نفسى حد يرد عليا

[alaasal]

السلام عليكم و رحمة الله
الصيف اللى فات فى اخر شهر 8 مره واحده باشغل التكييف مالقتش له اى اثر
نوبيرا 2003
رحت لواحد محترم فى الزقازيق بتاع تكييف و كنت متوقع ان حصل تسرييب فى الفريون
قاللى الفريون موجود بس الكمبريسور فيه حاجه زى البلف كده هى اللى بتبوظ و عايزه تتغير و يتشحن
المهم غير البلف ده و شحنلى تانى و دفعت حوالى 350 جنيه
و ساعتها كان حلو
تانى يوم بيجيب شويه هوا ساقعين مالهمش لازمه و لازم اجيب المروحه على 3 او 4 علشان احس بيهم
رجعتله فقاللى كده يبقى الكمبريسور عندك بدأ يضعف و عايز يتغير مشى نفسك كده لغايه ما يروح خالص و نبقى نغيره
رحت لواحد تانى قاللى لا لا لا الكمبريسور ضغطه تمام ده البلف هو اللى بايظ و انا عندى بلوفه اصلى و غير و شحن و خد 300 جنيه و نفس المشكله
الكلام ده السنه اللى فاتت و قلت خلاص الصيف ده اجيب كمبريسور
واحد صاحبى من 4 ايام خدنى لواحد تالت حبيبه
قاللى الكمبريسور تمام و المشكله فى البلف و انا عندى كمبريسور استيراد هاديك البلف بتاعه احسن من الصينى اللى فى السوق و غيرلى البلف و الفلتر اللى جنب السربنتينه و شحن و اخد 350 جنيه
و تانى يوم نفس المشكله رجعتله
شافه و جرب و فاللى المشكله ان عندك مليان زيت مع الفريون \
و فضى الشحن و ركب موتور غريب كده و قاللى علشان نطلع الزيت الزياده و شحن تانى و للامانه ماخدش فلوس تانى

المهم ان تانى يوم نفس المشكله تبريد مالوش معنى

رحت لواحد بتاع استيراد معرفه و اثق فيه بس كنت لسه شاحن و حان التكييف حلو ( يوم الخميس ) قاللى الكمبريسور عندك ولا صوته خشن ولا حاجه جرب الاول الشحن ده و شوف

ز طبعا دلوقتى مالوش لازمه و برده هوا ساقع خفيف

ناس من اصحابى و من اللى قريته بيقولوا ممكن الاكسبنشين يكون بايظ

و وواحدج معاه ميتسوبيشى جالانت فاللى قبل كده عنده السخن كان بيفتح مع البارد لما يشغل التكييف و مش عارف اعمل ايه

رحت امبارح لواحد فى مدينة فاقوس عنده كمبيوتر للتكييف
بصراحه الراجل تمام ركب الكمبيوتر و لقى ان الفريون الموجود 400 جرام انا قريته بعينى
قاللى انا ممكن ازودهولك لكن المشكله انا معرفش الفريون اللى عندك نوعه ايه
فضى كل اللى فيها و كبسها هوا و لختبر بالصابون و ساب العدادات حوالى 30 دقيقه و اطمنا ان ماقيش تسريب
ركب الجهاز تانى و نضف الدوره بالكامل
الجهاز فضل يعد 10 دقايق تنضيف
و بعد كده الجهاز عمل تيست و بعدين الفنى ضبط 720 جرام و بداء الشحن
و بعد ماخلص الجهاز عمل تيست تانى و تمام
شغلت التكييف
هو اشتغل طبعا لكن تبريده ضعيف
مش عارف المشكله ممكن تكون فين ( الكمبريسور ولا الاكسبنشين )
كان فيه عدادين فى الكمبيوتر الفنى قاللى واحد لضغط الكمبريسور وواحد للراجع
و كان بتاع الكمبريسور 180 تقريبا و انا سالته ده كده كويس و قاللى ايوه لكن فى الحر الضغط بيزيد
و قاللى الكمبريسور عندك حلو

انا مش فاهم حاجه و عمال اصرف فى فلوس ع الفاضى
ارجو منكم تساعدونى

[mr_astra]

كان الله فى العون مشكلة رخمة بصراحة وربنا يسهل وواحد من الزملاء يؤلك على الحل

[yaso12]

والله واعلم كان عندى حاجة مشابهه فى الهيونداى الاكسيل واكتشفت ان الكويل اللى راكب ورا التابلوه مش نضيف وبعد تنضيف الكويل ودورة التكييف اتحسن التكييف بنسبة 50 % وبعد اللف والدوران اكتشفت حاجة جديدة خالص ان مروحة السربنتينه ضعيفة والكويل بيهرب فريون (يعنى التراب كان ملصمة) وعليه تم شراء كويل استيراد ومروحه والنتيجة تكييف 10/10 .

انا حكيت تجربتى ربما تستفيد منها فى شىء وربنا يوفقك للحل السليم.

[Hisham.Elgazzar]

المشاركة الأصلية كتبت بواسطة yaso12 والله واعلم كان عندى حاجة مشابهه فى الهيونداى الاكسيل واكتشفت ان الكويل اللى راكب ورا التابلوه مش نضيف وبعد تنضيف الكويل ودورة التكييف اتحسن التكييف بنسبة 50 % وبعد اللف والدوران اكتشفت حاجة جديدة خالص ان مروحة السربنتينه ضعيفة والكويل بيهرب فريون (يعنى التراب كان ملصمة) وعليه تم شراء كويل استيراد ومروحه والنتيجة تكييف 10/10 . انا حكيت تجربتى ربما تستفيد منها فى شىء وربنا يوفقك للحل السليم.

ربنا يعينك الصراحة بعد كل المصاريف دى كنت اشتريت تكييف جديد 300+300+350+350
انت ما عملتش حاجة فى التلاجة اللى جوا أو نظفت الفلتر الداخلى وكشفت عليهم؟
ربنا يوفقك إن شاء الله فى بس حاجة كنت عاوز انصحك بيها
عزل العربية ولون الفرش كل مايعكس الحرارة أكتر هتحس ان التكييف عمل مفعول

[taklaloveu]

بص هو انا مش خبير .. لكن نصيحتى ليك .. وبعد كل المصاريف دى .. روح لمركز صيانه معتمد احسن .. وانشالله مشكلة التكييف تتحل ..