ممكن مساعدتكم والاجر والثواب عند الله

[manooo80]

انا الحمد الله اشتريت عربيه 128 موديل 97 ودى اول عربيه اركبها ومليش خبره فى اى حاجه فى العربيات
فى حاجات بلاحظها وعايز رايكم
1- بسمع صوت تخبيط او كركبه كده وانا ماشى هادى اول ما اطلع بالعربيه ومش عارف الصوت ده بيروح لما بسرع ولا انا اللى مبسمعوش


2- ظهرت حاجه غريبه كمان صوت تزيكه حاجه بتزيك كده لما باخد مطب والصوت طالع من قدام ناحية الشمال

3- لما اكون ماشى على التانى وهمش دايس على البنزين بحس العربيه بتترج بسيط كانها هتبطل بس بسيط الصراحه مش اوى

4- هل لو جنط العربيه هل ده هيساعد على ثبتها فى الارض اكتر وخصوصا لما اعدى 100 وايه عيوب التجنيط
ارجو الافاده يا بشوات المنتدى بالله عليكم اخوكم ميح فى العربيات

[حبيب الناس]

أولا الاستاذ ماننننننننو 80 بحب ارحب بيك في المنتدي وبشكرك علي ثقتك الغاليه في رواد المنتدي والاحرص علي استقبال النصيحه منهم
بالنسبة للأجابه علي رقم 1 & 2 تقريبا كده عندك مشكله في العفشه المساعد او المقص اللي قدام شمال وده اللي بيعمل صوت حكه وتزييق لما تدوس علي المطبات بالعجله الشمال ولازم تروح لميكانيكي ثقه علشان يكشف لك عليها وبالاخص عفشجي لان الشغل ده بتاع عفشه
بالنسبه لرقم 2 ده عادي وطبيعي لان انت كده بتحمل العربيه علي الماتور في السلانسيه يعني بتخلي الماتور يجر العربيه من غير ما تدوس بنزين يعني بأقل جهد للماتور فوزن العربيه تقيل الماتور مش قادر يجرها فتحس برجرجة الماتور وتشغر باه العربيه هبطل وده حلها برضه ميكانيكي هيعليلك العربيه سنه صغيره هيلف مسمار الصلانسيه في الكربيراتير سنه صغيره علشان تعلي ومتبطلش
بالنسبه لتجنيط العربيه لو هتغير شكل الجنط بس وتخلي مقاس الكاوتشش هوا هوا مفيش اي مشاكل لكن لو هتغير مقاس الكاوتش وعاوز تجيبه اعرض او مقاس اكبر ده لازم تسئل حد خبره فيها لانها ليها حسابات مينفعش نحط اي حاجه

[manooo80]

حبيب الناس الف مليون شكر بس هو موضوع العفشه ده يكلف كتير ؟؟

[manooo80]

على فكره انت شرحك رائع انا فهمت اوى من كلامك متحرمناش من خبراتك

[Bahi]

ربنا يستر وميطلعش العيب الشائع فى 128 وريتمو: شرخ فى الشاسية أو الركبة. روح أكشف بسرعة عند عفشجى أو حتى ميكانيكى كويس وأطمن أو ألحقة قبل ما يسرح.