فعلاً ماشوفتش عربية اجمل من كدة

[El-masry]

ممكن كتير هيستغربو من وجهة نظري
بس العربية دي في نظري الفيرنا

انا معايا العربية من 12 2010 فعلا والله انا كل يوم بعجب اكتر بالعربية انا جايبها اوتوماتيك و الحمد لله ماقابلنيش اي مشكلة في العربية

بالنسبة لية انا شايفها اجمل عربية ممكن نشتريها في مصر
عربية في حدود 70000 اوتوماتيك فول اوبشن
عفشة مناسبة جدا للشوارع المكسرة و المطبات الفجائية

قطع الغير منتشرة و رخيصة و الحمد لله ممكن اقرب ميكانيكي ليك يصلحهالك و مش معقدة زي عربيات تانية كتير

ابعادها كويسة جدا و واضحة في الركنات

طريقة وضع الاكصدامات فيها ممتازة خصوصا الخلفي يخلي لو عربية خبطتك من ورا لا قدر الله الاكصدام هياخد الخبطة كلها قبل ماتوصل للشنطة الا طبعا لو الخبطة جامدة بس برضو الاكصدام هيحمي الشنطة بنسبة كبيرة

موتور ممتاز جدا جدا و نفس الشيء للفيتيس
تكييف ثلاجة بمعني الكلمة
في اشد اوات الحر تجيبه علي 2 و تنسي

العربية صورتها معايا الحمد لله مش عالي يمكن عشان مش بقرص علي الاكسيلاتير بس انا بهاودها عشان انا مش من هواة القرص و الحرق

عكس ما ناس كتير كانت بتقولي الجنوط اللي جاية مع العربية 14 مش 13 و الكاوتش مش نسر المصري نوع اسمه كوموهو تقريبا و صناعته ياباني

المرايات بتاعتها والله فوق الممتازة يعني انا خدت خبطات كتير جدا في المرايا بس الحمد لله كل مرة لما بتخبط من قدم المرايا بتيجي في الفريم مش في المرايا نفسها لأن المرايا داخلة لجوة شوية بحيث ان مفيش خبطات بتيجي فيها

استهلاك البنزين من حيث الامكانيات و الموتور و ان هي اوتوماتيك الحمد لله مش مزعلني و مريحني جدا

جميل كمان انك تبقي راكب العربية و عارف ان نفس الموتور هو نفسه اللي نزل في النترا 1 و في الماتريكس و دي عربيات طبقا لهيونداي فئتها اعلي من الفيرنا

بالنسبة لثباتها انا اعلي سرعة جبتها بيها كانت 150و كنا اتنين راكبين و العربية كانت ثابتة والله مافيش اي حاجة من اللي كنت بسمع عنها و كنت بنقل من حارة لحارة
لكن في الملفات كنت بهدي سنة العمر مش بعزقة برضو

لو ليا تعليق عليها الباور تقيل معايا بصورة ملحوظة غير عربيات باور كتير دة بيبقي حلو جدا علي السرعات لكن داخل المدينة مقرف


انا بجد قريت مشاكل ناس كتير مع الفيرنا بس كل اللي اقدر اقوله حاول لو هتشتريها مستعمل تبقي حالتها كويسة هتفرق معاك كتير


فعلا انا من تجربتي بقول لكل اللي معاه مبلغ من 60.000 الي 70.000
يجيب فيرنا و مش هيندم

توضيح
ياريت بلاش مهاجمة لكل واحد وجهة نظره و انا بقول الحق في عربية تستحق الكلام دة

يمكن موضوعي يساعد واحد محتار يشتري زي ماكلنا بنحتار لما بنجيب عربية

ما كامل احترامي لعربيات زي اللوجان و الساجا بس فعلا الفيرنا عربية ممتازة تستحق كل جنية اتدفع فيها

[tham1010]

الفيرنا فعلا أثبتت كفائتها وسعرها وإمكانيتها مناسبة جدا. وأرى إنها أشيك من اللوجن وأوسع. والفرق بينها وبين شيفرولية اللانوس مش كبير.....

[SuccessCre8or]

الف مبروك

الجنط 14 في الاوتو بس


بالنسبة للوسع.... الفيرنا اصغر عربية في فئتها ... اللوجان اوسع كتير يا جماعة

[hyundai2005]

تسلم يا غالي عالموضوع والفيرنا فعلا عربيه حلوه بماتور جبار بس عيبها الوحيد الثبات والفرامل واكيد اللي فرق معاك الجنوط ال14 وربنا يحفظهالك ويديك خيرها

[akerima]

المشاركة الأصلية كتبت بواسطة tham1010 الفيرنا فعلا أثبتت كفائتها وسعرها وإمكانيتها مناسبة جدا. وأرى إنها أشيك من اللوجن وأوسع. والفرق بينها وبين شيفرولية اللانوس مش كبير.....

اشيك يمكن دا موضوع اذواق - لكن اوسع مستحيل اللوجان الاوسع في فئتها بدون منازع - وانا والله معنديش اي اعتراض علي اي نوع