فيرناوى جديد

[SAMER_ENGINES]

صباح او مساء الفل حسب انت بتقرا الموضوع امتى
انا سامر عضو قديم فى الموقع بس مشاركاتى مش كتير و حبيت انضم لكم كضيف جديد فى قسم الهيونداى و بالتحديد الفيرنا لانى ربنا كرمنى و اشتريت فيرنا 2004 كورى كاملة لونها فضى.
و ودعت اللادا بخشونتها و تقلها المعروف و المشهورة بيه لكن لازم برضه و احقاقا للحق اقول انى العربية دى (اللادا) خدمتنى و بكل اخلاص انا و عائلتى لمدة حوالى 17 سنة و كانت زيرو بس كان لابد من التغيير و دى سنة الحياة و بشكرها على كدة و ربنا يبارك للى اخدها.

اشتريت الفيرنا بـ 48000 جنيه و فيه ناس بتشوف الرقم ده عالى على سنة الموديل علما بانى كنت شايف واحدة قبلها افتكر برضه 2004 و كاملة بـ 46000 من بق البائع و وصلناها لحد 44500 و مشيت و مخدتش العربية لانى فرق السعر كنت هصرفه و يمكن ازيد كمان العربية فيها شغل سمكرة و دوكو كتيييير و شغل كهرباء و العفشة (بالكامل) هتتغير ده غير الموتور و الشغل اللى فيه يعنى كانت هتقف مش اقل من 15 يوم عند الصانيعية غير المصاريف اللى حسبتهم انا وواحد صاحبى لقيناهم حوالى 3000 جنيه بالراحة و ناهيك عن البهدلة.

اما عربيتى الحمد لله اللى باعها لى راجل محترم و العربية ما شاء الله عفشتها كلها جديدة و اربعة كاوتش جديد و مغيرة طقم سيور و فلاتر كامل عدا فلتر التكييف و فابريقة جوة أما برة اغلب الاجزاء فابريقة (بوية المصنع) و المطلوب فى العربية كمصاريف هو:
- تشحيم الكبالن (صوت طقطقة بسيط فى الملفات لو كاسر الدركسيون على الاخر و لو مركزتش متسمعهوش).
- تغيير خرطوم الباور لانه بيجيب زيت و الراجل قايلى عليه و انا بشترى قبل ما ادفع الفلوس (ياريت لو حد يعرف سعره كام؟).
- و هغير سير الكاتينة بس للاطمئنان لانى طبعا ده معروف انى مفيهوش هزار (ياريت سعره لو حد عارف؟).
- مفيش حاجة مضايقانى الا الموتور شوية لانه ناشع زيت فى بعض الاماكن طبعا هربط الموتور و اروح اغسل و اشوف لو نشعت تانى جايز تكون جوانات عايزة تتغير (حد عنده فكرة النشع ده ممكن يكون ايه غير جوانات؟) ياريت حد يقولى النشع ده ممكن يكون ايه؟ علما بانى السحب حاسس انه عادى و صوت الموتور هادى و عادى جدا؟ (مش مقارنة باللادا طبعا انا اقصد انى ركبت و سقت فيرنا قبل دى و صوتها كان زى عربيتى).
- و فيها شغل سمكرة و دوكو خفيف مجرد تجاريح من الخارج حبقى اوديها للسمكرى يلمها و ارش حزام و كبوت لانى لون الكبوت بدأ يكلح من الشمس و دى مشكلة الفيرنا المعروفة.
اسف للاطالة و ياريت لو حد عنده معلومة يفيدنى بيها و .

[SAMER_ENGINES]

بصراحة يا جماعة مش عارف اقول ايه على حفاوة الترحيب دى كدة كتير

انا بس كنت بسأل سؤالين سعر سير كاتينة الفيرنا كام؟
و سعر خرطوم الباور؟
و شكرا مرة تانية على الترحيب الاوفر ده و بداية مبشرة فى قسم الهيونداى

[احمد على 1999]

و الله ليك حق تزعل
و انا من يومين شوفت الموضوع و كتبت رد بس على الحظ النت عندى هنج و معرفتش خالص ابعت الرد
و لما دخلت تانى حاولت ادور على الموضوع و ملقيتوش غير لما انت نشطته

هو صحيح مكنش رد طويل بس كنت بحاول اساعد باى حاجة

على العموم اسف لحضرتك و و الله ما بيبقى قصد الناس هنا و الله هنا كله بيحب يساعد لله فى لله

يا ريت لو ممكن صورة لنشع الزيت ممكن نفيد بالصورة حد يحدد السبب

[محمد فيصل]

المشاركة الأصلية كتبت بواسطة SAMER_ENGINES بصراحة يا جماعة مش عارف اقول ايه على حفاوة الترحيب دى كدة كتير انا بس كنت بسأل سؤالين سعر سير كاتينة الفيرنا كام؟ و سعر خرطوم الباور؟ و شكرا مرة تانية على الترحيب الاوفر ده و بداية مبشرة فى قسم الهيونداى

عذراً لم اشاهد موضوعك إلا بالاشارة التى وجهها العضو الكريم المهندس احمد على
1000مبروك العربية بارك الله لك فيها وحفظك الرحمن من كل سوء إن شاء الله
سير التقسيمة المانى 120ج ويفضل تغير البلى الخاص به مع السير وسعرة عدد 2بلية ثابته متحركة 300 يابانى وهذا من اجل الامان لان تغير سير بدون البلى كلام غير صحيح
اما بخصوص خرطوم الباور بكل صراحة السعر غير حاضر الان ومن الممكن شراء خرطوم اصلى محترم مع كبس اللواكيرمرة اخرى سواء جديدة او القديمة مع غسل الدورة ووضع زيت باور جديد
متابع معك إن شاء الله