مساعدة من أهل الخبرة، مشكلة في فتيس الاوتوماتيك

[magicsoka]

السلام عليكم
اولا انا حابب احيي كل رجالة و شباب المنتدى العظيم ده، لإني استفدت كتيييييييييير قوي منه و من الناس المحترمة اللي فيه.

ثانيا مشكلتي، انا عندي لانسر كريستالة 98 اوتوماتيك، العربية معايا بقالها حوالي 5 شهور، لاحظت حاجه فيها بس مبتحصلش كتير قوي، يعني ممكن تحصل مرة او مرتين كل اسبوع، احيانا و انا ماشي على D فجأة الاقي لمبة N تنور و تفضل تنور وتطفي ورا بعض ، و وقت ما بيحصل الموضوع ده بحس ان العربية هديت خالص و سحبها بقى ضعيف جدا ومهما تدوسلها بنزين مبتاخدش زي الاول، كإنك فعلا ماشي على غيار بين D و N ، بس و هي ماشية بقوم مبطل العربية و ادورها تاني بتروح المشكلة دي و مبترجعش تاني، و زي ما قلت قليل قوي اما بتحصل، بس خايف ان القليل ده مع عدم التصليح يتقلب لكتير و تبقى مشكلة عويصه مالهاش حل، فافيديوني يا اهل الخبرة في اسباب و حلول المشكلة دي.

ثالثا انا بحط زيت "مصر 10000" الدهبي، هو اسمه كده بس بيتغير كل 1000 كم، كنت عايز اعرف هل كده كويس بالنسبة ليها ولا ممكن اغير لنوع زيت تاني، و هل ممكن احط زيت موبيل 1 و اغيره كل 7000 كم؟ في ناس بتقول اه ممكن و في ناس بتقول لا على اساس ان العربية موديلها قديم و مبيمشيش معاها انواع الزيوت التخليقية الجديدة و التغيير على كيلوات عالية و المستحسن ان التغير يبقى على اقل كيلوات ممكنة يعني على 1000 كم او اقصاها 2000 كم فهل الكلام ده صحيح ولا ايه؟

وشكرا ليكم جميعا

[احمد على 1999]

و الله اعلم بالنسبة لمشكلة الفتيس من الواضح انها كهربائية لان لما بتبطل و تدور تانى بتروح فممكن يتكشف على الضفيرة و فيش الحساسات و تتنضف بسائل نضافة زى WD40 او الاكاى و ممكن تسأل هل ممكن يتعمل RESET لوحدة التحكم فى الفتيس ؟
و برضه زيادة فى الاطمئنان راجع صيانة الفتيس كمستوى مظبوط وكتغيير زيت و فلتر و ممكن نضافة بتغيرة زيت لمدة قصيرة و يتغير بعد كده (المهم زيت بمواصفات زى الموصى بها بالكتالوج )

بالنسبة لزيت الماتور بتهيألى موديل 98 مش قديمة يعنى الزيوت التخليقية اكيد افضل و طالما الماتور مبيحرقش زيت فحافظ عليه باستخدام زيت تخليقى