تعديل ايروديناميكية السيارة - الطريق للسيطرة فى السرعات العالية

[ramy safwt]

سلام عليكم و رحمه الله و بركاته

انهارده هيكون موضوعى الثالث و احتمال يكون الأخير

هتكلم انهارده عن حاجه مهمة جدا و هى ايروديناميكية السيارة !!

ايه الكلام المكلكع ده - ببساطة ايرو مقصود بيها الهواء ديناميكية مقصود بيها تأثير تدفق او الحركة و العربية احنا عارفينها يعنى بأختصار تأثير تدفق الهواء على العربية

طيب احنا ناويين نعمل ايه انهاده

هنعمل اربع حاجات ان شاء الله هنتكلم عن الاسبويلر الامامى و الاسبويلر الخلفى و الاوتوموتيف وينج و الاستبالتى تيوب سيستم

الاول ايه اللى بيحصل لما العربية بتمشى على سرعة عالية


بيحصل تلات حاجات اسمها مقاومة الهواء لجسم السيارة و حاجه اسمها تدفق الهواء على جسم السيارة و حاجه اسمها التقاء الهواء خلف جسم السيارة

1- مقاومة الهواء لجسم السيارة و عشان تتخيل اللى بيحصل اعبر ان العربيات دية كلها ماشية فى المايه و تخيل اننا عايشين فى عالم سبونج بوب
اى قطعة فى جسم السيارة بتكون عمودية او مقعرة بالنسبة للهواء بتتحول لمقاومة حركة بتخفض من سرعة جسم السيارة والعربية ساعتها بتكون تحت تأثير قوتين قوة دفع العجلات على الطريق و قوة مقاومة الهواء للجسم و طبعا قوة الجاذبية احنا مش هنحتاجها دلوقت

2- تدفق الهواء على جسم السيارة هنا بقى بيحصل عكس المقاومة اى جسم محدب او يصنع زاوية و لو بسيطة مع عمود الهواء يمكن الهواء من التدفق حول جسم السيارة و فوقها و تحتها ايضا

3- التقاء الهواء خلف السيارة دلوقت احنا اتفقنا ان فيه هواء هيقاوم جسم السيارة و مش هيعدى منها و فى هواء هيتدفق على كل قطعة محدبة على السيارة و كل هواء يصنع زاوية حادة سيمر و النتيجة اننا هنلاقى هواء مر من تحت السيارة و هواء مر من فوق جسم السيارة و الاتنين دول بقى هيجو فى الاخر و يلتقو فى نقطة خلف السيارة ولما التيارين دول يدخلو فى بعض يحصل دوامه هوائية خلف جسم السيارة تأثر على الدراج بتاعها لأن الهواء مش بأتجاه واحد


فى الموضوع ده بقى احنا هنلعب على تدفق الهواء فقط مش هنلعب على مقاومة الهواء ليه مش هنلعب على المقاومة عشان المقاومة لو هنلعب عليها هنحتاج نصنع اجزاء متحركة توجد المقاومة وقت الحاجه فقط مش عمال على بطال لو لقيت حد بيحاول يعمل حاجه هنزل الجزء و الكلام عن المقاومة لو ملقتش يبقى خلينا على التدفق


شوف الفيديو ده الاول يقرب ليكم الموضوع شويه

http://www.youtube.com/watch?v=gST9rh1ETqg

http://www.youtube.com/watch?v=38WYsBSmzAA

طيب نبداء بقى بالموضوع

الاسبويلر الامامى :- القطعة دية ببساطة كده مهمتها تلقى تدفق الهواء اسفل جسم السيارة و منعه من المرور اسفل السيارة و اعادة تحويله الى جوانب السيارة لأعطاء قدرة على الأختراق و الثبات فى الملفات يعنى الاسبويلر الأمامى ببساطة هيساعد العربية انها متعمش و تكون موزونة على الطريق

طيب عيوبه ايه ملهوش عيوب و ممكن يركب على اى عربية لكن مشكلته فى مصر ان المطبات هتفرتكه




الاسبويلر الخلفى :- ده يختلف وظيفته عن الأمامى و هتسمع كلام هنا دلوقت يمكن لأول مره
الاسبويلر الخلفى مهتمه معالجة مسار الهواء المتدفق على السيارة لمنع حدوث دوامة التقاء خلف السيارة و زيادة الدراج بتاعها و ملهوش اى علاقة بالداون فورس او تثبيت السيارة على الطريق - الناس بتخلط بينه و بين الاوتوموتيف وينج
http://en.wikipedia.org/wiki/Spoiler_(automotive)




الاوتوموتيف وينج :- وظيفة تختلف عن الأمامى و الخلفى و مهتمه تعديل مسار الهواء المتدفق اعلى السيارة لتوليد قوة ضغط على جسم السيارة من الخلف لتثبيتها على الطريق و ده هيفيد فى ثبات العربية نفسها على الطريق ملهوش علاقة بأنها تعوم يمين و شمال
http://en.wikipedia.org/wiki/Wing_(automotive)





الاستابلتى تيوب سيستم :- و ده احدث حاجه طورتها شركة فورد و طبقتها فى اغلب موديلات سيارتها و ده بيكون عبارة عن زوج او زوجين من الانابيب بكل جانب من السيارة تأخذ الهواء من امام السيارة و تعيد اخراجه من الجناب مما يحقق ثبات اعلى للسيارة على الطريق مستحيل تلاقى فورد بتعوم و فى نفس الوقت ميكنش في هواء تحت السيارة لأنه دخل فى الانبيب و اتوزع و فى موديلات بتعتمد بدل موضوع الايرودينامك انها تحط سبويلر امامى و تاخد الغذاء بتاع مواسير الجوانب من دايرة الشكمان





دية صورة لأحد تطبيقات استخدام مقاومة الهواء لتخفيض سرعة السيارة لاحظ ان القطعة دية تفاعلية مش مجرد قطعة مثبتة بزاوية





طيب ايه الجديد فى الموضوع ده يعنى !! غير شوية الرغى اللى عمال اكتبه


خد عندك خطوات صناعة و حساب الاوتموتيف وينج و الاستابلتى تيوب بنفسك

اولا الاوتوموتيف وينج

1- اختار التصميم الذى يناسبك على الأنترنت او حتى على العاب السباق الاحترافية اعرف اسمه و ادخل دور على الداتا شيت بتاعة التصميم

2- لو بتعرف تستخدم برامج الكاد و السيميوليشن ارسم التصميم ده و اعمل ليه محاكاة لو مش بتعرف مش هتغلب شوف حد غيرك عامل ليه سيميوليشن

3- ارفع مقاس شنطة عربيتك او سقفها لو كانت هيتش باك لو ناوى تسوق على طرق عادية و سفر و عاوز الوينج ده يعيش يبقى هتزود 10 سم على طول الشنطة بالكتير قوى اوعى تلعب فى عرض الجناح اتبع التصميم

4- كل ما خف وزن القطعة كان افضل و كل ما كانت الخامة اقوى كان افضل نصيحة استخدم اكليرك من 3-6 بالكتير قوى اكتر من كده يبقى تقل على الفاضى و اصنع الاجنحة من الالمونيوم او برد النحاس بتتباع بمقاست كبيرة و صغيرة و كل الاحجام عند محلات الالكترونيات

5- قص و فصل زى ما التصميم بيقول ابداء بظبط الزاوية على 45 درجة و بعدين جرب على الطريق و شوف لو الثبات لسه خفيف زود الزاوية لو الثبات عالى زيادة عن اللزوم و مش حاسس انك بتجرى خفض الزاوية ( لو عملت سيميوليشن هتوفر كل الفيلم ده )

5.5- ابداء زوق القطعة بقى دهان - استيكر كاربون فايبر - استيكر عادى على حسب ما يعجبك يعنى

6-عند التثبيت اصادك طريقين مسامير و خرم فى الشطنة او السقف او مغنطيسات النيبيديوم و ميزة النوع ده انك لما تخلص تفك القطعة عادى و تدخلها على كانبة العربية و تغطى عربيتك عادى ولا كأنك عملت حاجه و لو داخل على كمين رخم انت معملتش حاجه

دية كانت تجربتى مع الاوتموتيف وينج




ثانيا الاستابلتى تيوب

1- هتشوف الفتحات اللى عندك فى الاكصدام الامامى طولها و عرضها قد ايه و تقسمها على 3 بوصة شوف هيجيلك كام قرب لأقل رقم صحيح ده هيكون عدد المواسير

2- هتفصل المواسير من البى فى سى قطر 3 بوصة و تكون حريص ان طول الماسورة يجيب لحد نص العربية

3- تركب اكواع بزاوية و تستعين بزيادات بى فى سى عشان تظبط الفتحات سوا بعض و يكونو بارزين بره عتب العربية

4-هتجمع كل ناحية مع بعض بأفزنة و سيلكون شزلونج و تروح لعفشجى يركبهملك بمسامير شك لاحظ ان بداية المواسير هتكون داخله جوه الاكصدام فى الفتحات اللى بيمر منها الهواء و نهايتها خارجين من عند العتب ولاحظ انى اخترت ال 3 بوصة عشان هيكون في فرق بزيادة بينها و بين ارتفاع الكارتيرة بتاعة الزيت فلما تاخد مطب غلط المواسير هتشيل العربية كلها من تحت و تحمى الكارتيرة بتاعتك نظام حماية يا بلاش


5-دية صورة التصميم اللى شغال عليه من تصميمى لسه مخلصتش و ركبت لاحظ بقى انى مستخدم قوة المقاومة ما بين المواسير اللى عاوز الملف كامل يقولى


لو حد مهتم انا تحت امره اساعده يمشى الموضوع خطوة بخطوة لحد اما يخلصه

بالمناسبة دفع خلفى دفع امامى دفع رباعى دفع بالتقسيط انت جسم بيتحرك فى بحر هواء .

بالتوفيق

[sherifabden]

موضوع رائع ومفيد ومجهود كبير جدا
بس ليه دا موضوعك الاخير ؟؟؟

[Hisham.Elgazzar]

موضوع رائع جدا تسلم إيدك

غيرت فكرتى عن الإسبويلر الصراحة
طيب بالنسبة للسبويلر اللى بيتحرك فى المكلارين والبورشه
أكيد بيشتغل بطريقة الباراشوت انه يقلل سرعة العربية مع الفرامل


فكرة التيوب ممتازة لكن المطبات فى مصر مشكلة كبيرة

[ramy safwt]

المشاركة الأصلية كتبت بواسطة Hisham.Elgazzar موضوع رائع جدا تسلم إيدك غيرت فكرتى عن الإسبويلر الصراحة طيب بالنسبة للسبويلر اللى بيتحرك فى المكلارين والبورشه أكيد بيشتغل بطريقة الباراشوت انه يقلل سرعة العربية مع الفرامل ده مش سبويلر اساسا ده احد تطبيقات استخدام مقاومة الهواء اللى قولت عليها و فعلا بيستخدم لتقليل السرعة زى ما شرحت و على فكرة فى عربيات سباق بتستخدم براشوت فى الشنطة عشان تفرمل خالص خصوصا اللى بتعدى سرعة الصوت فكرة التيوب ممتازة لكن المطبات فى مصر مشكلة كبيرة

التيوب بتكون داخله من قدام جوه الاكصدام الامامى و من الخلف ملمومة على جسم العربية لو مش هتبوظ الا لو اخدت مطب مفجع او علطت على بلاعة مفترية و ساعتها بقى السؤال الجوهرى الخبطة دية تيجى فى كارتيرة ولا حلة فتيس تكلفك فلوس قد كده ولا تيجى فى ماسورة بى فى سى تمن المتر 17 ج ؟!!

[eng/walaaeldeen]

السلام عليكم
الله ينور عليك بصراحه الواحد استفاد وخصوصا كيفية التصميم والأستابلتي تيوب
الله يعطيك العافيه
والله المستعان