معلومات عن الكاوتش و الجنوط 1

[svneleven]

يا جماعة كان في واحد من الأعضاء هيشتري جنوط من بره و كان بيسأل عن معلومات عن الجنوط و أنا كتبت له الحاجات ديه بس قولت أحطها بردو في مشاركة جديده عشان كل الناس تستفيد.
و ان شاء الله هحاول كل كام يوم أكتب معلومات عن الكاوتش و الجنوط للي يحب يستفيد و ان كنت عارف ان المنتدي هنا فيه وحوش عارفين كل حاجه بس بردو يمكن حد يستفيد من معلوماتي البسيطة.
المهم ديه شوية حاجات لازم تخلي بالك منها و أنت بتشتري الجنط خصوصا لو هتجيبه من بره أقصد مش هتعرف تجربه عملي علي عربيتك قبل ما تشتريه:
Offset: الألمان بيسموه ET وهو المسافة بين وش الجنط اللي بيركب عليه المسامير و بين منتصف الجنط و المفروض تلاقيه علي الجنط بتاعك عباره عن رقم مكتوب جنبه ET. المهم ده لو زودته عن الرقم اللي عندك الجنط لما تركبه هيدخل ناحية موتور العربيه و ممكن يحك و لو قللته الجنط هيخرج لبره يعني هيبعد عن الموتور و هيحمل علي المسامير و يدايقك و أنت بتحود. فانصحك ما تغيروش كتير. يعني لو 49 مثلا أخرك تخليه 50 أو 51 و ممكن 48.
BCD - Bolt Circle diameter ده عبارة عن قطر الدايرة اللي موصلة المسامير ببعض.
Bolt pattern: ده عباره عن رقمين مثلا 4x100 يعني 4 مسمار و 100 هو BCD. و بردو هتلاقيه علي الجنط , لو غيرته الجنط الجديد مش هيركب.
HCB او Hub Center Bore ده بقي الفتحه اللي في نص الجنط من ورا اللي بتقابس علي طمبورة العربيه نفسها و ديه لو جت أكبر مش مشكلة و كل الناس حتي بره بيجيبو رنجات بلاستيك عشان تركب بين الطمبورة و بين الجنط نفسه وتكون مقابسة من غير خلوص و طبعا لو جت أصغر مش هتركب عندك خالص اللهم الا رحت للخراط عشان يوسعها و طبعا ده اختراع فاشل و خطر.

[svneleven]

أنا كنت كملت المعلومات ديه في خمس مواضيع منفصلة لكن فيه احد الأعضاء مشكورين طلب مني أجمعهم مع بعض عشان يكون موضوع متكامل.
نبدأ بقي.
ايه اللي يخليك تغير جنوطك بجنوط رياضيه. أول سبب طبعا ان شكلها أجمد بمراحل و بيخليك تحس انك جبت عربية جديده و طبعا يمكن هو ده السبب الوحيد اللي بنهتم بيه. لكن كمان الجنوط الرياضيه بيكون وزنها أخف من الجنوط الحديد العاديه و ده بيخليها توفر في استهلاك البنزين و تحسن من تسارع العربية و كمان بيخلي التوجيه أكثر دقة و خفة كمان. يعني تحس فعلا ان الدركسيون أصبح أخف. طبعا معظم الناس مش بتحس بالميزة ديه عشان في معظم الأحيان الناس بتعرض الكاوتش جامد مع تغيير الجنوط و ده بيزود الاحتكاك مع الأرض و يخليك ما تحسش بالتحسن في الدركسيون. فوق ده كله الجنوط الرياضيه أساسا معموله من سبائك معدنيه بتديك صلابه و قوة و كمان بتفقد الحرارة بسهولة و بالتالي الفرامل و الكاوتش بيكون أكثر برودة و ده بيديك فرامل أحسن لأن الكاوتش أبرد و مش بيتزحلق علي الأرض و تيل الفرامل كمان أبرد فبيمسك أكتر.
الأنواع بقي عندك حاجات غاليه زي BBS وOZ وMOMO و ENKEI و ADR و American Racing و طبعا فيه بقي الكوري و الهندي و الصيني و التايواني و أحسنهم التايواني. و في مصرنا الحبيبة أهم حاجة تشتري من محل محترم و بلاش تسترخص عشان الغلطه في الحاجات ديه بجون.
مقاس الجنط بقي و كده نتكلم عليه ان شاء الله لما نتكلم علي مقاسات الكاوتش نفسه عشان هما مرتبطين ببعض.

[svneleven]

الجنط اتكلمنا قبل كده علي ال BCD, HCB, Offset, Bolt pattern .
المفروض كل الحاجات ديه تكون مكتوبة علي الجنط. كمثال هتلاقي مكتوب 15x6-JJ 114.3-4-33 معناه ايه بقي؟
*15 ده قطر الجنط بالبوصة اللي هيه 25.4 مم و بنسميه جنط 15 بغض النظر عن باقي المواصفات.
*6 ده عرض الجنط بالبوصة بردو.
*114.3 ده ال BCD
* 4 يعني 4 مسمار
*33 ده بقي ال Offset و أحيانا بيتكتب لوحده كدهُ ET 33

[svneleven]

أنا متأكد ان ال 3 مواضيع اللي فاتت كانت مملة لأنها عبارة عن معلومات بحته لكن ديه كانت مقدمة لابد منها.
نبدأ بقي نتكلم عن الحاجة اللي بتهم الناس كلها.
ايه معني الكلام اللي بيتكتب علي جانب الكاوتش؟
ناخد أي مثال و ليكن المقاس المشهور 175/70R13.
175 ده بقي عرض الكاوتش علي الأرض ب مم. يعني 175 مم أو 17.5 سم.
70 ديه تستعملها عشان تجيب ارتفاع الكاوتش بين الجنط الحديد و بين الأرض. ازاي؟ نضرب عرض الكاوتش في 0.70 يعني (175*0 0.7 = 122.5 مم) يبقي أنت عندك 122.5 مم كاوتش بين الجنط و الأرض.
13 معناها ان القطر الداخلي للكاوتش 13 بوصة (البوصة 25.4 مم ) أو بمعني أخر الكاوتش ده ما يركبش غير علي جنط مقاس 13 بردوا يعني ما ينفعش تركب عليه جنط 14 و لو هتجيب جنط 14 يبقي لازم تغير الكاوتش.

فيه كمان حاجات تقولك الكاوتش ده يشيل كام كيلو و أقصي سرعة ليه أد ايه و كمان معمول أمتي عشان ما نجبش حاجة مرمية عند البياع بقالها سنة أو أكتر و هو هيدهالنا بسعر حلو عشان يخلص منها و احنا نكون مستكانيسين علي الأخر.
كمثال: P205/75R15 89H
علي فكرة هي دي الكتابة الصح اللي بتبقي علي جنب الكاوتش. تعالو نفسرها مع بعض.
P معناها عربيه ركاب Passenger و ممكن يتكتب مكانها LT يعني عربيه نقل خفيف Light Truck و ممكن حاجات تاني بس ده هو المهم.
طبعا عارفين يعني ايه 205/75R15
89 ده Load index بندخل بيه في جدول نجيب أقصي وزن ممكن العجله بتاعتنا تشيله و طبعا بنضرب الوزن ده في 4 ( عندنا أربع عجلات) عشان نجيب الوزن الاجمالي اللي العجل بتاعنا ممكن يشيله. وده رابط فيه الجدول ده و صور توضيحية و معظم المعلومات اللي بنتكلم عليها http://en.wikipedia.org/wiki/Tire_code
في حالتنا هنا 89 معناها ان العجلة الواحدة ممكن تشيل حوالي 1279 رطل و الرطل ده حوالي 450 جرام. يبقي العجلة الواحده تشيل حوالي (1279X0.450=575.5 ) كجم بمعني أخر وزن العربية و الركاب و الشنط و كل حاجة ما تعديش 575.5X4 يعني حوالي 2300 كيلو.
H ديه بقي رمز السرعة Speed Symbol بردو بندخل بيها في جدول عشان نجيب أقصي سرعة ممكن العجلة تمشي بيها. من الجدول اللي في الرابط اللي فات هيقولك ان ال H معناها 210 كم/س.
لو دورت بقي علي جنب العجلة هتلاقي مكتوب حاجة اسمها DOT و جنبها في الاخر 4 أرقام مثلا 2209 ده معناه أن العجلة ديه انتاج الأسبوع ال 22 سنة 2009. و ديه لو ملقتهاش علي جنب العجلة تبقي مكتوبة علي الجنب التاني. و الرابط ده موضح الكلام ده.
http://www.google.com/imgres?imgurl=...Q9QEwAg&dur=39
بس كده ديه الحاجات المهمة اللي ممكن تعرفها من علي جنب العجلة.

[svneleven]

طيب واحد عنده مقاس 175/70R13 و عايز يغير ل مثلا 185/65R14 . طب ايه الفرق؟
في حاجتين هيتغيرو هما العرض و الارتفاع الاجمالي للعجلة كلها و اللي هيأثر بالتبعية علي الارتفاع الاجمالي للسيارة.
العرض سهل. عرض الأولاني175 مم و عرض التاني185 مم. يعني الكاوتش هيبقي أعرض 1 سم بحالة علي الأرض.

طب ازاي نحسب الارتفاع الاجمالي للكاوتش مع الجنط عشان نعرف العربية هتعلي و الا هتوطي؟
احنا بنحسب الارتفاع من السنتر بتاع العجلة لحد الأرض و لازم نستعمل وحدة قياس واحده و أفضل تكون مم.
175/70R13
* أولا نحسب ارتفاع الجنط. الجنط كله 13 بوصة يعني (13*25.4 = 330.2 مم) بس أنا عايز نصه بس عشان بنحسب من السنتر زي ما قلنا يبقي (330.2/2= 165.1مم).
*طب عايزين بقي ارتفاع الكاوتش بين الجنط و الأرض. زي ما قولنا فوق (175*0.70=122.5مم).
*جميل كده عندنا المسافه من السنتر بتاع ال الكاوتش (من السرة يعني) لحد اخر الجنط المعدن و كمان عندنا المسافة من أخر الجنط المعدن لحد الأرض (اللي هيه ارتفاع الكاوتش) بكل بساطة نجمع الاتنين يبقي هو ده المسافة من السرة لحد الأرض. ( 165.1+122.5=287.6مم).

185/65R14
*احسب أنت بقي ارتفاع المقاس التاني بنفس الطريقة هيطلع (177.8+120.25=298.05مم)
*كده لما نركب المقاس الجديد العربيه هتعلي (298.05 - 287.6= 10.45 مم) يعني حوالي 1 سم بحالة و ده كافي انه يخليك ما تحكش في أي مطب و طبعا لما بنعلي شويه الثبات بتاع العربية بيقل لكن ما ننساش ان الكاوتش بقي أعرض علي الأرض و ده بيزود الثبات فهتلاقي المحصلة ان الثبات زاد أو علي الأقل ما قلش.
*حاجة مهمة بردو و ناخد بالنا منها هي الفرق بين ارتفاع الكاوتش (المطاط يعني من غير الجنط) بين المقاسين لأن ده اللي بيأثر علي ان العربية تكون طريه و الا ناشفة. المقاس الأصلي بتاعنا كان 122.5 مم و الجديد كان 120.25 يعني قل 2.25مم و ديه حاجة بسيطة مش هتحسسك بأي فرق في العفشة لكن تبدأ تحس بفرق بسيط لو قل زيادة عن 10 مم مثلا.
*المهم بقي احنا كده بنعرف نحسب كل حاجة عن الكاوتش يعني العرض و الارتفاع و علينا العربية و الا وطيناها لكن المشكلة انك ما تعرفش تجزم ان كان الكاوتش الجديد هيحك في الرفارف أو في الكارتيرة البلاستيك بتاعة الرفرف خصوصا ان ده بيختلف من عربية لعربية و يعتمد علي الخلوص و المسافات و أبعاد العربية نفسها و لو بتاع الكاوتش حلف بالطلاق انها مش هتحك ما تصدقوش لأنه ما يقدرش يتأكد. المطلوب بقي من سيادتك قبل ما تغير الكاوتش و الجنوط تحسب حساباتك و تروح تقيس عربيتك و تحود يمين و شمال و تقيس الخلوص و تشوف المسافة أد ايه بين الكاوتش و الرفرف و بعد كده تتوكل علي الله. و طبعا شوية عقل كده يعني لو واحد مثلا مقاسه 13 و عايز يركب 14 أو 15 أقوله احسب و قيس و اتوكل علي الله و ان شاء الله مش هتحك. واحد بقي عسولة عنده 13 و عايز يركب 17 مثلا أقولة هتحك يعني هتحك و لازم بقي تدخل في موال العلايات و تقص من الرفارف و شغل القص و الزق ده.
المهم أتمني بالمواضيع الخمسة اللي فاتت أكون قدرت أساعد كل رواد المنتدي في أختيار الكاوتش المناسب لعربياتنا بعيد عن الوهم و شغل السوق و الله الموفق و المستعان.