فى الطريق من اسكندريه لبورسعيد العربيه عطلت و مفيش بنزين بيوصل ؟

[ahmedraafat00]

السلام عليكم
كل سنه وانتم طيبين وعيد سعيد عليكم

انا عارف يا جماعه ان الناس اللى متابعه مواضيعى فى قسم الصيانه هتقولى هوا ايه حكايه عربيتك يا عم احمد بس بجد انا نفسى مش عارف العربيه دى جابت اخرها ولا الميكانيكى اللى معندوش ضمير ولا ايه
النهارده والدى و جماعه قرايبنا كانوا مسافرين بالعربيه لبورسعيد وانا مكنتش معاهم
وده بناء على ثقه من البيه الميكانيكى اللى مأكد لنا ان العربيه تمام و زى الفل المهم طلعوا على بركه الله و قبل ما يوصولوا طنطا حصل اللى كنت متوقعه والعربيه عطلت منهم وعلى حد فهمى لما والدى كلمنى فى الموبايل ياخد نمره الميانيكى عرفت ان العربيه مفيش بنزين بيوصل فيها بارغم انها متفوله !!
طب ده من ايه بس ياترى طرمبه بنزين ولا رشاشات ولا ايه
بجد ابتديت اقفد الثقه فى العربيه الفقر دى واللى يغيظ كان معاهم فيرنا بس قالوا ناخد الجيب هتكون احلى فى السفر و انا و الوالد قولنا فرصه نمشى العربيه شويه ونفوقها شويه لكن للاسف تأتى الشيروكى بما لا تشتهى الركاب وكسفتنا الشيروكى قدام الناس

[samirayad]

ممكن تكون طلمبة بنزين شيعت

وممكن يكون كتاوت أو فيوز الطلمبه بحاجه للتغيير

[ahmedraafat00]

شكرا يا ستاذ سمير على ردك
بس المفروض ان الميكانيكى مشيك عليها قبل كده
بس هوا كان بيقولى حاجه مره كانت العوامه مش قاريه كويس قالى ان فى ماس او حاجه زى كده هل ممكن يكو ن الماس ده هو السبب

[samirayad]

بس هوا كان بيقولى حاجه مره كانت العوامه مش قاريه كويس قالى ان فى ماس او حاجه زى كده هل ممكن يكو ن الماس ده هو السبب

مادام كان فيه ماس فى ضفيرة الطلمبه أو دايرة كهربة العوامه

يبقى ممكن يكون عزل الماس مش كويس

وحصل قفله فى الضفيره بتاعة الطلمبه وبالتالى تعطلت الطلمبه عن ضخ البنزين

وعيوب الكهرباء الفجائيه

زى ماس فى الضفيره أو توقف الطلمبه الفجائى أو تلف الكتاوت أو الفيوز

الميكانيكى ملوش ذنب فيه

ده بيكون قضاء وقدر

[ahmedraafat00]

شكرا استاذ سمير
ووالد قفلها و ركنها جنب مزرعه و اتصرفوا فى عربيه والميكانيكى و والدى هيروحوا بكره يجيبوها و يصلحوها وربنا يستر بقى وتعدى الليله دى على خير من غير خساير ولا حاجه منها تتسرق