية عجبتنى لاكن عديلى مهندس مكانيكى وسمسار عربيات قالى ابعد عنها رغم شكر الاعضاء فيها لغلو قطع غيارها وعدم وجودة وسعرها بعد البيع سىء للغاية وكلامة كان صحيح بعد التداول مع الاعضاء فصرفت نظر عنها وعسان منساش قالى عديلى ونصحنى اما شيفرولية لانوس اوفيرنا .وبعد قراة وبحث قررات اختار ما بين الانوسLS2012 اوالفيرنا فيفا لانها احسن من الفيرنا العادية1600ccودا بعد بحث ايضا.وانا محتاج مساعدتكم وارائكم فى اختيار سيارتى؟ ارجوكم بعد كتابة مقارنتكم ايهما تفضل وتنصحنى بختيارها ولكم منى جزيل الشكر .

[owner]

انا معايا فيفا وبقولك لانوووووووووووووووووووس ومتفكرش اللانوس احسن بكتييييييير

[ahmed zawawy]

ولا فيرنا ولا لانوس بس لو لازم يبقي فيرنا بس العاديه مش فيفا

[MOSTAFA SALLAM]

بص دلوقتى زمن اللوجان و بعدين اللوجان متتقارنش بالعربيات دى من الأساس .
اللوجان عربية اوروبى تقفيل مصنع رينو بالدار البيضاء بالمغرب انما الانوس و الفيرنا كورى تقفيل مصر و دة مبدئيا كدة .
نيجى بئة لتانى حاجة اللوجان فئة اعلى من الانوس و الفيرنا .
اللوجان رخيصة علشان اتفاقية اغادير مش اكتر .
العربية دى لو نازلة بسعرها الأصلى مكنتش قلت عن 85000 جنيه و انا واثق و عارف كويس انا بقول ايه .
ثالثا مين قال ان اللوجان حاجتها غالية و مش متوفرة !!!
مش هقولك غير كلمة واحدة انزل و اسأل بنفسك و هتلاقى فى منها تيوانى و تركى و اصلى و طبعا كل حاجة و بتمنها و بعدين توكيل رينو يعد افضل توكيل فى مصر حاليا .
و كمان مين اللى قالك ان سعر اعادة بيع اللوجان رايح فى داهية !!
اقسم بالله انا عربيتى 2011 و جابتلى 64000 جنيه من 4 ايام و اول معرضتها لقيت كمية تلفونات بالهبل .
بص من الأخر اللوجان احتلت فئة من 60-75 الف جنيه و بعدين الناس اللى بتنتظرها بال3 شهور دول مش هبل يعنى و الأكتساح و النجاح الرهيب اللى حققته دة معناه انها عربية ممتازة و بعدين ملاكها كلهم بيشكروا فيها و انا واحد منهم و كل اللى ركبوها اجمعوا على انها عربية محترمة و لو كانت وحشة مكنتش الشرطة حجزتها و هتستلم بعد 5 شهور تقريبا .
بص لو عاوز عربية محترمة ( ثبات - ابشنز - تكيف ثلاجة - عافشة ناعمة - فرامل قوية - عربية عالية عن الأرض - واسعة - شيك - اسم عريق - توكيل محترم - عربية مميزة ) يبقى لوجان .
لو عاوز عربية بتتباع زى البدرة و صيانتها سهلة بس ( ثباتها وحش - فرامل ضعيفة - ابشنز عادية - صاج ورق - واطية على الأرض - تقفيل زبالة - تكيف سىء - توكيل الناس كلها بتسب و تلعن فيه يبقى لانوس او فيرنا ) .
فى النهاية مش عاوزك تتسرع فى اختيارك و عاوزك تفكر كويس و تحسبها صح و تختار العربية اللى انت مرتحلها نفسيا علشان انت مش هتدفع مبلغ قليل و كمان مش هتغير العربية كل يوم .
و ربنا يوفقك فى اختيارك و تقبل تحياتى .

[mody112]

باشا بص البريليانس fsv عربيه من الاخر صينى تقفيل البافاريه وفيها كل حاجة ومحترمة جدا جدا والكامله المانيوال ب78000 والهاف ب 73000