أولا أحب اشكر الرجالة اللي تشاوروا معايا في المشكلة اللي عندي ...
ثانيا : هاتعبكم معايا و اقول لكم اللي حصل و انا باستلم العربية و رأيكم يهمني جدا
المهم طبعا رحت استلم العربية يوم 5 مارس اللي هو امبارح ... و بعد تدبير المبلغ المطلوب اللي طلع 1600 جنيه ... فقاعد باتشاور مع الوالد في الطريق بالمواصلات و في زحمة شارع جسر السويس ... قلت له انا مش هاقبل الكلام دة و مش داخل دماغي حرق الاسطوانة بسهولة كدة ... قال لي و لا انا ... قلت له لو قالوا لي المشكلة فين هنستلمها لأن مش داخلة دماغي اللعبة بتاعت تغيير طقم دبرياج كامل دي .. المهم الوالد وافق على كلامي و اتصرفنا على النحو دة ... لأن احنا اللي شفنا المشكلة واقعيا على الطريق ... و الاسطوانة اكيد مش هتتحرق خلال دقيقة واحدة ... مابقاش ماشي بالعربية ما شاء الله 10 على 10 ... و تحصل المشكلة اروح بيها زاحف ... انا دفعت الـ 1600 جنيه دول و اكتر منهم اجهاد من التركيز عشان اعرف اسوق العربية على الطريق ... و عناية ربنا كانت تسبق كل دة
الحمدلله وصلنا ... لقينا الطريقة اللي اتعاملوا بيها معانا نظام ايه ... سلمهم و مشيهم بسرعة ... ساعتها اتأكدت شكوكنا ... صممنا نعرف فين المشكلة طبعا وقف معانا المهندس الكبير هناك ... و بدون ذكر اسمه ... قرر يقولنا ان المشكلة مشكلة اسلوب قيادة ... و مع شد و جذب ... ساعتها انفعلت عليه ... قلت له دة مش سبب منطقي ... العربية فيها مشكلة اكبر ... الابتسامة اختفت من على وشه و انقلب للوضع الدفاعي .. يا فندم احنا مش بنكدب عليك ولو فيه حاجة هنقول ... قلت له دي مش مشكلتي ... العربية فيها مشكلة اكبر و انا بالنسبة لي انا بالنسبة لي حرق الاسطوانة شئ عادي جدا لأني ماشي باحرق عليها مسافة 70 كم و العربية عطلانة ... يبقى منطقيا فيه مشكلة اكبر ... لأ يا فندم الاسطوانة متفحمة ... و طقم الدبرياج شئ استهلاكي و مادام العربية خرجت من الاجنس الدبرياج خرج برة الضمان ... قلت معني ذلك لو الدبرياج اتحرق على ما اروح البيت من نفسي المشكلة الغير معلومة سيادتك انا هادفع 1600 جنيه تانيين ... رفض يرد على سؤالي ... و كررت السؤال رفض يرد
رفضت الكلام دة نهائيا ... قلت له دة حاجة من تلاتة ... يا اما العربية فيها مشكلة .... يا اما اسلوب قيادة ... يا اما العربية غير مطابقة للمواصفات و في الحالة دي هيونداي هتبقى زي كومودو ... ضحك بيقولي هيونداي هتنزل حاجة غير مطابقة للمواصفات ... ردي كان بأن اللي بيشيل منها الايه بي اس و الايرباج و الاي اس بي ... يقدر يلعب في مستوى جودة الاسطوانة ...
يا فندم دة اسلوب قيادة ... و انا مسكت يا اما مشكلة كبيرة يا اما غير مطابقة للمواصفات و رديئة الجودة ...
و انا عاوز تقرير بالمشكلة اللي قدامك مهما كانت ... اقدمه لغبور اوتو او اخاطب بيه الشركة الأم او اخاطب بيه حماية المستهلك ... قال لي مش هاقدر اقدم لك حاجة زي دي ... قلت امال انا هادفع على اساسا ايه ... انا عاوز تقرير قالي مش هاقدر اقدمهولك ... قلت له امال مين يقدر يقدمهولي بيقولي ماعرفش ... قلت له انا راجل بتاع تجارة و اعرف في الميكانيكا على قد امكانياتي ... ووالدي راجل في التعليم و معرفته في الميكانيكا على قده برضوا و انت ماشاء الله مهندس قد الدنيا و امكانياتك اعلى من مشكلة زي دي ...
طيب انا عاوز اشوف المهندس اللي قامم بتصليح ... الرد كان جاهز بأنه روح بدون حتى ما يشوف هو فين .... طيب ايميل الشركة الام ... قاله بسرعة مهما كانت سرعة ادراكك مستحيل تلحق تحفظه
المهم ... طبعا كل كلامه كلام متوتر جدا ... و رفضنا الاستلام ... ياريت تدلوني اعمل ايه ... و ياريت لو حد يعرف ايميل الشكرة الأم يديهوني
06-03-2013, 07:46 PM
متابعة " عملتها النيو أكسنت .... أرجو الافادة ضروري "
