ال flywheel او الحدافة

[Vanditta]

السلام عليكم ورحمة الله وبركاتة

بقالى فترة بعانى من صعوبة فى نقلات الفتيس وكنت فاكر ان الموضوع دة من الدبرياج (واطى وعايز يعلى)
المهم عليتة عند الميكانيكى على الاخر
وعملية الفصل بقت فى اخر الدواسة برضو مع ان الدبرياج عالى على الاخر

المهم من يومين كدة لاحظت كمان ان العربية اما تسخن بعد مشوار طويل مثلا
الغيارات كلها بتزعق خصوصا الاولانى والمارش
واما العربية تبرد الموضوع بيبقى اخف شوية (بس موجود برضو)
المهم سئلت وعرفت ان دة من الديسك
وهاروح ان شاء الله يوم الجمعة اجيب طقم دبرياج واغيرة كلة بالمرة


المهم قريت على منتدى teamswift انك لازم وانت بتغير طقم الدبرياج تعمل
1- flywheel resurface
2-rear crankshaft seal تغيرة


فدلوقتى عشان اقول للميكانيكى اعملى الكلام دة اية هو الاسم الدارج بتاع الصنايعية لل flywheel ؟؟! هل هو الحدافة ولا الفولام ولا الاتنين واحد ولا اية بالظبط

وهل لازم فعلا انضف ال (حدافة ) دى عند الخراط وانا بغير الدبرياج ولا عادى مش مهم
وسهل انها تتفك ولا حوار ؟!




والاويل سيل دة rear crankshaft seal هايبقى اسمة اويل سيل كرنك خلفى ولا لية اسم تانى (عشان ماحدش يضحك عليا بس)

وهل الكرنك لية 2 اويل سيل ؟! اصلى لسة مغير اويل سيل كرنك اللى فى وش التقسيمة

[handtools123]

أسمه حدافة أو ترس الفلام أى من الأتنين أنا كنت قريت بردو على موضوع تنضيف الترس الفلام لما تيجى تغير طقم دبرياج عشان تشيل أى حاجه من الطقم القديم ويكون شغل على نظافة بس موضوع يتنظف أزاى معرفش هل لازم يروح عند خراط ولا أه بالظبط

[eng/walaaeldeen]

المشاركة الأصلية كتبت بواسطة handtools123 أسمه حدافة أو ترس الفلام أى من الأتنين أنا كنت قريت بردو على موضوع تنضيف الترس الفلام لما تيجى تغير طقم دبرياج عشان تشيل أى حاجه من الطقم القديم ويكون شغل على نظافة بس موضوع يتنظف أزاى معرفش هل لازم يروح عند خراط ولا أه بالظبط

السلام عليكم
اسمها الحدافه او الفولام انما ترس الفولام ده بيركب على الحدافه ويدخل في دائرة تشغيل العربيه حيث ان ترس المارش يعشق مع ترس الفولام
اما التنظيف يسمي مس الحدافه ويكون عند خراط بس يكون شاطر لكي يظبطها وقبل مسها لابد من قياسها لأن من الممكن تكون مش محتاجه مس
والله اعلى واعلم
والله المستعان

[Vanditta]

طب معلش يا جماعة سؤال كمان
هو الديسك ممكن يتصلح ؟! زى ما الاسطوانة بتتملى كدة
اصلى تقريبا هادووخ برضو على طقم الدبرياج بتاعى على ما الاقية عشان الموتور عندى 1000 سى سى والموجود فى السوق بتاع ال 1300 وتقريبا الديسك حجمة اكبر فى ال 1300

[حسام البورسعيدى]

نصيحه هات طقم دبرياج كامل وبلاش ملى الاسطوانه ومسح الديسك فى المخرطة والعك ده علشان ديسك يتمسح فى المخرطه يبقى هتحس برعشه مع الطلعه والرخامه دى بقى ..

لو طقم الـ 1300 يركب عندك هاته لو ملقتش بتاعها مش هيفرق فى حاجه

الـ fly wheel هو الفولام او الحدافه ومعروف عندنا بالفولام وده الترس اللى بيركب عليه المارش علشان ندور العربية وده ملوش علاقه بالديسك والاسطوانه الا لو كان محتاج تغيير(لو فى مشاكل فى الدواره) يبقى غيره بالمره وانت حالل الفتيس ...