مطلوب رايكم في المقارنة دي

[horas3000]

السلام عليكم يا رجاله

النهاردة قاعد مع جماعة في الشغل و واحد من الجالسين طرح موضوع انه عايز ينزل عربية 4x4 لمصر من هنا.
المهم هو يعرف ناس في كل من توكيل ميتسوبيشي و فولكس و الناس دول ممكن يظبطوه في اسعار العربيات.
طبعا المقارنه هنا بين الباجيرو و الطوراق و الاتنين ال v6
طبعا لما سؤلت عن راي اجابتي كانت مباشرة،،، طوراق طبعا و ده كان راي لوحدي بس
لان كل الجالسين قالوا الباجيرو طبعا لانها اكتر تحملا لطبيعة الطرق في مصر

ايه رايكم انتم بقي
بس عايزكم تفكروا بطريقة عملية و حاولوا تجنبوا العواطف و كانكم مكان الراجل ده
هل الباجيرو فعلا انسب لمصر من الطوارق

[بدر بسيونى]

اسمحلى ياحورس باشا بس الباجيرو اكثر انتشارا فى مصر وفعلا اختيار افضل من الطوراق بالنسبة للسوق والثقافة والشوارع المصرية

[fares515]

بص بقا ياشريف باشا أنا هشارك معاك في الموضوع ده عشان خاطرك انت شخصيا وهستعرض معاك اهم مواصفات السيارتين وميزات وعيوب كل واحده وهقلك تعليق مختصر ونهائي وبعدين انت وصاحبك احكمو براحتكم
VOLKSWAGEN TOUAREG
المحرك 3600cc
الهورس باور 280
استهلاك الوقود 13.3لتر لكل 100 كم
الوزن 6493كجم
الطول 480سم
العرض 193سم
الارتفاع 171سم
التسارع من0إلى100 8.6ثانيه

المميزات:
1- تتميز برفاهيتها وفخامتها التى يمكن تمييزها بسهوله عن الباجيرو من حيث التطعيم بافخر انواع الخشب المنحوت واستخدم اعلى الخامات جوده ومزوده بتكنولوجيا أحدث منها
2-مساحه المقعد الخلفي أوسع
3-أبعاد مثاليه تضمن الراحه الكامله للركاب الخمسه جميعهم
4-أسرع في الانطلاق وقوه المحرك جباره
5-مساحه التحميل أكبر حث تصل إلى580لترا وبضغطه تقوم بطي المقعد الخلفى لترتفع إلى1640لتر
6-تستطيع صعود ارتفاع بزاويه31 درجه بفضل عزمها المرتفع وهو مالايوجد في الباجيرو
7-ثبات مفيش بعد كده كعاده الألماني

العيوب:
1-غير منتشره في مصر ومن النادر تشوف واحده في الشارع لذلك عمليه تصليح اعطالها او الكهربا فيها تعتبر متعبه ومكلفه جدا
2-قطع غيار مرتفعه السعر ولاتوجد إلا في التوكيل وساعات ممكن متلاقيهاش
3-استهلاك البنزين عالي جدا يعني عايزه محطه بنزين وراها

MITSUBISHI PAJERO
فيه نوعين من محركات البنزين:
المحرك الأول 3800cc
هورس باور 270
المحرك الثاني 3500cc
هورس باور 200حصان

استهلاك الوقود 10.8لتر لكل 100كم(الكلام على المحرك الأول)
الطول 4400سم
العرض 1875سم
الارتفاع 192سم
التسارع من0إلى100 10ثواني

المميزات
1- استهلاك معقول للوقود
2-امكانيات وتقدم تكنولوجي جيده جدا بالنسبه للسوق المصري
3- السعر
4-قطع الغيار وصيانتها متوفره عن الطوارق لكن في ورش وأماكن معينه بس غاليه برده

العيوب
1-صوت الهوا بيكون ظاهر على السرعات العاليه
2-الثبات مش أد كده
3-امكانياتها في صعود المرتفعات محدوده
4-تقيله في قومتها
5-نظام التراكشن كونترول فيه شكاوي كتير منه
6-الصف التالت من المقاعد زي عدمه
7-في كلام انها تصنع في تايلندا على عكس الطوارق ألمانيه100%

بالنسبه للأسعار
طوارق في الإمارات: 15000 تقريبا
في مصر 980000
باجيرو في الإمارات:12000 تقريبا
في مصر 730000

واضح طبعا فارق الأسعار بين العربيتين

تعليقي الأخير:
لو صاحبك رايق وله مزاج في السيارات ومش بتاع بهدله وبيحافظ على العربيات يبقى طوارق وهو مغمض لكن لو الناحيه الاقتصاديه لها أولويه عنده وعايز عربيه عمليه وحماله أسيه وهيفحتها مشاوير وغيره وناوي من دلوقتي يبقى زائر دائم للورش يبقى طبعا أفضله الباجيرو باختصار الطوارق رواقه ومزاج الباجيرو عمليه ووش بهدله

[hazem_khidr]

اول ما قريت اسمك في قسم المقارنات قولت استر يا رب
و افتكرتك بتفاضل بين البورش كاريرا و الفيراري 456 علي سبيل المثال
بس خاب ظني
نيجي لموضوعنا
دلوقتي الطوارق افضل بالتأكيد من الباجيرو و كفايه انها علي قاعده عجلات بورش كايين اللي هيا عربيتك.
لكن بالنسبه لمصر او دول الخليج عموما الوضع يختلف و انت عارف الالماني عامل ازاي.
غير ان توكيل فولكس في مصر مش قوي بالدرجه الكافيه .
فرأيي العقلي بيقول باجيرو اما القلب بيقول طوارق

[احمد بدر1978]

استاذ حورس اكيد الباجيرو هى الى حتستحمل مصر وكمان منتشرة هنا
وبلاش المقارنات اللى تعقد دى