اسفتسار بخصوص السفر في الجو المترب

[waleed116]

شباب ....

انا بقالي مده عمال الف اودور علي الشحم الي بيحطوه علي السيارات اثناء السفر علي الطرقالصحراويه المتربه . او الطرق الصحراويه المصريه ... الي كلها تراب وذرات تراب ... لاني بعد مااشيك علي السياره بحصل فيها خدوش علي الصاج .

فممكن تعرفواني انواع الشحوم دي الي بتترش علي مقدمه السياره وبعض الجوانب زي سيارات الخليج في السفر . واحصلها فين في القاهره .والانواع . والسعر .

شكرا ...

[hatem_eg]

بص يا معلم حقولك على طريقة تعملها بنفسك كنا بنعملها في الخليج زي اللي بيسموها تغبيرة والكلام ده عشان المناطق هناك صحراويه ورملية حتى اكتر من عندنا طبعا بكتير
ولكن اللي ماكنش بيعمل الرشة دي كان بيجيب فيري او بريل ( صابون سائل)
في ناس بتشحمها او بتحط نوع من الزيوت غير مخصص لمثل هذه الامور أو نوع اي كلام ، وبتبقى دي كارثة علشان خاطر انه ممكن يبقع او يسيب أثر على البودي أو على الأقل بياكل اللمعه اللي في العربية
ولكن الطريقة دي حل من الحلول وبتبقى ديتها شوية مايه لما توصل بالسلامة وخلص الموضوع سهلة النضافة يعني
الطريقة يا باشا
وإدعيلي عشان ما حدش يعرفها كتير،،، جيبلك علبة فيري أو علبة بريل ، احتمال تحتاج لعلبتين اذا عاوز تزود في الرش للعربية كلها ، وتروح عند بتاع الكاوتش او مغسلة افضل ، بيكون عندهم في مسدس الهوا بتاعهم مكان تحته بيتركب فيها علبة ( العلبة اللي بتشوفهم بيحطو فيها الجاز وينضفو بيه داخل كبوت العربية ) بس ابقى خليه ينضفها الاول
المهم حيحط الصابون السائل جوه العلبة ومعاه فنجان ماية ( شوية مش كتير يعني ويتقلب)
ويبتدي يرش العربية ،،، اديها شوية كده لحد اما ينشف وبعد كده خليه يعملك وش تاني
نصائح وارشادات
1- بعد ما تخلص خالص ،، بفوطه مبلوله ، نضف كلللللل الفوانيس والاسطبات اللي جه عليها الصابون علشان لما ينشف ما يعملش مشكله او يتفاعل علشان بلاستيك
خاصة الانوار الامامية وخصوصا انه اغلبها دلوقتي بلاستيك مش قزاز زي عربيات زمان (( هام )). وطبعا قزاز العربية عشان تعرف تشوف
2- طبعا دي كلها مواد كيميائية سواء الصابون او حتى الورشة اللي حترشلك التغبيره بالمواد الخاصه للموضوع ده او حتى لو لقيت محل ترويش عربيات بيبيع العلبه بتاعة التغبيره دي ،، كلها اياً كانت بعد ما تخلص الغرض منها (( اللي هو السفر )) ولما توصل بالسلامه ان شاء الله شيلها على طول ما تسيبهاش أكتر من اللازم او كزا يوم يعني وخصوصا الشمس.
3- أوووووعى تلاقي بلية والا حد ماشيلك في الشارع يروح رامي بلاه عليك وبفوطة زفره يروح مطوقلك العربية ههههههههههه ، غلط طبعا ،، لما تروح لمغسلة عشان تغسلها ،، خليه بمسدس الماية يديها رشة حلوه قبل ما يحط الفوطه ويبتدي يغسل ده لو غسيل يدوي ،، كمان لو غسيل آلي نفس الموضوع ،، لازم بمسدس المايه يشيل الرشة اللي عملتها وبعد كده ينزل العربية على ماكينة الغسيل الآلي ( الفرشة)

ملحوظة هامة : في انواع رشة تغبيرة بتكون مضروبه او نوعها مش كويس أو مجهولة المصدر من اللي بيتباع او بتلاقيه في بعض الورش،، عادة أغلها بتأثر على لمعة بوية العربية مش بتكون امنه ، وبعضها ممكن ترشة وعلى اما توصل تبص تلاقيه مش موجود والهوا طيرة اساسا ، فخد بالك لو حتستعملة يكون نوعه من مصدر معروف، بس نصيحتي الفيري افضل وبيحافظ على وش العربية أكثر من التغبيرة.

أرجو إني أكون أفدتك

[hatem_eg]

صحيح نسيت اقولك على حاجه
لو انت عاوز حاجه آمنة اكتر واكتر على لمعة البودي ومقلق ممكن تستعمل شامبو جونسون بتاع الأطفال لو عاوز الحاجة الصح يعني ، لأنه طبعاُ مافيهوش اي نوع من الكيماويات اللي ممكن تضر لمعة العربية وبصراحة حيكون أفضل.
تحياتي ،،،،

[mesho70]

اخى الفاضل
سبق ان عملت موضوع سابق لنفس المشكلة ودة الرابط
http://www.masrmotors.com/vb/showthread.php?t=21741
ووجدت حلول كثيرة من الزملاء
حتى انى جربت طريقة منظف الاوانى ( فيرى - بريل ) على مقدمة السيارة
وكنت مسافر بالسيارة قرابة 10 ساعات وبمجرد وصولى قمت بغسيل السيارة بخرطوم مياة قوى حتى انة كان الساعة 3 صباحا ً والجو بارد جدا ً
لكن اكتشف بعدها ان الاكصدام اصبح مطفى فى بعض اماكن وضع المنظف تحديدا ً واللمعة خفت واصبحت واضحة حتى بعد اعادة غسل السيارة بعدها اكثر من مرة
فأظن ان استخدام المنظف قد يؤدى الى مشاكل وعنى لن اكرر استخدامة
سيارتى لانسر 2010 وخليجى ولونها فيرانى
وقد يكون شامبو جونسون للاطفال افضل