اللانوس دى هاتجننى

[teto1974]

اولا السلام عليكم ورحمة الله وبركاته
ثانيا يا جماعه من غير اطاله انا عندى لانوس 1 موديل 2000 اشتريتها مستعمله من سنتين المهم هى كانت زى الفل بس من شهرين كده بدات تظهر بعض المشاكل كا الاتى
1- مؤشر البنزين يبقى التنك نصه بنزين وبعدين مره واحده ينزل كان مفيش بنزين وكمان مفيش لمبة بنزين
2 - صوت العربيه خشن شوية وكمان فيه صفاره مع التدوير لاول مره خصوصا صباحا
3 - بقت تسقف ولما اجى اطلع على الاولانى خصوصا لما تسخت تكركر كانها هاتبطل ولازم ارجع احمل على الدبرياج تانى
4 - اضاءة التابلوه ضعيفه جدا لدرجة انى مش بابقى احيانا شايف المؤشرات
5 - الماتور فيه تعريق زيت عند غطاء التاكيهات وكذلك الفتيس
6 - سحب العربيه ضعيف ومش بتجرى يعنى بحس انها بتاخد وقت على ما يبقى فيه تسارع خصوصا عند النقل من سرعه الى سرعه

اسف على الاطاله وارجو الافاده خصوصا انى مستجد ودى اول عربيه اركبها
وجزاكم الله خيرا

[hazem_khidr]

1- مؤشر البنزين يبقى التنك نصه بنزين وبعدين مره واحده ينزل كان مفيش بنزين وكمان مفيش لمبة بنزين

عيب في عوامه البنزين محتاجه كهربائي يبص علي العوامه و توصيلاتها

2 - صوت العربيه خشن شوية وكمان فيه صفاره مع التدوير لاول مره خصوصا صباحا

6 - سحب العربيه ضعيف ومش بتجرى يعنى بحس انها بتاخد وقت على ما يبقى فيه تسارع خصوصا عند النقل من سرعه الى سرعه

المشاكل دي نتيجه اهمال الصيانه بشكل عام
محتاج تغير الزيت و الفلتر و فلتر البنزين و فلتر الهواء و سير الدينامو و الباور و سير الكاتينه و تنضف الحساسات
و بعد كده نشوف السحب اخباره ايه

3 - بقت تسقف ولما اجى اطلع على الاولانى خصوصا لما تسخت تكركر كانها هاتبطل ولازم ارجع احمل على الدبرياج تانى

لو غيرت الزيت و شوفت مياه الردياتير لو ناقصه او لو بقالك اكتر من 40 الف كيلو ما غيرتها و غيرتها و لسه المشكله يبقي محتاج اسطوانه دبرياج
دا في حاله انك بتستعمل بنزين 90
اما لو بتستعمل بنزين 80 يبقي دا عادي

- اضاءة التابلوه ضعيفه جدا لدرجة انى مش بابقى احيانا شايف المؤشرات

نفس الكهربائي اللي حيبص علي عوامه البنزين يبقي يفك لوحه العدادات و ينضفها و يغير اللمبات الموجوده فيها بلمبات جديده الماني و حتلاقي فرق شاسع

5 - الماتور فيه تعريق زيت عند غطاء التاكيهات وكذلك الفتيس

جوان التاكيهات عاوز يتغير بس تجيب نوع نضيف اوي و من واحد مضمون علشان العيب دا تقريبا بشوفه في عربيات لانوس كتير

[teto1974]

المشاركة الأصلية كتبت بواسطة hazem_khidr عيب في عوامه البنزين محتاجه كهربائي يبص علي العوامه و توصيلاتها المشاكل دي نتيجه اهمال الصيانه بشكل عام محتاج تغير الزيت و الفلتر و فلتر البنزين و فلتر الهواء و سير الدينامو و الباور و سير الكاتينه و تنضف الحساسات و بعد كده نشوف السحب اخباره ايه لو غيرت الزيت و شوفت مياه الردياتير لو ناقصه او لو بقالك اكتر من 40 الف كيلو ما غيرتها و غيرتها و لسه المشكله يبقي محتاج اسطوانه دبرياج دا في حاله انك بتستعمل بنزين 90 اما لو بتستعمل بنزين 80 يبقي دا عادي نفس الكهربائي اللي حيبص علي عوامه البنزين يبقي يفك لوحه العدادات و ينضفها و يغير اللمبات الموجوده فيها بلمبات جديده الماني و حتلاقي فرق شاسع جوان التاكيهات عاوز يتغير بس تجيب نوع نضيف اوي و من واحد مضمون علشان العيب دا تقريبا بشوفه في عربيات لانوس كتير

اولا الف مليون شكر لاهتمامك يا استاذ حازم
انا بالفعل رحت لميكانيكى ونضف الايدول والرشاشات وبص على السيور وقال تمام مع العلم انى بالفعل من 6 شهور تقريبا غيرت السيرفيس وفلتى الهوا والبنزين وبستعمل زيت موبيل 3000 كلم وبغيره فى وقته بانتظام مع العلم انى بتحرك جوه القاهر بس مفيش سفر يعنى و بالفعل غيرت جوان التاكيهات وربنا يسهل ويبقى كويس انا بصراحه مش عارف اذا كان كويس ولا لا بس الميكانيكى حط معاه ماده لازقه وهو بيركبه ولسه بقى مشوار الكهربائى ربنا يسهل وعموما الف شكر على الرد والاهتمام

[hazem_khidr]

الشكر لله يا تيتو
علي فكره حكايه ان العربيه مش بتسافر و بتمشي في الزحمه
بيخلي العربيه مكتومه
لو جربت تسافر بيها مشوار طويل و علي سرعه معقوله
حتنضف الموتور و بالتالي سحب العربيه حيظبط

[محمود زيزوو]

استاذ حازم من الناس الخبرا فى المنتدى