سكودا فيليشيا ولا اروع (حكايتي مع بلبله )

[سعيد بديع]

بسم الله الرحمن الرحيم

اخوتي الكرام كل عام وانتم بخير

هحكيلكم حكايه كده علي السريع

في يوم قابلت واحد صديق قوالي ان قدامه عربيه سكودا فيليشيا كومبي موديل 96 خليجي ... موتور 1600 سي سي انجيكشن وباور كامل .... مع العلم انها XL يعني لافيها تكييف ولا زجاج كهربا لكن هي مختلفه عشان مواصفات خليجي

المهم قالي ان العربيه كويسه ومش محتاجه اي مصاريف ومعروضه للبيع بالقسط

مطلوب مقدم 10 الالاف جنيه وقسط شهري حوالي 1250 جنيه والمشكلة انه محتاج حد معاه شريك وهيجبها يشغلها نظرا لانها عربيه كبيرة وكويسه وهتصرف علي نفسها ( دا علي حد كلامه )

المهم روحت شوفت العربيه ولاقيتها عروسه وركبت وجربت لاقيتها زي الفل بس صوت الباور عالي قويي ولما سالت قالولي دي طرمبة الباور عايزة تتغير

المهم العربيه عجبتنا وتوكلنا علي الله ودفعنا 5000 جنيه واستلمنا العربيه مع وعد بدفع باقي المقدم خلال اربع شهور

وبدات العربيه الشغل وبدات المشاكل
اولا السخونيه الشديده الي من غير مبرر رغم ان كل حاجه شغاله كويس
روحنا لكهربائي فغير قربة الميه والترموستات وسلكنا الريداتير وعملنا زرار للمروحه
لكن كل ده محلش المشكلة وفضلت العربيه تتنقل من كهربائي لكهربائي لحل مشكلة السخونة

واخيرا اتحلت المشكلة لكن ظهرت مشكله تانيه وانقطع سلك الدبرياج
ركبنا سلك تاني لن برضه السواق اللي شغال عليها قال ان هو بيحس ان الدبرياج محمل علي الماتور وبيحس ان العربيه بتحرق ومفيش عزم وكان الدبرياج عالي جدا

ورحنا وغيرنا السلك تاني وظبطنا الدبرياج والحمد لله

لكن بعدها بيومين بالظبط حصلت كارثة تانيه

العربيه بتبقي واقفه ودايره لكن تاخد الغيار ومتتحركش وطبعا ده ديسك واسطوانه
وفعلا قمنا بتغيير الديسك والاسطوانه

انا من الاول كان رايئ ان السواق هو اللي تعبان ومش واخد باله من العربيه لكن صاحبي اللي هو شريكي اكدلي ان ده مش حقيقي

مفيش يومين والسواق جه بالعربيه مخبوطه من الجنب خبطه هباب ودي كانت النهايه

قلت لشريكي قدامك حل من اتنين يا اما اديك الاربع الالاف اللي انت دفعتهم كاقساط واما تديني الخمسه اللي دفعتهم انا في الاول كجزء من المقدم

فقالي انه مش هيقدر يدفع اي حاجه لان العربيه صرفت كتير الفترة اللي عدت ( مع العلم انها كانت شغاله زي تاكسي خصوصي كده وبتسافر) رغم كده منكرش ان هو اللي كان بيدفع الاقساط لان العربيه صرفت كتير وانا ظروفي كانت مش سامحه اني ادفع حاجه

المهم اخدت العربيه وربنا وفقني وقدرت ادبر الخمس الالاف باقي المقدم وبرضه ربنا كرمني بواحد بسافر معاه مره كل اسبوع من طنطا للمنصورة وبديني كل شهر حوالي 400 جنيه وبكمل انا القسط من مرتبي

وناوي ان شاء الله في اقرب فرصه استغنا عن المشاوير والسفر بس بعد ما المرتب يزيد شويه عشان اقدر ادفع القسط وانا مرتاح

عايز اقولكم ان العربيه ماشاء الله عليها ربنا يحفظها ويباركلي فيها ماشيه زي الفل الحمد لله ومقابلتش اي مشاكل مع السخونه او الموتور او اي حاجه

انا بس غيرت طقم تيل الفرامل الامامي

وبما ان العربيه كانت مخبوطه من الجنب ومتجرحه من الناحييتين قررت ان ارشها كلها فرن عشان مقعدش ارش حتت معينه وتطلع مبقعه

العربيه معايا لوحدي بقالها شهرين والحمد لله مبسوط منها جدا جدا وحسيت ان ربنا كرمني في الاول لاني محستش بمشاكلها اللي عملتها ..... وده طبيعي زي ما انتو عارفيين اي عربيه مستعمله لازم يكون فيها حبة شغل مهما كانوا قليلين بس برضه هيبقي فيها شغل

واخيرا وصلت لمرحلة المعجون .... بعد السمكرة .... طبعا مش ممعجن العربيه كلها انا بس ممعجن الاجزاء اللي كانت مخبوطه ودي كتيرة اووي

المهم هصنفر واروح افك الجريد والفوانيس والاكر وكل ما يمكن فكه عشان تدخل فرن نضيفه وترض علي نضافه من بره بس

بامانه مش حاسس اني فرحان بيها بسبب شكلها المتبهدل لكن انا حقيقي حاسس برضا عنها وحاسس برضه انها عربيه تعيش متقولش لا

ادعولي يا اخوانا ربنا يباركلي فيها

ربنا اللي عالم عملت ايه عشان اقدر اشتريها وربنا يعيني علي قسطها

علي فكرة عايز اقولكم اني كان معايا قبلها عربيه هوندا برليود وطلعت عين اللي خلفوني وبعدها كان معايا 128 وكانت اعطالها بسيطه وان كانت متكررة

مش شرط ان العربيه انا تدوخك يبقي كل اخواتها كده

عندي جار عنده فيليشيا بيلعن اليوم اللي اشتراها فيه

عندي جار تاني عنده برضه فيليشا بس الصغيرة ... بيموت فيها بمعني الكلمه

هي العربيه بتبقي انت وحظك وعموما ربنا يبارك لكل الناس واتمني ان اللي عنده مشكلة في الفليشيا ربنا يقدره ويقع في حد يقدر يحلله مشاكلها لانها بجد عروسه وتستاهل

[AbOnOrA]

حكاية جميلة والله واجمل حاجة فيها ان نهايتها سعيدة انت وانت بتحكى كنت خايف تتخانق مع صاحبك وتخسرو بعض بسبب العربيه وكنت عايز اكتبلك ان اى عربيه مستعملة طبيعى تحتاج شوية تظبيط علشان كدة بنصح الناس اللى هتشترى مستعمل دائماً يبقى عامل حسابة فى مصروفها
عموماً مبروك العربيه ربنا يهبك خيرها ويكفيك شرها ويقدرك على سداد قسطها يارب

[! KesHo !]

ربنا يباركلك فيها يا باشا ويكفيك شرها
بس انا عاوز اقولك حاجه من وجهه نظرى المتواضعه ان العربيات مش حظوظ ولا حاجه العربيه تصونها تصونك واهم حاجه انك تصرف عليها والاهم بقى ان مفيش كذا رجل تركب العربيه انا عربيتى فورمان 94 اول ما جبتها مكنتش طايقها بس مع الوقت اتعودت عليها واتعودت عليا ومحدش غيرى بيحط رجله فيها وان شاء الله هشدها قريب وهقولكم انا عملت ايه بالظبط ان شاء الله ..

[zing0]

بص يا باشا حضرتك ممكن تكون قافل منها شويه دلوقتى علشان لسه فى المعجون , أن شاء الله أول ما تطلع من الفرن و تشوفها ما شاء الله هتحس أنك معاك مرسيدس شيروكى 4*4

و بالنسبة لموضوع العربيات حظوظ, فعلاً كلام صحيح
العربيه ممكن تكون محتاجه متابعه بإستمرار و إهتمام, و بعض الأنواع محتاجه متابعه مستمرة و مينفعش تطنشها, بس برضه دى حظوظ او (قِرَف)
- واحد زميلتنا راحت تجيب فيرنا زيرو, و هيا خارجه بيها من المعرض, الكاوتشات إتخرمت خرمين!!! .... أرزاق.

بس فى مقوله قالها أخونا مستر أسترا: إللى فيها لله متعطلش
(كان بيوصف حال ميكروباص تيوتا عندهم فى الشغل محتاج شغل فى الكرنك و بيل و هيصه و مع ذلك ,ما شاء الله شغال بقاله 3 شهور )

[سعيد بديع]

متشكر جدا علي ردودكم بس برضه مازالت مصمم ان العربيات حظوظ واللي اقصده هنا انا اواقات العربيات بيكون فيها مشاكل مقرفه زي مشكلة السخونيه في الفليشيا وبتدوخ بيها لحد ما تلاقي صنايعي تمام يظبطها

واوقات تشتري عربيه تلاقيها محتاجه حبة تظبيط في المكنه والعفشه وتمشي معاك حلاوه وزي الفل وده المقصود من حظوظ

بس حقيقي والله انا مبسوط بيها جدا والحمد لله لان المكنه كويسه ومفيهاش اي مشاكل غير حبة تظبيط يعني مثلا اكتشفت ان الزيت بينقص فسالت المكيانيكي فقالي محتاجه جوان
وكرسي الفتيس مكسور ومحتاج يتغير وطبعا الموضوع ده مش هيتكلف ااقل من 150 جنيه وده مش مزعلني لان حسب ما فهمت ان دي مشاكل عاديه .... الاهم من ده كله انك عارف سبب المشكلة ايه

المشكلة بقي اما العربيه يكون فيها عيب وانت المكيانيكي مش عارفين العيب فين بالظبط

متشكر جدا يا جماعه علي ردودكم والله فرحت جدا جدا انا شوفتها ويارب يباركلكم في عربياتكم ده وتفرحوا بيها زي ما انا فرحان بعربيتي