ما هى الاسباب الفعليه والعمليه الى تؤدى الى الخلل الوظيفى لموبينه اللانوس

[YA122]

بصراحه انا وضعت هذا السؤال عشان ما حدش يغلط غلطتى
منتظر الرد السليم والتفصيلى


عشان انا اشتريت من 9 شهور لانوس 2007 مستعمله بس ابتدت تظهر مشاكلها دلوقتى
البيه الى اشتريت منه العربيه
كان مركب بطاريه سائله 55 امبير على العربيه ال 1500 سى سى
ادى الى نهايه الموبينه الى كان ممكن تقعد ل 80 الف كيلو
دلوقتى وصلت ل 36 الف كيلو
حاله الموبينه دلوقتى الاسلاك الى متصله بيها فى اتنين منهم مش بيلقطو ا
وفى نفس الوقت العربيه بتقطع معايا على التانى و يعنى على التالت بسيط جدا
ممكن تقعد فتره قد ايه فى العربيه؟؟
لو قررت اسيبها مؤقتا ولا حتحصل مشاكل اكتر للعربيه لو تركتها

غيرت البطاريه دلوقتى نوعها fulda المانى
ياريت عايز اعرف الاسباب تلف الموبينه ؟؟؟
وايه سعر موبينه ال gm حاليا ؟؟؟
: 260309~146:

[AbOnOrA]

قدر الله وماشاء فعل ووارد ان الموبينة تكون فيها عيب صناعة من الاول ومبانش غير دلوقتى

بس المهم تكون متأكد ان الموبينة فعلا هى السبب فى المشكلة لان وصفك للموضوع من الاول خلى الواحد دماغة تروح لحاجات تانية كتير خاصة انك كنت بتقول ان المشكلة بتحصل على الغيار التانى بس وده مش طبيعى ولا منطقى لان لو فيه مشكلة فى منظومة الاشعال بتظهر على كل الغيارات او على الايديال (السلانسية) لكن غيار محدد ديه صعبه اوى لكن بدام بتقول دلوقتى ان المشكلة بتظهر بردو على الغيارات التانية يبقى كده صح

مبدئياً انا مش هقدر افيدك فى الاسعار بس لو عايز ممكن احطلك ارقام محلات قطع غيار الدايو تسالهم بنفسك وطبعا هتلاقى منها استيراد كتير سواء فى الحرفيين او عزبة شلبى مثلا

بالنسبة للموبينة نفسها فهى تعتبر قلب نظام الاشعال فى العربية وهى كهربياً عباره عن ملفين coils دورها تاخد كهرباء من البطارية بفولطية قليلة وتعظمها وتديها للبوجيهات عبر اسلاك البوجيهات علشان تعمل الشرر sparks الازمة لاشعال خليط الوقود فى كل غرفة احتراق

وبالتالى تلف الموبينة او قصور ادائها بيخلى الكهرباء اللى بتروح للبوجيهات مش كفاية وبالتالى مبيحصلش اشتعال صحيح لخليط الوقود فى غرفة الاحتراق والموتور ادائه يتبرجل باشكال متفاوتة ممكن تنتش وممكن الموتور يتلت وممكن تبطل على السلانسية

اسباب تلف الموبينة ممكن تكون ناتجة عن عيب صناعة زى ماقولت الاول وممكن يكون بسبب ضعف البطارية او مقاومة عالية من اسلاك البوجيهات (نوع ردىء) او تلف احد الاسلاك ويمكن البوجيهات نفسها بايظة خالص

طبعا لو كهربائى فاهم كويس ممكن يقيس الموبينة نفسها بالمالتى ميتر علشان يتاكد حتى من سلامة الكويلات وممكن يقيس مقاومة الاسلاك ويقيس خرج البطارية علشان يحكم بشكل اقرب للصحة على حالة الموبينة وسبب تلفها لكن كله بيشتغل بلدى طبعاً

علشان كده انصحك تتاكد الاول من سلامة البوجيهات والاسلاك بتاعتها والبطارية والاسلاك من البطارية للموبينة واذا كل ده سليم يبقى غير الموبينة ويفضل تجيبها جديدة لان الاستيراد ممكن حالتها متكونش تمام برضو وبعد فتره قصيره تعمل مشاكل