نصيحة عاجلة أجيب زيرو ولا مستعمل فى الحدود دى

[NEW 2014]

الأخوة الكرام فى هذا الصرح العظيم

بصراحة أنا لسة جديد جدا جدا فى موضوع العربيات كل معلوماتى هو فقط السواقة لأنى لسة متعلم ومطلع رخصة غي كدة لا أعرف حرف فى السيارات وأتمنى أجد معاكم طوق النجاة عشان مرعوب أندم

أنا معايا حاليا 30000 جنية وعايز اجيب حاجة كويسة طبعا المبلغ مش هيجيب غير مستعمل رغم أنى من الناس اللى طولعمرى برفض مبدأ المستعمل دة خال لأن الزيرو بردة مش هتتعب الواحد ولا يكر يصرف عليها غير بعد كام سنة عكس المستعمل كل شوية موال شكل وشوفت قدامى أمثلة لا تعد ولات حصى أتبهدلوا بسبب المستعمل

فكرت أجيب زيرو وأخد قرض سيارت أو تقسيط وأجيب زيرو بس حد أقصى 50000 عشان أقدر ادفع القسط

المشكلة بقى أنا خايف أعمل ناصح واجيب مستعمل أندم وأصرف عليها أو أجيب زيرو ويحصلها حاجة أبقى بدفع قسطها وهى فى خبر كان لا قدر الله زى واحد صاحبى جاب عربية زيرو وعمل حادث العربية أتعجنت فى بعض,,,مع ان فى واحد قالى الزيرو هيتأمن عليها لو حصلها حاجة الشركة تدفعلى تصليحها أو أخد واحدة تانية ودة يضمنلى فلوسى ويبقى القسط بيتدفع والعربية ممن عليها وهستفيد بيها بس الخوف وقتها الشركة تقول الغلط منى ومايدفعوش وأبقى ماعملتش حاجة

يعنى من الأخر رأيكم أجيب مستعمل فى حدود 30 ولا زيرو فى حدود 50 ؟ وفى الحالتين ياريت ترشحهولى كام عربية بالترتيب وسبب إختيارها يعنى عشان أبقى فاهم,,,طبا مع مراعاة البنزين ومصاريف الصيانة وكل الحاات دى لأنى بعد القسط مش هيبقى معايا غير ثمن البنزين ههههه

وياريت توضحولى بالتفصيل الممل لو مش هضايقكم يعنى طبعا

[AbOnOrA]

اهلاً بيك فى مصر موتورز يا باشا نورت المنتدى وعايزك تسترخى خالص وتسيب نفسك ومتقلقش من حاجة خالص

بص اولا حسبة الجديد والمستعمل ديه يتالف فيه منتديات مش بس مواضيع ومشاركات وفى الاخر كل واحد ليه حسبته حسب ظروفة واولوياتة ومش شرط الكويس ليا يبقى كويس ليك

انت مبدئياً مجمع معلومات معقولة بس فيها مغالطات زى مثلا ان شركة التامين هتديك قيمة العربيه فى حالة الحوادث الكبيرة لا قدر الله وده مش صحيح التامين بيكون لصالح البنك وباسم البنك مش باسمك وانت بس مطلوب منك تجددة سنويا وتكلفته مش قليلة يعنى متوسط حوالى 3 - 4% من قيمة العربية سنوياً وده مبلغ بتترحم منه برضو مع المستعمل
ده غير الصيانات الدورية فى التوكيل اللى تتعمل هى هى وممكن احسن بره بربع السعر بس مضطر تروح التوكيل فى المواعيد علشان متخسرش الضمان لان حتى والعربيه زيرو وارد حاجة كبيرة تبوظ فيها برضو

كمان فيه الحاجات الصغيرة والمستهلكات ديه مش بيغطيها الضمان وبتشتريها انت زى تيل الفرامل البوجيهات الكاوتش فالعربيات الزيرو برضو بتصرف

والاهم والاخطر فى القصة ديه بالنسبالى شخصياً كمان ان قيمة العربيه بتبقى رهن البنك كلها متقدرش تبيع العربيه ولا تتصرف فيها الا بعد فك الحظر وده انا شايف انه قانوناً وشرعاً وكل حاجة غلط بس هما واخدينها كدة كضمانة وان شاء الله يكون فاضل على العربيه قسط واحد برضو متقدرش تتصرف فيها الا بامر البنك لحد ما تفك حظرها

ده غير هم الاقساط والفوائد وحتى لو حبيت تسد باقى المبلغ كاش بعد سنة ولا اتنين هتلاقى البنك بيحاسبك بنفس الفائدة تقريباً ويقولك غرامة دفع مبكر واى استهبال علشان هو مكسبة فى الفوائد مش فى قيمة القرض ومصلحتة دائماً يخليك تدفع اقساط وفوائد

يعنى من الاخر القسط بالنسبالى وحسب المشاكل اللى ذكرتها ديه يعتبر الخيار التانى مش الاول بعد المستعمل

كل مشكلة المستعمل المفروض فى الشراء بس غير كدة زى كل العربيات وقلب فى المنتدى وشوف بنفسك كم المشاكل فى العربيات الزيرو وخاصة فى الرينج بتاع 50 ده هتلاقى كله عربيات بجودة متوسطة او اقل وعيوب ومشاكل التجميع بتبقى واضحة فيها اكتر

الخلاصة انت لو صبور وبتحب العربيات وعايز تتعلم وتركب ابداء بمستعمل واتعلم وخبط وبيع وزود وجيب الاعلى لحد ما تركب اللى انت عايزة بفلوسك كاش

لكن صدقنى الاقساط والقروض ديه فقر والفلوس هتفضل تروح عليها وتلاقى نفسك دائما راكب عربيات بالقسط ودايما عليك فلوس ولو حسبت دفعت كام فى الكام سنة فوائد واصل المبلغ وخلافة هتلاقى نفسك كنت تركب عربيات اعلى بكتير فى الفئه من الزيرو بالتقسيط

اهلاً بيك مرة تانية وتحت امرك فى اى استفسار

[Marlborooo]

المستعمل افضلك لان حتي لو قسط مش هتقدر تشتري حاجة اعتمادية
وكمان اول ما رخصت العربية سعرها نزل بالنسبة للزيرو واي حكة او خبطة هتنقص تمنها

المستعمل اريحلك ماديا بمراااحل ومش هتخسر فيه كتير وممكن تكسب لو اشتريت عربية نضيفة وحافظت عليها
بس المستعمل هتحتاج تعمله صيانة كل فترة وده هتعمله حتي لو زيرو بس في المستعمل اكتر

ممكن تشتري مستعمل بالمبلغ اللي معاك عربية تكون نضيفة ومتتعبكش اوي ( هتتعبك شوية ههههه ) وتبيعها وقت ما تحب من غير ما تخسر

ومتنساش انك لسه جديد في السواقة ( وحتي لو سويق انت في شوارع المحروسة )

[محمد اوبل]

اوﻻ ربنا يسهلك الاحوال بص يا سيدى فى رأى المتواضع رقم 30000 قليل حبتين اليومين دول على مستعمل نظيف لكن لغايه 35000 ممكن سويفت 94 اكسيل 94 اكسنت فيليشيا اوبل كورسا 95 ابيزا و شاهين وﻻدا بالترتيب السابق اما الزيرو هيكون محدود جدا لان 50000 سامحنى انهارده !! وربنا يرزقك من وسع لكن ممكن ماروتى او جيلى بندينو وربنا يوفقك والله اعلى واعلم

[NEW 2014]

بجد مش عارف أشكركم إزاى على المعلومات القيمة دى كلها وبإذن الله خلينا فى المستعمل لأنى فعلا أقتنعت بكلامكم

طيب أنا حاليا وصلت لنوعين من خلال البحث هم

1_ كيا برايد سيدان 1300 سى سى موديل 2002 مانيوال
2_ هيونداى أكسيل 1300 سى سى ( مش عارف الموديل )

دول فى حدود ميزانيتى 30 ألف

_ هل ترشحلولى غيرهم يكونوا أفضل من ناحية الصيانة وقطع الغيار والثقل وما إلى ذلك؟

_ وهل دول فعلا أفضل سيارتين فى الميزانية دى ولا فى غيرهم؟

_ ولو حبيت أخفض الميزانية شوية يعنى 25 ألف أعمل أية عشان اجيب نفس الأنواع دى بالميزانية دى دة طبعا لو دول أفضل حاجة متاحة بس تكون الحالة كويسة يعنى مثلا أجيب موديلات أقدم شوية ولا أعمل أية؟

_ ومن فضلكم لو تعملولى مقارنة بينهم أو لو فى سيارات أخرى ترشحهوالى ياريت يكون مقارنات بينهم بحيث الواحد يبقى فاهم وفى النهاية ترتيبب من ناحية الأفضلية

شكرا لكم مقدما طبعا