ياتري ايهما افضل جهاز انذار SPY ام SYMPHONY من اللي استخدموهم

[محمد عيسي]

الاخوة الاعزاء
لي استفسار مهم
ياتري ايهما افضل جهاز انذار SPY ام SYMPHONY والجواب من الاخوة اللي استخدموهم
وماهي مميزات كل جهاز فيهم
وماهي عيوب كل جهاز فيهم
ياريت الاخوة المجربين الجهازين يدلوا بدلوهم
وشكرا

[EgyZizo]

أنا ركبت spy 5000
أول ما ركبته كنت بانزل من البيت ألاقى العيال قاعدين على العربية والانذار واخد تعسيلة
رجعت للجماعة اللى ركبوه واشتكيت لهم من الموضوع ده
قاموا زودوا حساسية الجهاز ..
بس الأمور بقت أسوأ ..
بقى لو فيه موتوسيكل معدى جنب العربية جهاز الانذار يشتغل ..
يعنى مستحيل تعرف تركنها فى طريق لأن طول ما العربيات معدية جنبك الانذار هيفضل شغال كل شوية ..

يعنى الخلاصة إنى ما خدتش منه اللى كنت متوقعه

شوف .. هى الفكرة فى أجهزة الانذار عموماً انها بتعتمد على (حساس للصدمات Shock sensor) .. يعنى لازم حد يخبط على العربية عشان يشتغل ، وسوءا كانت حساسيته عالية أو واطية ، فهو هيشتغل برضه بالخبط بس سواء خبطة جادة أو بسيطة . .
يعنى مثلاً ممكن عربية تكون واقفة والانذار نشيط ، وأمسك أنا آلة حادة مثلاً وأشرح الصاج بتاعها مثلاً والانذار مش هيشتغل لأن مافيش shock لكن لو خبطت عليها خبطة بسيطة هتلاقيه اشتغل ..

دى تجربتى مع الـ Spy
وأعتقد ولا أجزم ان دى فكرة أجهزة الانذار عموماً ..

تبقى الفائدة هى ان الانذار هيشتغل لو حد فتح باب العربية بغض النظر عن موضوع الـ shock.

وأياً كان النوع اللى هتركبه ، ماتركبش عند أى حد لأن أنا مثلاً الناس اللى ركبولى ماشغلوش كل امكانيات الجهاز الـ 2-way اللى أنا اشتريته من عندهم ولما عرفت امكانياته بقراءة الكتالوج ورجعت لهم ، ما شغلوهاش برضه بحجج واهية .. وكان واضح انهم مايعرفوش يشغلوها .. يعنى حاول تروح عند حد اتجرب قبل كده