أبلاتينى لااااادع ...... هل طريقة تغييره صحيح

[zing0]

السلام عليكم
أحب أعرف من الأساتذة و الخبراء, ربنا يديم علينا و عليهم الصحه و الستر
عندى الأبلاتين بيلدع بسرعه, ربما لعيب من الموبينا أو الكوندنسر, بس الأكيد لأنه مضروب.
المهم: يوم الجمعة إللى فاتت قولت أعمل حركة جدعنه مع زوبه و أشتريلها أبلاتين جديد لأن إللى راكب إتهرى سنفرة.
و بالمره رحت للميكانيكى و ركب و ضبط و تمام (مرضيتش أركبه أنا)
الأبلاتين مكتوب عليه فرنساوى و محفور على الجسم المعدن بتاعه Made in France و علبته زرقاء (كرتونه زرقاء عليها بلاستيك مجسّم الأبلاتين)
طبعاً ده كله أونطه و الأبلاتين صينى مضروب بالجزمه و ده شئ أنا عارفه قبل ما أشتريه.
بس إللى معرفوش أن صلاحيته يومين بس, يعنى يوم الإثنين لدع.
الجميل أيه بقى:
نفس النوع ده معايا منه 3 و كل ما أسنفره و أركبه ميشتغلش
معايا واحد إنجليزى Made in England و برضه مضروب بس بالشبشب مش بالجزمه, نوعه أفضل شويه, و المطرقه بتاعته حجمه أصغر من الطبله. بصراحه كل شويه أركبه بس خلاص تعب.

أنا عادة بفك كوباية الإسبراتير و أفك الأبلاتين و أسنفره و أركبه و أوصل السلك بتاعه ثانى و أجرب, و لا بغير فى اتجاه الشاكوش و لا بألعب فى أى حاجه ثانيه.
هل الطريقه دى صح و لا لازم أغير الكهربا؟؟؟

لو حد عنده نوع أبلاتين كويس يدلنا عليه حتى لو هأجيبه من التوفيقيه. بس المهم يرحمنا من الشغلانه دى. ده أنا بقى معايا كيس للأبلاتينات بس.

[mr_astra]

هههههههههههههههههه
====================
نفسى ربنا يرزقنا بمستوردين عندهم واحد فى المية ضمير
او ان الحكومة تحترمنا شوية وتراقب على اى منتج يدخل البلد
او اننا احنا اللى نصنع حاجة محترمة

[zing0]

أبلاتينى لادع كلاكيت 10000000000 مرة
========================= =
النهارده صحيت الصبح و قولت أروش العربيه شويه علشان عيد العمال و كله إجازة
- كنت مغير زيت محرك بالأمس و الراجل فحص زيت الفتيس و الفرامل و الكرونه و .... و نضف فلتر الهوا و .... لاقى أولسية الكرونه ضارب, و طبعاً لازم أغيره و أرجع أزود زيت.
المهم, فتحت الكبوت و شوفت معيار الزيت و المياه و رحت مطلع فلتر بنزين جديد من شنطة العدّه و ركبته.
أجرب أدور ... العربيه بتترج كأنها متلته.
بصيت عالأبلاتين كالعادة لاقيته لادع, رحت مصنفرة خفيف و هو راكب مكانه
فصل خالص, لا متلته و لا متنيّه حتى.
فكيت الأبلاتين خالص (لأنه من اللى مكتوب عليه فرنساوى) و رجعت ركبت الإنجليزى, برضه مدارتش.
فتحت شنطة الأبلاتينات و الكوندنسرات و جربت 7 أبلاتين و 2 كوندنسر. و برضه مدارتش.
طبعاً بعد ساعتين و ربع أفك و أجرب و .... و ظهرى أتلوح و جالى شد عضل و حاله نفسيه زى الزفت.
رحت لميكانيكى أول مرة أتعامل معاه - بس الوحيد إللى كان فاتح الصبح - بعت معايا الواد بليه و فك الإسبراتير و قعد يلعب و فى الآخر ضاع مسمار من المسمارين إللى بيربطوا الأبلاتين و برضه مدارتش, راح قايلّى: عاوزة وش إسبراتير بالكوبايه بتاعته طبعاً دى الحاجه الوحيده إللى أكدتلى أنه بيجرب و حمار, قولتله: لأ سيبها عنها مدارت.
راح للأسطى الورشه و قاله على إللى حصل, الأسطى رجع معايا و قعد يلعب و يفك و يشيل و فى الآخر لاقيت البوجيهات معرقه زيت !!!!!!!!!!!!!
كان معايا طقم فى العربيه , رحنا مركبينه ...... و برده مادرتش
راح فاكك خرطوم البنزين من الطرمبه و قعد يكارك من عند كوع السيخ إللى عند الكربراتير. و فجأة دارت. الحمد لله

عاوز أعرف العيب من أيه بالضبط, و لعاشر مرة بسأل: هل طريقه تركيبى للأبلاتين صح؟

[zing0]

http://www.youtube.com/watch?v=W94iksaQwUo

http://www.youtube.com/watch?v=Y9wZvcr3v2c

[mr_astra]

فى علامة على وش الموتور من ادام فوق الطنبورة بتاعة الموتور
العلامة دى عبارة عن 3 شرط
بيقابلها شرطة على طنبورة الكرنك
حاول تخلى الشرطة على العلامة الوسطى
وفى الوقت دة نزل الاسبراتير واتجاة الشاكوش على بستم رقم واحد
وطبعا بتعرف الاتجاة من وش الاسبراتير
لو ظابط فتحة الابلاتين مظبوط يبقى لازم تدور بامر الله

مشكلة الابلاتين عند حضرتك .......البوبينة فيها شورت جزئى فبتاخد امبير اعلى من اللى المفروض الابلاتين يتحملة وبكدة بيدلع باستمرار