سؤال مهم يا ريت أى حد يجاوبنى عليه ... او نتناقش سوا لغاية ما نوصل لحل

[MANDO09]

هل من حقى كمواطن انى أركن عربيتى قدام العمارة اللى انا ساكن فيها ولا لأ ؟؟؟
طب وفى حالة وجود محلات تحت العمارة ؟؟؟
مستنى ردودكم

[sayed2077]

بص يا اخى هو من وجهة نظرى انا كالاتى
ان مفيش حد يقدر يمنع حد انه يركن فى اى مكان الا فى حالتين
الاول انه يركن ادام جراج وده مينفعش طبعا
الثانية فى حته هيقفلها خالص
غير كده كل واحد عاوز يركن فى الحته اللى تريحه يركن فيها والمفروض محدش يقوله انت بتركن ازاى وعلى فكره انا كنت ماشى على الاسلوب ده مع الجميع وكنت بسيب الناس من العمائر اللى جنبنا يركنوا ادام بيتى عادى جداااا وانا اروح ادور على اى حته تانيه اركن فيها بس لما جه عليا وقت لقيت فيه مكان بيبقى فاضى فى عمارة الناس اللى كانوا بيركنوا ادام بيتى ورحت ركنت فيه لقيت الناس جت صحيتنى من النوم بيقولى شيل عربيتك وانا قولتلهم مانا كنت بلاقى عربيتكم راكنه ادام بيتى وانا اروح اركن فى حته تانيه مكنتش بتكلم قاللولى ماليش فيه روحت طبعا شيل عربيتى وقررت اسفا ان المعامله تبقى بالمثل وفى مره جيت الشارع مكنش فيه مكان واحد فى الشارع كله واول ما وصلت عند بيتى لقيت الناس اللى من العمارة اللى جانبى راكنين والساعه كانت حوالى 1 بليل روحت رايح ومصحيهم وخليتهم يشيلوا العربيه بتاعتهم علشان اركن وعلى فكره انا مكنتش سعيد خالص باللى انا عملته بس للاسف انا قدمت السبت و هما مقدموش الحد فاكيد مش هيلاقوا الاثنين خالص ههههههه
ومن ساعتها بقيت بلاقى مكان ديما تحت بيتى ولو حصل وحد فيهم جه وركن بروح انادى عليه علشان يشيل عربيته وطبعا بيشيلها
ديه قصتى انا

اما بالنسبه لحضرتك فحكاية انك تركن ادام محل فديه تتوقف على حاجات كتير هل المحل لو انت وقفت قدامه حركة البيع والشراء هتتاثر جامد ولا عادى فطبعا انا مقدرش افتى خالص فى حكاية ان حضرتك تركن ادام المحل ولا لا لانها بتتوقف على ظروف كتير انا معرفهاش

[Elsebily]

انا شخصيا لو انا هركن قدام العماره عادي جدا انا ماليش علاقه بالمحل ياما محلات كتير والعربيات راكنه قدامه ومش من حقه يمنع حد من سكان العماره انه يركن اهم حاجه انك متوقفش الشارع او ميكنش الشارع مثلا تلت حارات وناس واخده اليمين والشمال يركنو فيه

[mohamed elshahat]

لا طبعا حقك مادام قدام بيتك او عمارتك

[mhamdy75]

طبعاً مش من حق أى حد يمنع أى حد من إنه يركن فى أى مكان

وجيرانى مش بيحبوا الحته دى عشان بركن عربيتى عند بيتهم

وبيحطوا حجارة وبشيلها فى شنطة عربيتى وارميها

واتكلمنا كتير وبساطه شديدة بسألهم سؤال :

هو حضرتك لما اشتريت الشقة قالولك ليك 10 متر فى الشارع ؟؟؟؟؟

أو لما يقولى المكان ده بتاعى أقوله هات اللى يثبت الكلام ده

أو أقوله متفقين خلاص الشارع قدام عمارتكم يشيل مكان ل3 عربيات

وعمارتكم فيها 9 عربيات فلو شفت عربيه منهم راكنة فى أى حته فى الشارع غير قدام عمارتكم

هاتصرف ساعتها براحتى

--------------

وكان فى صيدلية حاطط حجارة عشان ماحدش يركن والمكان ده يساع 3 عربيات

شيلت الحجارة فى الشنطة برضو وسيبتله واحد بس اللى قدام باب الصيدلية

موضوع قوى جداً ياباشا وتشكر عليه

خصوصا مع انتشار ظاهرة وضع الحجارة أو مواسير الحديد وخلافه