تقرير : F3 2012 أول 700 كيلو

[drpepo]

مساء الخير للجميع
اليوم بأذن الله أتى اليكم بتقريرى المتواضع عن السيارة
F3 2012 Manual
Full Option
السياارة بها ريموت كنترول وانذار وسنتر - زجاج كهربائى - زجاج خلفى فامية - مريات كهرباء - فوج لايت خلفى - تكييف - باور - امكانية تعديل وضع الطارة - فتح تانك البنزين والشنطة الخلفية من الداخل - 5 اطارات - كوريك - مفتاح مسامير - كاسي اوديو به خاصية ام بى ثرى - ولاعة- لمبة فرامل وسطى - الزجاج الخلفى مزود باسلاك تسخين لازالة الشبورة من على الزجاج - abs - ebd- airpages ومميزات اخرى
لكن لايوجـــــــــــد حساسات ركن خلفية
السيارة من حيث الاتساع جيدة جدا
السيارة من حيث العلو عن الأرض جيدة جدا
( اليوم اخدت مطبات بيها وكان معى العائلة يعنى كنا 5 أفراد ) والحمد لله لم اسمع اى حكة بالاسفل للسيارة
شكل السيارة فخم جدا لكن عيوب التقفيل المصرى واضحة فيه لكن بسيطة بعض الشئ واعتقد ان فخامة السيارة تغطى على عيوب التقفيل المصرى


استهلاك البنزين : بعدما رخصنا السيارة فولت العربية لغاية أول تكة وكان العداد 120 ك وذهبت بها من حلوان الى معرض الامل بمصر الجديدة وكان الطريق فعلا يوم الخميس امس في غاية الزحمة والبطءورجعت واليوم سافرت بها الى اسكندرية ورجعت وكان العداد 700 ك وفولتها لغاية اول تكة برضوا ولاقيت العربية أخدت فقط 34 لتر يعنى لو قولنا 35 لتر تقديرا لوجود اى اخطاء في الحساب لكل المسافة المقطوعة منذ يوم الخميس 580 ك واعتقد دا معدل كويس جدا جدا قيياسا الزحمة وانى احيانا كنت بحرق على الغيارات لسه لقلة خبرتى بالسيارة ولانى اول مرة اسوق عربية حديثة

السرعة التى وصلت اليها : مابين 80 - 110

الار بى ام لم يزيد عن 3 واحيانا 3 وشعرة ( مش بتوصل لغاية اول شرطة بعد 3 )
كنت فاتح جزء من زجاج السيارة في طريق الرجوع لكن وانا رايح لم يكن الزجاج مفتوح

العفشة : بصراحة رائعة جدا جدا جدا ... السيارة متماسكة على الطريق ودا يرجع لان الاطارات عريضة طبعا ... كنت ماشى على 110 ولم احس بالسرعة بل كنت مطمئنا جدا بينما لو كان الامر في اللادا 2107 مقلق جدا جدا

التكييف : جربت التكييف لمدة دقائق معدودة وكان التكييف تلاجة بجد ورائع ولم اشعر بتاثير على السحب او تغير في صوت الماتور لكن بعد صاينة الالف هركز فييه اكتر هل فعلا فى اى تاثيرات او لا

الفرامل : ممتازة لانها بتلم العربية في وقت اكثر من رائع

صوت السيارة والعزل : لا اسمع صوت الموتور نهائيا الا عندما يعدى الار بى ام عن 3 ببتدى اسمع صوت الموتور

اعتقد من عيوب السيالرة اولا التقفيل برضوا لسه مش احترافى وان كان وجاهة السيارة وفخامتها تغطى على هذا العيب نسبيا
ايضا البطارية ليست جافة اى انها سائلة و 55 امبير فلما ببتدى اشغل العربية النور العدادات بيبقى قوى اول ما اشغل نور التابلوه من الدراع النور بحس انه بيقل شوية مش عارف هل دا عيب جوهرى ولا عادى ياريت حد يفدنى في دى لكن بصراحة انا اول ما بدور العربية بتدور على طوول نشكر ربنا مش بتغلبنى رغم ان الجو سقعة

المجمل نشكر ربنا السيارة أكثر من رائعة نقدر نقول بالنسبة لسعرها انها ممتازة بتاخد مميزات كتيرة مقابل مبلغ بسيط نسبيا
ملاحظة : انا ملاحظ ان F3 2012 مفيهاش العيوب اللى الناس كانت بتقول عليها على الصينى بوجه عام والبى واى دى بوجه خاص الاصدرات اللى قبل دى واعتقد دى حاجة تحسب للتوكيل انه بيحسن من ادءه ونتمنى المزيد والمزيد من العطاء والنجاح
معلش اسف طولت علييكم واسف لو كان التقرير في تقصير انا اول مرة اعمل تقرير اساسا ولو حد ليه اى استفسارت انا تحت امركم

[shaibat]

ربنا يبارلك فيها وياريت تعرفنى حجزتها من معرض ولا من التوكيل وايه اللون الكويس فيها وسعرها كام والاستلام خلال اد ايه

الف مبروك
ربنا يديك خيرها ويمتعك بيها
ويبعد عنك شرها وشر قرها
وعقبال ماتعمل تقرير ال 700.000 كلم ان شاء الله

[drpepo]

المشاركة الأصلية كتبت بواسطة shaibat ربنا يبارلك فيها وياريت تعرفنى حجزتها من معرض ولا من التوكيل وايه اللون الكويس فيها وسعرها كام والاستلام خلال اد ايه

مساء الخير والدى جابها من معرض الامل في مصر الجديدة اعتقد دا يعتبر تبع التوكيل
احنا جبنا الاسود وبجد شكل العربية فخم جدا جدا جدا في هذا اللون وانصحك بيه بس عيبه ان التراب بيبان عليه يعنى لازم تنظف العربية باستمرار من اى اتربه
السعر كان 72 الف كاش وتقسيط 80 الف واحنا دفعنا نص مقدم والباقى تقسيط
ووبصراحة الاستاذة حنان تشكر اوى لانها سهلت لنا اجراءات البنك وخلصنا اجراءات البنك في 48 ساعة
وبمجرد ما بتخلص اجراءات البنك بتستلم العربية
وطبعا احنا مروحناش بيها الا بعد ما رخصناها علشان اجراءات الحظر البيع علشان دى تقسيط طبعا فالاستاذ عبد المنعم من المعرض جابها لينا لحد تراخيص حلوان ورخصاناها وسلمنا العربية وهو انسان فاضل
وبجد العربية رائعة استاذى الفاضل وسيبك من اللى بيقول انها صينى لان الصين لو مش بتصنع شئ كويس مكنتش تبقى رقم 1 على العالم ثانيا كل شئ بيعتمد على تعاملك انت يعنى انا شوفت لادا 2107 موديل 95 وتحسن كانها بقالها خمسين سنة رغم ان عربيتنا اللادا القديمة كانت حالتها حلوة جدا واتباعت في خلال 48 ساعة رغم انها موديل التمانينات
ربنا يوفقك وبجد انت اتكل على ربنا وربنا يدبر

[drpepo]

المشاركة الأصلية كتبت بواسطة walidelwahsh الف مبروك ربنا يديك خيرها ويمتعك بيها ويبعد عنك شرها وشر قرها وعقبال ماتعمل تقرير ال 700.000 كلم ان شاء الله

ههههههههه ربنا يخليك ياباشا بس نعيش لغاية اول 100 الف كيلو هههههههههههههه