لو شارى عربية مستعملة ومش عايزها تقرفك

[didos]

بص يا باشا
الاول تخلى صحابك او معارفك يدلوك على محل يكون بضاعته نضيفة واسعاره كويسة وتشترى الاتى
ب 3 جنيه عراوى وكلبسات نحاس مشكلة
ب 2 جنيه حزمة بلاستيك
علبة زيت باكم (الصاج مش البلاستيك)
طقم بوجيهات وابلاتين وكوندينسر (فيه عربيات مش محتاجة ابلاتين وكوندينسر)
سير دينامو وسير تقسيمة
فلتر زيت وفلتر هواء وفلتر بنزين

اول شئ تروح لواحد متخصص فرامل وتقوله يبص على كل حاجة طنابير واجهزة وتيل وماستر وخلافه ويغيرلك زيت باكم الفرامل

تخلى واحد صاحبك بيفهم يبص على الكاوتش لو محتاج يتغير فيه حاجة او بتاع كاوتش بس امين لان اغلبهم بتوع اشتغالات

تروح للكهربائى وتخليه يغيرلك كل الكلبسات والعراوى النحاس حتى لو سليمة لان ممكن عروة مهربة تلففك حوالين نفسك وخليه يقيس شحن الدينامو ويتاكد ان كل لمبات التابلوه شغالة (زيت وحرارة الخ ) ويتاكد ان البطارية كويسة واى سلك متقطع يغيره ويجمعهم بالحزمة البلاستيك وتشوف الانوار والاشارات لو محتاجه حاجة وتخليه يبص على علبة الفيوزات

ميكانيكى نضيف تخليه يبص على الاسطوانة والديسك وبلى العجل والجكمان والكاربراتير لو حاجة فيهم فيها مشكلة وتخليه يغيرلك قطم الكهرباء بوجيهات وابلاتين وكوندينسر وفلتر هواء وفلتر بنزين و سير دينامو وسير تقسيمة
لو الجكمان فيه حاجة تروح لمتخصص ولو الكاربراتير فيه حاجة ماتخليش الميكانيكى يعمله روح لواحد بتاع كاربراتير

تروح لعفشجى كويس ويستحسن بره العواصم يعنى الناس بتوع وجه بحرى زى دمنهور وطنطا والمنصورة الخ شغلهم زى الفل وشبه ببلاش (ابو 10 ب3 وانضف ) تخليه ينزل العفشة كلها ويشوفها محتاجة ايه ويغيره ويربطها كويس

تروح بنزينة كويسة (افضل شل) ويكون بتاع ظبط الزوايا هناك سمعته كويسة تعمل ظبط زوايا ترصيص وتغير زيت الموتور والفتيس والكرونة (فى حالة ان العربية دفع خلفى) وفلتر زيت الموتور وتديها غسيل وتشحيم على نضافة

طبعا الحاجات دى مع انها تبان كتير لكن تكلفتها مش قطمة وسط بل كلها رفايع مش هاتكلف جامد ممكن تعطلك وتقرفك فانت تريح دماغك منها احسن وتعملها فى يوم ولا يومين اجازة بدل ما وانت ماشى ابلاتين يلدع ولا تلاقى العبية مابتدورش الصبح والكلام ده وبالتوفيق

بعد كده موضوع الصاج والدوكو والفرش والتتجنيط والكلام ده كله مكلف ومش هيوقف العربية لا خليه براحتك

[المناور]

نصائح مفيدة فعلا

تسلم يا ديدوس علي المعلومات الجميلة ديه وربنا يجعلها في ميزان حسناتك

[Bahi]

الله ينور يا didos بك ولو انى لسة شاكرك على نفس المشاركة ونفس المعلومات فى موضوع تانى لكن الحقيقة تستحق الشكر ... جزاك الله خيرا.

[mahranahm]

تسلم ايدك يا برنس على المعلومات القيمة