لأول مره :..: تغيير كاسيت a516 بالصور

[hanydesigns]

السلام عليكم ورحمه الله وبركاته
أخوانى الكرام
النهارده اقدر اقدم تجربتى كامله لأن فى ناس كتيير قوى سألت عليها وبتحاول توصل لحل وانا كنت واحد منهم وبعد تعب كبير وبمساعدة الناس المحترمه اللى مابخلوش عليا بالمعلومات قدرت اغير الكاسيت بنفسى
انا ركبت الكاسيت دا ماتسوبيشى MC81





وبصراحه حاجه فخيمه بعد تجربه 3 سنين من ايام عربيتى 127 ما كان راكب فيها ومش هقول مميزاته لأن فى مواضيع اتعملت عليه واشهرها الموضوع دا

http://www.**********.net/Nile/32645...ishi-mc81.html

علشان وقتكم هدخل فى التفاصيل على طول
الادوات اللى هتحتاجها هتكون
1- بيبه 10
2- مفك صليبه
3- مفك عاده
4- بكره شيكارتون

فكيت الاول الجزء اللى فوق زى الصوره تمام بالمفك العاده وهى بتدخل المفك من تحت وبترفع به بس بالراحه
يعنى ماتتعافاش على حاجه ومعظم الحاجات الفبر اللى راكبه فى العربيه كلها راكبه كبس

بعد كده هتلاقى المسامرين اللى ماسكين الوش وهتفكهم بمفك صليبه


وبعدين هتحاول ترفع الوش من الجنبين من خلال المفك العاده من الناحيتين وبرده راكبه كبس زى الصوره تمام




هنفك الكاسيت من المسمارين اللى فوق بالبيبه 10 وتحتهم هتلاقى مسمارين لجوه شويه هتفكهم بمفك صليبه
وتسحب الكاسيت لبره هتلاقى شابك فيه كابل الاريال وكابل كبير خاص بالكهرباء والسماعات هنروح نفصل الكابلين من الكاسيت وتخرج الكاسيت بره خالص
هتفك الحوامل اللى ماسكه الكاسيت من الجنبين علشان هركب فيهم الكاسيت الجديد والدرج

بمناسبه الدرج جبته بـ 50 جنيه وفى منه حامل أكواب وفى درج عادى وكمان حافظ سي ديهات انا جبت العادى ودى صور الكاسيت والدرج وهما راكبيت مع بعض على الحامل بتاع الكاسيت الاصلى وكمان صور الكرتونه الخاصه بالدرج






نيجى بقى للتوصيل والاسلاك

اول حاجه نمسك الـ 3 ألوان الاحمر - الأصفر - الأسود
الكاسيت فيه نفس الالوان وهتلاقى رسمه للخريطه الخاصه بالتوصيل على ظهر الكاسيت وتقريبا معظم الكاسيتات واحد بس برضه تراجع الخريطه

انا عملت ايه ؟
قشرت الأسلاك بتاع العربيه من النصف يا دوب تعرى السلك علشان تلحم فيه اسلاك الكاسيت
وصلت الاحمر مع الاحمر ودا الخاص بالقفل مع الكونتاكت
وصلت الاسود مع الاسود ودا الارضى
وصلت الاصفر مع الاصفر ودا كهرباء

بعد كده قشرت برضه كل اسلاك السماعات فى الضفيره وهتلاقى الابيض والبينك والرمادى والأخضر
كل سلك من دول موجود منه اتنين موجب وارضى الخاص بكل سماعه والارضى بتعرفه بيكون فيه خط بالاسود
مثال
ابيض وابيض بخط اسود
هتوصل بقى كل خارجى من الكاسيت لكل سماعه
طبعا هتقولى عرفت السماعه يمين من شمال قدام من ورا ازاى
اول ما وصلت ال 3 اسلاك كهرباء وغطتهم بشيكارتون الكاسيت اشتغل مع فتح الكونتاكت
زى كده


مسكت سلكين من اللى خارجين للكاسيت وبيتوصلوا للسماعات وبدات اختبر كل سلك واسمع الصوت واسجل مكان السماعه اللى اشتغلت فين
وعموما الورقه نسيتها فى السياره وبكره ان شاء الله هكتب كل سلك بيودى لأنهى سماعه

وبعد ما خلصت بدأت ارجع كل حاجه مكانها تانى وخطوات التركيب عكس خطوات الفك
ومتنساش تغطى اى سلك بشيكارتون او العازل تجنباً لحدوث اى مشكله

وكمان خلى بالك انا لما ركبت الكاسيت فوق والدرج تحت ما ركبش معايا مظبوط فأضطريت انى ابدل الدرج فوق الكاسيت تحت ودى النتيجه النهائيه





اتمنى انى اكون ساعدتكم لحل المشكله اللى كتير بيدور عليها وانا تعبت جدا علشان اعمل الموضوع دا فأتمنى اللى ينقل الموضوع لأى مكان يذكر المصدر
تحياتى
أخوكم / هانى طه

[ahmed_eng2001]

مجهود رائع .. و صور واضحة .. ربنا يباركلك

[Hisham.Elgazzar]

ربنا يوسع عليك ويجعله فى ميزان حسناتك

[momen_bondok]

موضوع رائع وشرح وافى جزاك الله خيرا
بس بالنسبة للكاسيت المتسوبيشى MC81 انا دورت عليه مش لاقية وسمعت انه مبقاش يتباع فلو ممكن فحضرتك تقولي جبته منين وسعرة كام

[hanydesigns]

شكراً على الردود الجميلة
بالنسبة للكاسيت كنت جايبه من العتبة ش الأزهر من ناحيه الحسين مش من ناحية الميدان
وكان عامل 240 ج
تحياتى للجميع