مشروع تخرجى

[Mo7amed Elnimr]

السلام عليكم ازيكم يا اصحابى

انا جايبلكم النهاردة مشروع تخرجى سنة 2010

Electrical cheap car for poor Disabled people
سيارة كهربائية رخيصة للمعاقيين الفقراء

فكرة عملها
يمكن رسم احداثيات او مسارات لها وتقوم بالتحرك عن طريق هذة المسارات( يعنى لو المعاق حيستخدمها جوة الشقة مثلا احنا بنخزن عليها المسارات او بلان الشقة يعنى مثلا عايز يروح الحمام وهو فى الصالة كل اللى علية يدوس على الزرار اللى متخزن علية مكان الحمام وهى حتقوم بعملها )
يمكنها تفادى اى شئ امامها دون التصادم بة مع اعطاء تنبية صوتى
لايمكن قيادتها الا صاحبها عن طريق كلمة سر ( عشان السرقة )
دة غير ان مش شرط ان المعاق فى رجلة بس اللى يستخدمها احنا عملين ليها طارة دريكسون (باور كهرباء)
ويمكن توجيهها عن طريق اليد اليمنى والفرملة كذلك عن طريق دواسات كهربائية

احنا كنا ناويين لما نخلصها نقفلها بالفيبر بشكل حلو بس التكلفة عدت معانا والوقت مسعفناش فضلنا شغلين فيها لحد يوم المناقشة
فسبناها كدة عريانة وشكلها وحش بس مش مهم

الحمد لله وبفضلة تقدير المشروع امتياز لكل الجروب الحمد لله وكان المفروض حنخش بيها مسابقة وكدة بس انا كنت اشتغلت عالطول بعدها فكلو كسل وكبر دماغة
المشروع كلف مبالغ كبييرة جدا وتعب وسهر فى الورش و شغل الميكروكنترول طلع عينى

الكماليات

فرش جلد - فتحة سقف - طارة سبور - جنط 16 سلك
دة فيديو اثناء التجربة
انا اللى بسوق

http://www.youtube.com/watch?v=UADaWkhVbcs

http://www.youtube.com/watch?v=apxcJtaLHE4

[

http://www.youtube.com/watch?v=qS5YpdgBoQo

http://www.youtube.com/watch?v=TaZ8xUkNPFg

طبعا الشرح العلمى المفصل احنا عاملينة فى كتاب من 8 فصول لو فى اى حد عايزة ممكن ابعتلة نسخة سوفت من الكتاب او البرزنتيشن على باور بوينت بس بشرط بقى

تدعولى اصلى سيبت الشغل

[د.هبه77]

ما شاء الله مشروع جميل
ربنا يرفع بيكو شأن الأمة ويوسع رزقك يا رب امين
بس هو شغال ببطارية عربية عادية ؟
هو اتكلف كم المشروع دة اعتقد ان في كرسي متحرك كهربائي
هو يمكنه تفادي اي شئ امامه ازاي
هل هي فوتوسل ولا اية ؟؟؟

ايه يا عم الجمال ده بجد مشروع هايل بس انتا كنت هتاكل اتنين وانتا بتجربه ههههههههههههههه

ربنا يوفقك وحد ابن حلال يشوف المشروع ده وتعجبه فكرته ويخليك تمسكهوله

[Mo7amed Elnimr]

المشاركة الأصلية كتبت بواسطة corsair ايه يا عم الجمال ده بجد مشروع هايل بس انتا كنت هتاكل اتنين وانتا بتجربه ههههههههههههههه ربنا يوفقك وحد ابن حلال يشوف المشروع ده وتعجبه فكرته ويخليك تمسكهوله

ربنا يخليك يا corsair انا اكلت بية فعلا ولبست فى الرصيف
والناس فى المنطقة بقت تحدفنا بالطوب
والعيال الصغيرة ممكن لفة يا عمو

[Mo7amed Elnimr]

المشاركة الأصلية كتبت بواسطة د.هبه77 ما شاء الله مشروع جميل ربنا يرفع بيكو شأن الأمة ويوسع رزقك يا رب امين بس هو شغال ببطارية عربية عادية ؟ هو اتكلف كم المشروع دة اعتقد ان في كرسي متحرك كهربائي هو يمكنه تفادي اي شئ امامه ازاي هل هي فوتوسل ولا اية ؟؟؟

يمكنة تفادى اى شئ امامة عن طريق ultrasonic sensor مداة 80 سم لو فية حاجة ادامة بيبعت سيجنال للموتور بتاع steering
ودى كانت مشكلة من المشاكل اللى قابلتنا لأن سرعة الموتور كانت بطيئة اوى بالذات لو فى حد راكب
فالعربية بتلبس قبل لما تفادى بس تم حلها بعد ما عملنا تعديل صغير يشبة للجيربوكس

تكلفة الكنترول وال4 سنسور 4000
دة غير المواتير منهم موتور بعت جبتة من امريكا
ومصاريف ورش اللحام والصناعية وكل شوية كنا بنجرب ونعدل فالموضوع دخل معانا فى 10000
ولما الكلية شاركت ب 600 كتر خيرهم
بالنسبة للبطاريات المفروض اننا كنا مشغلين ببطاريات ليسيوم وكنا عملين ليها شاحن وبنشحنها

بس ولاد الحلال سرقو البطاريات والعدة فبقينا نفك بطاريات عربياتنا ونستعملها والامبير العالى بتاعها وفر علينا حاجات كتير

انا عارف طبعا ان التكلفة مبالغ فيها بس دة يرجع لأننا كنا بنتعلم فحرقنا بوردات كتير وبوظنا حاجات كتير محدش بيتعلم بالساهل